រដ្ឋសភាសហរដ្ឋអាមេរិកគ្រោងនឹងអនុម័តលើសេចក្ដីសម្រេចមួយនៅថ្ងៃព្រហស្បតិ៍នេះដើម្បីកំណត់ជាផ្លូវការនូវដំណើរការ ដែលគណៈកម្មាធិការរដ្ឋសភាមួយចំនួននឹងបន្តអនុវត្តទាក់ទិននឹងការស៊ើបអង្កេតដើម្បីចោទប្រកាន់ទម្លាក់លោកប្រធានាធិបតី Donald Trump ពីតំណែង។
ការបោះឆ្នោតលើសេចក្ដីសម្រេចនេះទំនងជាបង្ហាញឲ្យឃើញអំពីការខ្វែងគំនិតគ្នានៅក្នុងរដ្ឋសភារវាងគណបក្សប្រជាធិបតេយ្យដែលមានសំឡេងភាគច្រើន និងគណបក្សសាធារណរដ្ឋដែលមានសំឡេងភាគតិច។ កន្លងមក ថ្នាក់ដឹកនាំគណបក្សប្រជាធិបតេយ្យអះអាងថាមិនចាំបាច់អនុម័តលើសេចក្ដីសម្រេចដូចនេះដើម្បីធ្វើឲ្យដំណើរការស៊ើបអង្កេតនេះស្របច្បាប់នោះទេ។ ចំណែកឯគណបក្សសាធារណរដ្ឋវិញ កន្លងមកជំទាស់ទៅនឹងការស៊ើបអង្កេតនេះថាជាដំណើរការបិទបាំងជ្រុល និងមិនផ្ដល់ឱកាសស្មើភាពដល់ពួកគេ។
ប្រធានរដ្ឋសភាអ្នកស្រី Nancy Pelosi បានបញ្ជាក់នៅក្នុងលិខិតមួយច្បាប់ផ្ញើទៅកាន់សមាជិកសភាខាងគណបក្សប្រជាធិបតេយ្យថា៖ «យើងចាត់វិធានការដូចនេះដើម្បីលុបបំបាត់ចម្ងល់ណាមួយទាក់ទិននឹងថាតើរដ្ឋបាលរបស់លោក Trump ប្រហែលជាបានដកចេញនូវឯកសារ រារាំងការផ្ដល់សក្ខីកម្មរបស់សាក្សី និងមិនខ្វល់នូវដីកាកោះហៅរបស់រដ្ឋសភា ឬក៏បន្តរារាំងរដ្ឋសភា ឬក៏យ៉ាងណានោះ»។
មេដឹកនាំព្រឹទ្ធសភាលោក Mitch McConnell ដែលមកពីគណបក្សសាធារណរដ្ឋ បាននិយាយថា សេចក្ដីសម្រេចនេះ «មិនបាន» ផ្ដល់នូវភាពយុត្តិធម៌ និងនីតិវិធីត្រឹមត្រូវនៅក្នុងការស៊ើបអង្កេតដើម្បីចោទប្រកាន់ទម្លាក់លោក Trump ពីតំណែងនោះទេ។
កន្លងមក គណៈកម្មាធិការស៊ើបការណ៍សម្ងាត់ គណៈកម្មាធិការកិច្ចការបរទេស និងគណៈកម្មាធិការត្រួតពិនិត្យកិច្ចការរដ្ឋាភិបាលបានបើកសវនាការបិទទ្វារស្ដាប់សក្ខីកម្មពីមន្ត្រីការទូត និងមន្ត្រីផ្សេងទៀត នៅពេលដែលពួកគេកំពុងស៊ើបអង្កេតអំពីថាតើលោក Trump គួរតែត្រូវបានចោទប្រកាន់ទម្លាក់ពីតំណែងឬក៏អត់ សម្រាប់ការណ៍ដែលលោកជំរុញឲ្យប្រទេសអ៊ុយក្រែនស៊ើបអង្កេតលើលោក Joe Biden បេក្ខជនប្រធានាធិបតីមួយរូបខាងគណបក្សប្រជាធិបតេយ្យ ដែលអាចជាគូប្រជែងរបស់លោកនៅក្នុងការបោះឆ្នោតប្រធានាធិបតីនៅឆ្នាំក្រោយ៕
