នៅថ្ងៃអង្គារនេះ ឯកអគ្គរដ្ឋទូតអាមេរិកប្រចាំកម្ពុជា លោក W. Patrick Murphy បានជួបពិភាក្សាជាមួយលោកនាយករដ្ឋមន្ត្រី ហ៊ុន សែន អំពីកិច្ចសហប្រតិបត្តិការរវាងគ្នា ដើម្បីបន្តការត្រួតពិនិត្យសុខភាព និងការសម្រួលដល់អ្នកដំណើរតាមនាវាទេសចរណ៍ Westerdam ដែលចុះចតនៅកំពង់ផែក្រុងព្រះសីហនុ។ នេះបើយោងតាមបណ្តាញ Twitter របស់លោកឯកអគ្គរដ្ឋទូតអាមេរិក។
លោក Patrick Murphy បានសរសេរជាភាសាអង់គ្លេស ដែលត្រូវបានប្រែសម្រួលជាភាសាខ្មែរថា៖ «ថ្ងៃនេះ ខ្ញុំបានជួបលោកនាយករដ្ឋមន្ត្រី ហ៊ុន សែន ដើម្បីបន្តកិច្ចសហប្រតិបត្តិការក្នុងការជួយដល់ការធ្វើដំណើររបស់អ្នកធ្វើដំណើរតាមនាវា Westerdam។ កិច្ចសហប្រតិបត្តិការដ៏យូរអង្វែងរបស់យើងក្នុងវិស័យសុខាភិបាលសាធារណៈ មានសារៈសំខាន់ ខណៈដែលយើងប្រឈមនឹងមេរោគកូរ៉ូណាវីរុស COVID19 នៅទូទាំងសកលលោក»។
រដ្ឋាភិបាលកម្ពុជា និងមន្ត្រីទូតអាមេរិកប្រចាំកម្ពុជា បានសម្រួលដល់ការចុះចតរបស់នាវាទេសចរណ៍ MS Westerdam របស់ក្រុមហ៊ុនអាមេរិក Holland America Line នៅកំពង់ផែក្នុងខេត្តព្រះសីហនុ កាលពីថ្ងៃព្រហស្បតិ៍សប្តាហ៍មុន បន្ទាប់ពីក្រុមហ៊ុននាវានេះបានអះអាងថា អ្នកដំណើរលើនាវានេះមិនមានផ្ទុកមេរោគកូរ៉ូរណាវីរុស (COVID-19) ទេ។ កិច្ចសហប្រតិបត្តិការនេះ ត្រូវបានធ្វើឡើង បន្ទាប់ពីរដ្ឋាភិបាលជប៉ុន តៃវ៉ាន់ ថៃ និងហ្វីលីពីន បានបដិសេធមិនឲ្យនាវានេះចុះចតក្នុងប្រទេសរបស់ខ្លួនដោយបារម្ភពីការឆ្លងរាតត្បាតនៃមេរោគនេះ។
ក៏ប៉ុន្តែ បញ្ហាប្រឈមបានកើតមានឡើង បន្ទាប់ពីអ្នកដំណើរជនជាតិអាមេរិកាំងម្នាក់តាមនាវានេះ ត្រូវបានអាជ្ញាធរម៉ាឡេស៊ីរកឃើញថា មានផ្ទុកមេរោគកូរ៉ូណាវីរុស បន្ទាប់ពីអ្នកដំណើរជាស្ត្រីវ័យ ៨៣ឆ្នាំរូបនោះ បានទៅដល់អាកាសយានដ្ឋានកូឡាឡាំពួរ នៅថ្ងៃសុក្រ។ ស្ត្រីរូបនេះ និងស្វាមី រួមទាំងអ្នកដំណើរប្រមាណ ៤០០នាក់ផ្សេងទៀត ដែលមន្ត្រីកម្ពុជាអះអាងថាមិនមានផ្ទុកមេរោគកូរ៉ូណាវីរុស បានចាកចេញពីនាវាទេសចរណ៍ Westerdam កាលពីថ្ងៃសុក្រ។ អ្នកខ្លះបានធ្វើដំណើរទៅកាន់ទីក្រុងភ្នំពេញ ហើយអ្នកខ្លះទៀត បានធ្វើដំណើរចេញពីប្រទេសកម្ពុជាឆ្ពោះទៅកាន់ប្រទេសផ្សេងទៀត ដែលជាគោលដៅវិលត្រឡប់របស់ពួកគេ។
កាលពីថ្ងៃចន្ទ រដ្ឋាភិបាលកម្ពុជា ដោយមានការសហការពីស្ថានទូតអាមេរិក បានបន្តពិនិត្យសុខភាពលើអ្នកដំណើរជិត ១.០០០នាក់ទៀតដែលបន្តស្នាក់នៅលើនាវា Westerdam ហើយបានសម្រេចមិនអនុញ្ញាតឲ្យអ្នកដំណើរទាំងនេះ ចាកចេញពីនាវានេះ រហូតដល់លទ្ធផលនៃការពិនិត្យសុខភាពអាចធានាថា ពួកគេមិនមានផ្ទុកមេរោគកូរ៉ូណាវីរុស។
នៅលើទំព័រហ្វេសប៊ុក លោកនាយករដ្ឋមន្ត្រី ហ៊ុន សែន ក៏បានបញ្ជាក់អំពីជំនួបរវាងលោក Patrick Murphy និងរូបលោកផ្ទាល់នៅថ្ងៃអង្គារនេះ ដោយបង្ហាញគោលជំហររបស់រដ្ឋាភិបាលកម្ពុជាក្នុងការជួយសម្រួលដល់អ្នកដំណើរលើនាវាទេសចរណ៍នេះជាបន្តទៀត «ដើម្បីបញ្ចៀសកុំឲ្យមានអ្វីដែលហៅថា វិបត្តិមនុស្សធម៌»៕
