ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ស្ថានទូតសរអានៅភ្នំពេញ​​កត់​សម្គាល់​ខួប​មួយ​ឆ្នាំ​នៃ​ការ​បោះ​ឆ្នោត​ជាតិ ​ដែល​«មាន​កំហុស​ឆ្គងយ៉ាង​ខ្លាំង»


គេហទំព័រ​ហ្វេសប៊ុក​របស់​ស្ថានទូត​អាមេរិក​ប្រចាំ​នៅ​កម្ពុជា​ដែល​អត្ថាធិប្បាយ​អំពី​ការ​បោះឆ្នោត​នៅ​កម្ពុជា​អាណត្តិ​ទី​៦​ថា«​មាន​កំហុស​យ៉ាង​ខ្លាំង‍‍» ថ្ងៃ​ទី​៣០ ខែកក្កដា ឆ្នាំ២០១៩។ (រូប​ដកស្រង់​ពី​​ហ្វេសប៊ុក​ស្ថានទូត​អាមេរិក​ប្រចាំ​កម្ពុជា)

មួយ​ឆ្នាំ​ក្រោយ​ការ​បោះឆ្នោត​ ដែល​គណបក្ស​កាន់​អំណាច​ឈ្នះ​ភ្លូក​ទឹក​ភ្លូក​ដី​តែម្នាក់​តែង​ និង​ក្រោយ​ការ​រំលាយ​គណបក្ស​សង្គ្រោះ​ជាតិ​ដោយ​តុលាការ​កំពូល​ ស្ថានទូត​ស.រ.អា.​នៅ​ភ្នំពេញ​ចេញ​កំណត់​សម្គាល់​«ខួប​មួយ​ឆ្នាំ​នៃ​ការ​បោះ​ឆ្នោត​ជាតិ ​ដែល​មាន​កំហុស​យ៉ាង​ខ្លាំង‍»​ ​តែ​មន្ត្រី​រដ្ឋា​ភិបាល​នៅតែ​អះអាង​ថា ​នេះ​ជា​ការ​សម្រេច​របស់​ពលរដ្ឋ​កម្ពុជា។

មួយ​ឆ្នាំ​ក្រោយ​ពី​ការ​បោះឆ្នោត​ដែល​ទទួល​រង​ការ​ស្តី​បន្ទោស​នៅ​កម្ពុជា​ ​សហ​រដ្ឋ​អាមេរិកបាន​រំឭកឡើង​វិញ​នៅ​ថ្ងៃ​អង្គារ​នេះ​ថា ​ការ​បោះ​ឆ្នោត​ជ្រើ​ស​តាំង​តំណាង​រាស្ត្រ​អាណត្តិ​ទី​៦​នោះ​«មាន​កំហុស​យ៉ាង​ខ្លាំង»។​

នៅ​ក្នុង​ទំព័រ​ហ្វេសប៊ុក​របស់​ខ្លួន​ ​ស្ថានទូត​អាមេរិក​នៅ​កម្ពុជា​បាន​លើក​ឡើង​ថា​ «រដ្ឋា​ភិបាល​សហ​រដ្ឋ​អាមេរិក​កត់​សម្គាល់​ខួប​មួយឆ្នាំ​នៃ​ការ​បោះឆ្នោត​ជាតិ​ ដែល​មាន​កំហុស​ឆ្គង​យ៉ាង​ខ្លាំង​នៅ​កម្ពុជា។​ ការ​បោះ​ឆ្នោត​នោះមិន​មាន​ភាព​សេរី ​និង​យុត្តិធម៌​ទេ ​ហើយ​ក៏មិន​បាន​តំណាង​ឲ្យ​ឆន្ទៈ​របស់​ប្រជា​ពលរដ្ឋ​កម្ពុជា​ដែរ‍»។​

ស្ថានទូត​ដដែល​បានបន្ថែម​ថា​ ការ​បោះ​ឆ្នោត​កាល​ពីថ្ងៃ​ទី​២៩​កក្កដា​ឆ្នាំ​២០១៨​នោះ​«បាន​ផាត់​ចោល​គណបក្ស​ប្រឆាំង​ធំ​ជាង​គេ​នៅ​កម្ពុជា​ ហើយ​វា​រឹតតែ​ធ្វើ​ឲ្យ​បាត់​បង់​ថែម​ទៀត​នូវ​សមិទ្ធផល​របស់​ប្រទេស​កម្ពុជា​ក្នុង​ការ​ជំរុញ​ការ​ផ្សះផ្ស​ានយោបាយ ​និង​លើក​កម្ពស់​កំណើន​សេដ្ឋ​កិច្ច​ ចាប់​តាំងពី​មាន​កិច្ច​ព្រម​ព្រៀង​សន្តិភាព​ទីក្រុង​ប៉ារីស​ឆ្នាំ​១៩៩១​មក‍»។​

ស្ថានទូត​សហ​រដ្ឋ​អាមេរិក​ដែល​ទំនង​ជា​និយាយ​យោង​ដល់​ការ​រំលាយ​គណបក្ស​សង្គ្រោះ​ជាតិ​កាល​ពី​ខែវិច្ឆិកា​ឆ្នាំ​២០១៧​ ​បាន​អំពាវ​ដល់​រដ្ឋាភិបាល​កម្ពុជា​«ឲ្យ​ចាត់​វិធាន​ការ​ជាក់ស្តែង​នានា​ក្នុង​ការ​ស្តារ​លទ្ធិ​ប្រជា​ធិបតេយ្យ ​រួម​ទាំង​ធ្វើការ​ទម្លាក់​បទ​ចោទ​ប្រកាន់​ទាំងឡាយ​ប្រឆាំង​លោក​កឹម សុខា​ និង​អ្នកទោស​នយោបាយ​ដទៃ​ទៀត ​ហើយ​បញ្ចប់​ការ​អនុវត្ត​នូវ​ការ​ចោទ​ប្រកាន់​ដោយ​គ្មាន​មូលដ្ឋាន ​និង​ក្រោម​ហេតុ​ផល​នយោបាយ​ដែលយាយី​ពលរដ្ឋ​របស់​ខ្លួន‍»។​

លោក​ផៃ ស៊ីផាន ​អ្នក​នាំពាក្យ​រដ្ឋាភិបាល​ ​ឆ្លើយ​តប​វិញ​ថា​ ការ​បោះ​ឆ្នោត​នៅ​កម្ពុជា​គឺ​ជា​ផល​ប្រយោជន៍​របស់​ប្រជា​ជន​កម្ពុជា​ ដែល​មិន​តម្រូវ​ឲ្យ​មាន​បរទេស​ណា​មក​ឈ្លាន​ពាន​ និង​លុកលុយ​ការ​សម្រេច​ចិត្ត​របស់​ប្រជា​ពលរដ្ឋ​កម្ពុជា​នោះ​ទេ។​

លោក​បន្ថែម​ថា៖​ «យើង​មិន​បោះឆ្នោត​ដើម្បី​បំពេញ​ចិត្ត​ក្រុម​ណា​ ឬ​បរទេស​ណា​ទេ ហើយ​បើ​មិន​ឲ្យ​តម្លៃ​ការ​បោះ​ឆ្នោត​ ​ អ្នក​ដែល​លើក​ឡើង​នោះ​គឺ​អាច​មាន​សិទ្ធិ​ជ្រើស​រើស​ការ​ដើរ​ចេញ​ពី​ប្រទេស​ខ្មែរ‍»។​

រដ្ឋាភិបាល​តែងតែ​និយាយ​ការពារ​ការ​បោះឆ្នោត​ឆ្នាំ​២០១៨​ ​ដែល​គណបក្ស​កាន់​អំណាច​របស់​លោក​នាយក​រដ្ឋមន្ត្រី​ហ៊ុន សែន​ឈ្នះ​អាសនៈ​រដ្ឋ​សភា​ទាំង​អស់​ ​ក្រោយ​ការ​រំលាយ​គណបក្ស​សង្គ្រោះ​ជាតិ ហើយ​បាន​បង្កើត​តួនាទី​ទីប្រឹក្សា​សម្រាប់​មេដឹកនាំ​គណបក្ស​ដែល​គ្មាន​សំឡេង​គាំទ្រ​ពី​ពលរដ្ឋ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG