ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិអ្នកស្រី Linda Thomas-Greenfield នឹងធ្វើដំណើរទៅកាន់ព្រំដែនរវាងប្រទេសកូរ៉េទាំងពីរ ហើយនឹងជួបជាមួយជនជាតិកូរ៉េខាងជើងដែលរត់គេចពីកូរ៉េខាងជើងមករស់នៅក្នុងប្រទេសកូរ៉េខាងត្បូង។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើការបញ្ជាក់របស់ការិយាល័យរបស់អ្នកស្រី Thomas-Greenfield កាលពីថ្ងៃចន្ទ។
ដំណើរទស្សនកិច្ចរបស់អ្នកស្រី Thomas-Greenfield ដែលគ្រោងនឹងធ្វើឡើងពីថ្ងៃទី ១៤ ដល់ថ្ងៃទី ២០ ខែមេសានេះ បានកើតឡើងបន្ទាប់ពីរុស្ស៊ីបានបដិសេធមិនគាំទ្រការបន្តទៅមុខនៃគណៈកម្មាធិការអ្នកជំនាញពហុជាតិ ដែលនៅក្នុងពេលជាង ១៥ ឆ្នាំកន្លងមកនេះ គណៈកម្មាធិការនេះបានធ្វើការលើការអនុវត្តការដាក់ទណ្ឌកម្មរបស់អង្គការសហប្រជាជាតិលើកូរ៉េខាងជើងក្នុងបំណងទប់ស្កាត់កម្មវិធីនុយក្លេអ៊ែរនិងមីស៊ីលរបស់ប្រទេសនេះ។
សហរដ្ឋអាមេរិក កូរ៉េខាងត្បូង និងជប៉ុនបានរិះគន់ការបោះឆ្នោតវ៉េតូរបស់រុស្ស៊ីនិងការបោះឆ្នោតអនុប្បវាទរបស់ចិន។ អ្នកជំនាញថា ការបោះឆ្នោតរបស់ចិននិងរុស្ស៊ីដូចនេះនឹងធ្វើឱ្យអន្តរាយដល់ការអនុវត្តការដាក់ទណ្ឌកម្ម។
ដំណើរទស្សនកិច្ចរបស់អ្នកស្រី Thomas-Greenfield ដែលនឹងមានការឈប់សំចតផងដែរនៅក្នុងប្រទេសជប៉ុន មានគោលបំណងបង្កើនកិច្ចសហប្រតិបត្តិការទ្វេភាគីនិងត្រីភាគីលើការដាក់ទណ្ឌកម្មលើកូរ៉េខាងជើងនិងលើសពីនេះទៀត។ នេះបើតាមការបញ្ជាក់របស់លោក Nate Evans អ្នកនាំពាក្យស្ថានបេសកកម្មសហរដ្ឋអាមេរិកប្រចាំអង្គការសហប្រជាជាតិ។
ទាំងកូរ៉េខាងត្បូងនិងជប៉ុននៅពេលបច្ចុប្បន្ននេះគឺជាសមាជិកមិនអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ៕
បេសកជនអាមេរិកនឹងធ្វើទស្សនកិច្ចទៅព្រំដែនរវាងកូរ៉េទាំងពីរ
- Reuters
វេទិកាបញ្ចេញមតិ