ឯកអគ្គរដ្ឋទូតអាមេរិកប្រចាំនៅកម្ពុជា ជំរុញវិនិយោគិនបរទេស រួមទាំងវិនិយោគិនអាមេរិក ឱ្យចូលមកវិនិយោគនៅកម្ពុជា ពិសេសក្នុងវិស័យឧស្សាហកម្មផលិតសម្ភារៈសម្រាប់ធ្វើដំណើរ បន្ទាប់ពីអាមេរិកបានលើកពន្ធនាំចូលផលិតផលប្រភេទនេះពីកម្ពុជាចូលទៅទីផ្សារអាមេរិក។
កាលពីចុងខែមិថុនា សហរដ្ឋអាមេរិកបានប្រកាសលើកលែងពន្ធនាំចូលចំពោះផលិតផលសម្រាប់ធ្វើដំណើរដែលមានដូចជាកាបូប វ៉ាលីស៍ កាបូបស្ពាយ និងកាបូបលុយដែលផលិតនៅកម្ពុជា ចាប់ថ្ងៃទី១ ខែកក្កដាតទៅ។
ថ្លែងទៅកាន់ក្រុមអ្នកសារព័ត៌មាន នារសៀលថ្ងៃអង្គារនៅឯស្ថានទូតអាមេរិកក្នុងរាជធានីភ្នំពេញ ឯកអគ្គរដ្ឋទូតអាមេរិកលោក William A. Heidt បានមានប្រសាសន៍ថា ប្រទេសកម្ពុជា មានបរិយាកាសល្អសម្រាប់ការវិនិយោគ និងមានបទពិសោធច្រើននៅក្នុងវិស័យឧស្សាហកម្មកាត់ដេរ។
លោកបន្តថា តាមរយៈការលើកលែងពន្ធលើផលិតផលសម្រាប់ធ្វើដំណើរ កម្ពុជាជាប្រទេសដែលមានសក្ដានុពលនៅក្នុងវិស័យនេះ។
«រោងចក្រគឺរោងចក្រ។ មានរោងចក្រខ្លះល្អ ហើយរោងចក្រខ្លះដែលនៅត្រូវការកែលម្អខ្លះទៀត។ ខ្ញុំបានឃើញរោងចក្រទាំងពីរប្រភេទនេះនៅក្នុងប្រទេសកម្ពុជា ហើយជាទូទៅ វិស័យនេះបានអភិវឌ្ឍប្រកបទៅដោយភាពទទួលសុខត្រូវ។ ហើយការដែលកម្ពុជាមានកម្មវិធីរោងចក្រកាន់តែប្រសើរនៅកម្ពុជា (Better Factories Cambodia) ដែលជាប់ទាក់ទិនជាមួយនឹងអង្គការពលកម្មអន្តរជាតិ (ILO) បានផ្ដល់ទំនុកចិត្តខ្លាំងទៅដល់ក្រុមអ្នកបញ្ជាទិញថាលក្ខខណ្ឌការងារគឺល្អ។ ដូច្នេះ កម្ពុជាមានកេរ្តិ៍ឈ្មោះល្អសម្រាប់ផលិតកម្មល្អ និងផលិតកម្មប្រកបដោយវិជ្ជាជីវៈនៅក្នុងវិស័យកាត់ដេរ»។
លោក William A. Heidt ឱ្យដឹងដែរថា កាលពីថ្ងៃអាទិត្យ លោកបានរួមដំណើរជាមួយមន្ត្រីរដ្ឋាភិបាល និងសមាគមរោងចក្រកាត់ដេរនៅកម្ពុជា GMAC ទៅកាន់ទីក្រុងហុងកុង ដើម្បីផ្សព្វផ្សាយ និងទាក់ទាញអ្នកវិនិយោគលើវិស័យកាត់ដេរមកកាន់កម្ពុជា។
លោកបន្តថា ក្រុមអ្នកបញ្ជាទិញប្រមាណ២០ក្រុមហ៊ុន និង២០រោងចក្របានចូលរួមស្ដាប់ ដោយជាលទ្ធផល រោងចក្រយ៉ាងតិច៨បានពិចារណាយ៉ាងប្រាកដប្រជាក្នុងការមកវិនិយោគនៅកម្ពុជា។
លោក ចាន់ សុផល ប្រធានមជ្ឈមណ្ឌលដើម្បីការសិក្សាគោលនយោបាយមានប្រសាសន៍ថា ការលើកលែងពន្ធសម្រាប់សម្ភារៈធ្វើដំណើរដែលនៅចន្លោះពី៥ទៅ២០ភាគរយនេះ នឹងជួយកម្ពុជាឱ្យប្រកួតប្រជែងជាមួយប្រទេសដទៃក្នុងការនាំផលិតផលប្រភេទនេះទៅអាមេរិក ក៏ដូចជាធ្វើពិពិធកម្មសេដ្ឋកិច្ច ឬដែលមានន័យថាធ្វើឱ្យសេដ្ឋកិច្ចមានភាពចម្រុះ។
លោកថា កត្តានេះនឹងនាំឱ្យរោងចក្រដែលមានស្រាប់នៅកម្ពុជាពិចារណាក្នុងការពង្រីកប្រតិបត្តិការ និងផលិតកម្មរបស់ខ្លួន និងអាចទាក់ទាញវិនិយោគិនថ្មីឱ្យមកសាងសង់រោងចក្របន្ថែមទៀត តែកម្ពុជាក៏ត្រូវកែសម្រួលបញ្ហាមួយចំនួនផងដែរ។
«ចឹងរដ្ឋាភិបាល ត្រូវខិតខំមែនទែនរឿងពន្លឿនរឿងវិស័យអគ្គិសនីមួយ ធ្វើយ៉ាងណាធ្វើឱ្យអគ្គិសនីមានចរន្តល្អ ទៀងទាត់។ ត្រូវវិនិយោគថែម ។យើងវិនិយោគថែមរឿងនេះមួយ ហើយថ្លៃអគ្គិសនីបើយើងចុះបានក៏ល្អថែមទៀត។ ហើយនិងចំណាយផ្សេងៗទៀត ក៏មិនគួរឱ្យកើនឡើងខ្ពស់ពេកដែរ។ បើសិនជាមិនដូច្នោះទេ វានៅតែជាឧបសគ្គសម្រាប់ការធ្វើពិពិធកម្មនៅក្នុងវិស័យឧស្សាហកម្មរបស់យើងដែរ»។
លោក អ៊ូ វីរៈ ប្រធានវេទិកាអនាគតមានប្រសាសន៍ថា អាមេរិកកំពុងព្យាយាមបង្កើនទំនាក់ទំនងល្អជាមួយកម្ពុជា តាមការផ្ដោតទៅលើការវិនិយោគជាជាងនិយាយរឿងសិទ្ធិមនុស្ស និងប្រជាធិបតេយ្យ ដែលជានិច្ចកាល តែងនាំឱ្យមានប្រតិកម្មពីរដ្ឋាភិបាល។
លោកយល់ថា នេះគឺជាយុទ្ធសាស្ត្រដែលអាចមានប្រសិទ្ធភាពក្នុងការជំរុញឱ្យរដ្ឋាភិបាលបង្កើនការយកចិត្តទុកដាក់លើបញ្ហាសិទ្ធិមនុស្ស និងនីតិរដ្ឋ។
«ជាយុទ្ធសាស្ត្រ គេឆ្លាត។ អាមេរិកឆ្លាតត្រង់ថា ប្រសិនបើអ្នកវិនិយោគបែបហ្នឹងមកប្រទេសកម្ពុជា ចឹងរដ្ឋាភិបាលក៏ព្រួយបារម្ភពីស្ថិរភាពនយោបាយដែរ។ អញ្ចឹង ប្រសិនបើបារម្ភពីស្ថានភាពនយោបាយដូចដែលខ្ញុំបានលើកឡើង គឺរដ្ឋាភិបាលត្រូវធ្វើកំណែទម្រង់។ កំណែទម្រង់តុលាការ កំណែទម្រង់ប្រព័ន្ធនយោបាយ កំណែទម្រង់បញ្ហាអយុត្តិធម៌សង្គម ចឹងគឺល្អ។ ល្អសម្រាប់ប្រទេសកម្ពុជា»។
យ៉ាងណាក៏ដោយ លោក អ៊ូ វីរៈ បន្ថែមថា ទោះបីមានការជ្រោមជ្រែងពីសហរដ្ឋអាមេរិកក៏ដោយ កម្ពុជាខ្លួនឯងត្រូវធានាឱ្យមានស្ថិរភាពនយោបាយនៅក្នុងប្រទេស ដើម្បីឱ្យវិនិយោគិនទាំងនោះមានទំនុកចិត្ត។
ប្រទេសកម្ពុជាមានទីផ្សារធំៗចំនួនពីរគឺស.រ.អា. និងសហភាពអឺរ៉ុបសម្រាប់ការនាំចេញផលិតផលវាយនភណ្ឌរបស់ខ្លួនដែលផ្ដល់ការងារដល់ពលរដ្ឋកម្ពុជាប្រហែល៧០០០០០នាក់ និងបង្កើតចំណូលជាង៥ពាន់លានដុល្លារក្នុង១ឆ្នាំៗ។
វិស័យកាត់ដេរគឺជាសរសរទ្រូងសេដ្ឋកិច្ចមួយក្រៅពីវិស័យ៣ទៀត រួមមានសំណង់ កសិកម្ម និងទេសចរណ៍។
បើតាមលោក William A. Heidt អាមេរិកនាំចូលរបស់របរប្រើប្រាស់សម្រាប់ការធ្វើដំណើរក្នុងតម្លៃប្រមាណ១០ពាន់លានដុល្លារអាមេរិកក្នុងមួយឆ្នាំៗ ឬប្រមាណ២ដងនៃចំណូលសរុបរបស់កម្ពុជាពីការនាំចេញវិស័យវាយនភណ្ឌ៕
