ប្រធាននាយកដ្ឋានទាហានជាន់ខ្ពស់សហរដ្ឋអាមេរិកបានធ្វើទស្សនកិច្ចនៅក្នុងប្រទេសចិននៅថ្ងៃអង្គារនេះ ខណៈពេលដែលមានភាពតានតឹងពាក់ព័ន្ធនឹងការសម្រេចចិត្តតម្លើងប្រព័ន្ធការពារមីស៊ីលរបស់ប្រទេសកូរ៉េខាងត្បូង ដែលជាសម្ព័ន្ធមិត្តមួយរបស់សហរដ្ឋអាមេរិក និងស្របពេលដែលមានភាពតានតឹងទាក់ទិននឹងជម្លោះនៅក្នុងសមុទ្រចិនខាងត្បូង។
លោកមេបញ្ជាការ Mark A. Milley បានជួបជាមួយសមភាគីចិនរបស់លោក និងមេដឹកនាំជាន់ខ្ពស់នៃកងទាហានដើម្បីសេរីភាពប្រជាពលរដ្ឋចិនផ្សេងៗទៀត ក្នុងគោលបំណងពិភាក្សាបញ្ហាព្រួយបារម្ភមួយចំនួន និងរិះរកមធ្យោបាយដើម្បីពង្រឹងកិច្ចសហប្រតិបត្តិការនៅក្នុងផ្នែកដែលផ្ដល់ផលប្រយោជន៍ទៅវិញទៅមក ហើយព្យាយាមគ្រប់គ្រងភាពខុសគ្នាក្នុងន័យស្ថាបនា»។ នេះបើតាមការបញ្ជាក់នៅក្នុងសេចក្ដីប្រកាសព័ត៌មានរបស់នាយកដ្ឋានទាហានជាន់ខ្ពស់សហរដ្ឋអាមេរិក។
លោក Milley នឹងធ្វើទស្សនកិច្ចទៅកាន់បណ្ឌិតសភាវិទ្យាសាស្ត្រយោធារបស់កងទាហានដើម្បីសេរីភាពប្រជាពលរដ្ឋចិនផងដែរ ដើម្បីផ្លាស់ប្ដូរយោបល់គ្នាទៅវិញទៅមកជាមួយនឹងសាស្ត្រាចារ្យ និងនិស្សិត។
ប្រទេសចិនបានប្រឆាំងនឹងការសម្រេចចិត្តរបស់ប្រទេសកូរ៉េខាងត្បូងក្នុងការតម្លើងប្រព័ន្ធការពារមីស៊ីលរបស់សហរដ្ឋអាមេរិក ដែលហៅថា THAAD នៅភាគខាងត្បូងប្រទេសកូរ៉េខាងត្បូង ដោយប្រទេសចិនជឿជាក់ថា ប្រព័ន្ធរ៉ាដា X-band របស់ប្រព័ន្ធមីស៊ីលនេះមានគោលបំណងតាមដានមីស៊ីលនៅក្នុងប្រទេសចិន។ ប៉ុន្តែសហរដ្ឋអាមេរិកលើកឡើងថា ប្រព័ន្ធការពារមីស៊ីលនេះមានគោលបំណងបំផ្លាញមីស៊ីលរបស់ប្រទេសកូរ៉េខាងជើងតែប៉ុណ្ណោះ។
បន្ទាប់ពីដំណើរទស្សនកិច្ចរបស់លោកនៅក្នុងទីក្រុងប៉េកាំង លោក Milley នឹងធ្វើដំណើរទៅកាន់ប្រទេសកូរ៉េខាងត្បូងដើម្បីជួបជាមួយនឹងទាហានសហរដ្ឋអាមេរិក និងបើកកិច្ចពិភាក្សាជាមួយនឹងមេដឹកនាំយោធាកូរ៉េខាងត្បូងអំពីការតម្លើងប្រព័ន្ធការពារមីស៊ីល THAAD និងបញ្ហាផ្សេងៗទៀត។ និងបន្ទាប់ពីនោះមក លោកនឹងធ្វើដំណើរទៅធ្វើទស្សនកិច្ចនៅក្នុងប្រទេសជប៉ុន ដែលជាសម្ព័ន្ធមិត្តសំខាន់មួយរបស់សហរដ្ឋអាមេរិក និងជាគូបដិបក្ខមួយរបស់ប្រទេសចិន៕
