រដ្ឋអាជ្ញាសហរដ្ឋអាមេរិកបានប្រកាសចោទប្រកាន់កាលពីថ្ងៃពុធម្សិលមិញប្រឆាំងនឹងជនជាតិចិន ៥ នាក់ ដែលសង្ស័យថាជាអ្នកលួចចូលក្នុងប្រព័ន្ធកំព្យូទ័រ និងពាណិជ្ជករជនជាតិម៉ាឡេស៊ី ២ នាក់ទៀត ពាក់ព័ន្ធនឹងការលួចចូលក្នុងប្រព័ន្ធកំព្យូទ័រក្នុងពេលប៉ុន្មានឆ្នាំថ្មីៗនេះលើក្រុមហ៊ុននិងអង្គភាពជាង ១០០ នៅក្នុងសហរដ្ឋអាមេរិក និងក្នុងប្រទេសផ្សេងៗទៀត។
ការលួចចូលក្នុងប្រព័ន្ធកំព្យូទ័រចាប់ពីដើមឆ្នាំ ២០១៤ រហូតដល់ខែសីហា ឆ្នាំ២០២០ នេះ មានគោលដៅសំដៅលើកំព្យូទ័ររាប់ពាន់គ្រឿងនៅជុំវិញពិភពលោក ដែលក្នុងនោះរួមមានទាំងបណ្តាញកំព្យូទ័ររបស់ក្រុមហ៊ុនមួយចំនួននៅក្នុងឧស្សាហកម្មវីដេអូហ្គេមដែលមានតម្លៃ ១ ពាន់លានដុល្លារផងដែរ ដែលបណ្ដាលឲ្យខាតបង់ប្រាក់អស់រាប់លានដុល្លារ។ នេះបើតាមការបញ្ជាក់របស់មន្ត្រីពង្រឹងច្បាប់។
ជនសង្ស័យចិនទាំង ៥ នាក់ ដែលជាសមាជិកនៃក្រុម APT-41 របស់ចិន នៅមិនទាន់ចាប់ខ្លួនបាននៅឡើយទេ។ ជនទាំងនោះគឺ Zhang Haoran អាយុ ៣៥ ឆ្នាំ Tan Dailin អាយុ ៣៥ ឆ្នាំ Jiang Lizhi អាយុ ៣៥ ឆ្នាំ Qian Chuan អាយុ ៣៩ ឆ្នាំ និង Fu Qiang អាយុ ៣៧ ឆ្នាំ។
រីឯពាណិជ្ជករម៉ាឡេស៊ី ២ នាក់ នោះគឺ Wong Ong Hua អាយុ ៤៦ ឆ្នាំ និង Ling Yang Ching អាយុ ៣២ ឆ្នាំ។ ជនទាំងពីរនាក់នេះត្រូវបានចាប់ខ្លួននៅក្នុងប្រទេសម៉ាឡេស៊ីកាលពីថ្ងៃអាទិត្យ។ សហរដ្ឋអាមេរិក កំពុងស្វះស្វែងធ្វើបត្យាប័នបញ្ជូនពួកគេទាំង ២ មកកាន់សហរដ្ឋអាមេរិក ដែលជាដំណើរការមួយដែលអាចត្រូវចំណាយពេលរាប់ខែ៕
