សហរដ្ឋអាមេរិក បានរាយការណ៍ថា មានការឆ្លងវីរុសកូរ៉ូណាថ្មីជាង ១២១.០០០ ករណីថ្មី កាលពីថ្ងៃសុក្រ ដែលជាថ្ងៃទី ៣ ជាប់ៗគ្នា ដែលប្រទេសមួយនេះ បានកត់ត្រាថា មានការឆ្លងថ្មីជាង ១០០.០០០ ករណី។
ការឆ្លងនេះ កំពុងកើនឡើងនៅតំបន់ទាំងអស់ នៅក្នុងសហរដ្ឋអាមេរិក ជាពិសេសនៅភាគកណ្តាលប្រទេស នៅពេលដែលចំនួនអ្នកស្លាប់ដោយជំងឺកូវីដ១៩ បានបន្តកើនឡើង។
ការចូលសម្រាកព្យាបាលនៅមន្ទីរពេទ្យក្នុងសហរដ្ឋអាមេរិក បានកើនឡើង ដែលបានបង្ខំឲ្យមន្ទីរពេទ្យនៅបណ្តារដ្ឋភាគកណ្តាល និងខាងត្បូងដូចជារដ្ឋ Illinois, Indiana, Iowa, Minnesota, North Dakota, Nebraska និងរដ្ឋ Oklahoma ចាត់វិធានការជាបន្ទាន់ ដើម្បីទទួលនូវចំនួនអ្នកជំងឺថ្មីដ៏ច្រើននេះ។
ចាប់តាំងពីការឆ្លងបានកើនឡើងនៅសហរដ្ឋអាមេរិក កាលពីពាក់កណ្តាលខែកញ្ញាមក រដ្ឋខ្លះបានដាក់វិធានការបិទសកម្មភាពសង្គមមួយផ្នែកម្តងៗ រួមមានរដ្ឋ Maine ដែលបានពង្រីកការតម្រូវឲ្យពាក់ម៉ាស់នៅតាមទីកន្លែងសាធារណៈទាំងអស់។
មន្ត្រីនៅក្នុងក្រុង Denver រដ្ឋ Colorado កាលពីថ្ងៃសុក្រ បានអំពាវនាវឲ្យពលរដ្ឋនៅផ្ទះ ពីរវាងម៉ោង ១០ យប់និងម៉ោង ៥ ភ្លឺ ដើម្បីព្យាយាមកាត់បន្ថយការកើនឡើងនៃរលកថ្មីនៃការឆ្លងវីរុសកូរ៉ូណា។
គិតមកដល់ថ្ងៃសៅរ៍ម្សិលមិញ សហរដ្ឋអាមេរិកមានការឆ្លងជំងឺកូវីដ១៩ ជាង ៩,៧ លានករណី និងមនុស្សស្លាប់ជាង ២៣៦.០០០ នាក់។ នេះតាមសាកលវិទ្យាល័យ Johns Hopkins៕
