លោក Zalmay Khalilzad បេសកជនសហរដ្ឋអាមេរិកប្រចាំនៅប្រទេសអាហ្វហ្គានីស្ថានដែលបានចរចាកិច្ចព្រមព្រៀងជាមួយក្រុមតាលីបង់បានស្វាគមន៍ការដោះដូរអ្នកទោសរវាងជនសកម្មប្រយុទ្ធ និងរដ្ឋាភិបាលអាហ្វហ្គានីស្ថាន ថា «ជាជំហានដ៏មានសារៈសំខាន់» ឆ្ពោះទៅកាន់សន្តិភាព។
លោក Khanilzad បាននិយាយនៅលើ Twitter កាលពីថ្ងៃទី១៣ ខែមេសាថា «ភាគីទាំង២ត្រូវតែបង្កើនការខំប្រឹងប្រែងធ្វើទៅតាមទីដៅដែលត្រូវបានកំណត់នៅក្នុងកិច្ចព្រមព្រៀងរវាងសហរដ្ឋអាមេរិកនិងក្រុមតាលីបង់ឲ្យបានឆាប់រហ័សទៅតាមលទ្ធភាពដែលអាចធ្វើបាន»។ លោកបាននិយាយទៀតថា ការដោះដូរអ្នកទោសមានសារៈសំខាន់ជាងពេលណាទាំងអស់ដោយអ្នកទោសរងការគំរាមកំហែងដោយការផ្ទុះឡើងនូវមេរោគកូរ៉ូណា។
តាមគណៈកម្មាធិការកាកបាទក្រហមអន្តរជាតិ បានប្រាប់ឲ្យដឹងថា កាលពី ថ្ងៃទី១២ ខែមេសានេះ ក្រុមតាលីបង់បានដោះលែងអ្នកទោសអាហ្វហ្គានីស្ថានចំនួន២០នាក់នៅក្នុងខេត្តកាន់ដាហាភាគខាងត្បូង។
ចំណាត់ការនេះបានកើតមានឡើងបន្ទាប់ពីរដ្ឋាភិបាលអាហ្វហ្គានីស្ថាន បានដោះលែងអ្នកទោសតាលីបង់១០០នាក់ ដោយធ្វើឲ្យមានអ្នកទោសតាលីបង់ទាំងអស់ដែលត្រូវបានដោះលែងចាប់តាំងពីថ្ងៃទី៨ ខែមេសាមក មានចំនួន៣០០នាក់។
កិច្ចព្រមព្រៀងនោះត្រូវបានចុះហត្ថលេខាដោយសហរដ្ឋអាមេរិក និងក្រុមតាលីបង់នៅក្នុងរដ្ឋធានីដូហានៃប្រទេសកាតា កាលពីថ្ងៃទី២៩ ខែកុម្ភៈ អំពាវនាវឲ្យរដ្ឋាភិបាលអាហ្វហ្គានីស្ថានដោះលែងអ្នកប្រយុទ្ធតាលីបង់៥ពាន់នាក់ជាវិធានការស្ថាបនាការទុកចិត្តមុនពេលការចរចាសន្តិភាពផ្លូវការដែលមានគោលបំណងបញ្ចប់ជម្លោះដែលមានអាយុ១៨ឆ្នាំនៅប្រទេសអាហ្វហ្គានីស្ថាន។
ក្រុមតាលីបង់បានសន្យាដោះលែងកងទ័ពរដ្ឋាភិបាល និងបុគ្គលិកស៊ីវិលអាហ្វហ្គានីស្ថានចំនួន១ពាន់នាក់ដែលខ្លួនកំពុងឃុំឃាំង៕
