ក្រសួងហិរញ្ញវត្ថុសហរដ្ឋអាមេរិកបានអំពាវនាវដល់ពួកប្រទេសជាសមាជិកនៃមជ្ឈមណ្ឌលតាមដានការរៃអង្គាសប្រាក់របស់ក្រុមភេរវជន(TFTC) ឱ្យប្រើឥទ្ធិពលពួកគេក្នុងការចាត់វិធានការថែមទៀតដើម្បីកាត់ផ្តាច់លំហូរប្រាក់កាសទៅឱ្យពួកហាម៉ាស់ដែលគ្រប់គ្រងតំបន់ហ្កាហ្សាជាកន្លែងរស់នៅរបស់ជនជាតិប៉ាឡេស្ទីន២លាន៣សែននាក់ដែលរងការបាញ់ផ្តក់ដោយអ៊ីស្រាអែលជាងពីរអាទិត្យមកហើយ។
សហរដ្ឋអាមេរិកបានចាត់ទុកពួកហាម៉ាស់ថាជាអង្គការភេរវជនមួយចាប់តាំងពីឆ្នាំ១៩៩៧មក។
រដ្ឋលេខាធិការក្រសួងហិរញ្ញវត្ថុសម្រាប់ការស៊ើបការណ៍សម្ងាត់ផ្នែកភេរវកម្មនិងហិរញ្ញវត្ថុលោក Brian Nelson បាននិយាយនៅក្នុងសេចក្តីថ្លែងការណ៍មួយចេញផ្សាយកាលពីថ្ងៃអង្គារសម្រាប់ក្រុមនេះថា៖ «តាមទស្សនៈរបស់យើង ការមិនចាត់វិធានការប្រឆាំងពួកហាម៉ាស់និងភេរវកម្មរបស់ពួកគេជាអំពើនាំឱ្យមានផលអាក្រក់ដល់ប្រជារាស្ត្រប៉ាឡេស្ទីន»។
លោកបានថ្លែងថា៖ «តាមទស្សនៈហិរញ្ញវត្ថុ យើងអាចឃើញច្បាស់លាស់ថាពួកហាម៉ាស់បានបង្កើនការពិបាកខាងសេដ្ឋកិច្ចក្នុងតំបន់ហ្កាហ្សាច្រើនទសវត្សរ៍មកហើយដោយបានបង្វែរជំនួយមនុស្សធម៌ទៅគាំទ្រយុទ្ធនាការភេរវកម្មរបស់ពួកគេ ហើយយើងត្រូវតែថ្កោលទោសសកម្មភាពទាំងនេះជាសាធារណៈ»។
អង្គការ TFTC មានប្រទេសបារ៉េន គូវ៉ែត អូម៉ង់ កាតា អារ៉ាប៊ីសាអ៊ូឌីត អេមីរ៉ាតអារ៉ាប់រួមនិងសហរដ្ឋអាមេរិកជាសមាជិក។
ត្រូវបានបង្កើតកាលពីឆ្នាំ២០១៧ អង្គការ TFTC មានមូលដ្ឋាននៅក្រុងរីយ៉ាត ហើយមានពួកមន្ត្រីរដ្ឋាភិបាលមកពីប្រទេសជាសមាជិកជួបជុំគ្នាដើម្បីពិភាក្សាអំពីវិធីដែលពួកគេអាចធ្វើសហការគ្នាដើម្បីកាត់បន្ថយលំហូរប្រាក់កាសដល់អង្គការភេរវកម្មនិងប្រយុទ្ធប្រឆាំងនឹងការលាងប្រាក់ជាទូទៅ។
ការប្រជុំនៅក្នុងសប្តាហ៍នេះ ដែលបានកំណត់ដំបូងថាធ្វើនៅខែវិច្ឆិកា បានបើកការប្រជុំគ្នាមុនពេលកំណត់ដោយសារមានវិបត្តិនៅអ៊ីស្រាអែលនិងតំបន់ហ្កាហ្សា៕
ប្រែសម្រួលដោយលោក ឈឹម សុមេធ
