ខណៈដែលរដ្ឋាភិបាលកម្ពុជា និងអ្នកគាំទ្រគណបក្សកាន់អំណាចមួយចំនួនបានរិះគន់ និងវាយប្រហារអាមេរិក ថាជាអ្នកស្ថិតនៅពីក្រោយគណបក្សប្រឆាំង ដើម្បីផ្តួលរំលំរដ្ឋាភិបាល នារសៀលថ្ងៃអង្គារនេះ ឯកអគ្គរដ្ឋទូតអាមេរិកប្រចាំកម្ពុជា បានធ្វើសេចក្តីថ្លែងការណ៍មួយ ដោយច្រានចោលការចោទប្រកាន់ទាំងនោះថាជាការចោទប្រកាន់ដែលប្រឌិតឡើងដោយគ្មានមូលដ្ឋាន និងខុសពីការពិតទាំងស្រុង។
ឯកអគ្គរដ្ឋទូតអាមេរិកប្រចាំកម្ពុជា បានច្រានចោលការចោទប្រកាន់ដែលថា សហរដ្ឋអាមេរិកបានគាំទ្រពីក្រោយគណបក្សប្រឆាំងដើម្បីផ្ដួលរំលំរដ្ឋាភិបាលកម្ពុជា ដោយថា«ជាការចោទប្រកាន់ដែលមិនមានភស្តុតាងច្បាស់លាស់ ឬមិនគួរឲ្យទុកចិត្ត»។
ក្នុងកិច្ចពិភាក្សាតុមូលជាមួយអ្នកសារព័ត៌មានកម្ពុជាមួយចំនួន នៅស្ថានទូតអាមេរិក នារសៀលថ្ងៃអង្គារនេះ លោក William Heidt ឯកអគ្គរដ្ឋទូតអាមេរិកប្រចាំនៅកម្ពុជា លើកឡើងថា លោកមានការភ្ញាក់ផ្អើល ដែលរដ្ឋាភិបាលកម្ពុជាបានចោទប្រកាន់សហរដ្ឋអាមេរិកថាជាអ្នកនៅពីក្រោយគណបក្សសង្គ្រោះជាតិ និងមេដឹកនាំបក្ស លោក កឹម សុខាដែលត្រូវបានចាប់ខ្លួនកាលពីដើមខែកញ្ញា ដោយត្រូវបានចោទថា «ក្បត់ជាតិ»។
លោកឯកអគ្គរដ្ឋទូតបានចាត់ទុកថា នេះជាការចោទប្រកាន់ដែលប្រឌិតឡើងដោយគ្មានមូលដ្ឋាន និងខុសពីការពិតទាំងស្រុង។
លោកបានថ្លែងថា៖ «រាល់ការចោទប្រកាន់ដែលលោកអ្នកឮ នៅក្នុងពេលប៉ុន្មានសប្ដាហ៍ថ្មីៗនេះ ស្ដីពីសហរដ្ឋអាមេរិក គឺសុទ្ធតែខុសទាំងអស់។ អត្ថបទនៅក្នុងសារព័ត៌មាននាថ្មីៗនេះស្ដីពីការចាប់ខ្លួនលោក កឹម សុខា ត្រូវបានគេសរសេរខុសទាំងស្រុង និងដោយចេតនា អំពីអ្វីដែលអាមេរិកកំពុងធ្វើនៅកម្ពុជា។ វាពិតជាការបង្វែរការយកចិត្តទុកដាក់ចេញពីបញ្ហាពិតប្រាកដមែន»។
ក្នុងរយៈពេលថ្មីៗនេះ ទាំងលោកនាយករដ្ឋមន្រ្តីហ៊ុន សែន មន្រ្តីរដ្ឋាភិបាល ព្រមទាំងអ្នកគាំទ្រគណបក្សកាន់អំណាចមួយចំនួន តែងវាយប្រហារអាមេរិក រឿងទម្លាក់គ្រាប់បែកនៅកម្ពុជា ក្នុងសង្គ្រាមអាមេរិកវៀតណាម និងថាអាមេរិកជាអ្នកនៅពីក្រោយគណបក្សប្រឆាំងដើម្បីផ្ដួលរំលំរដ្ឋាភិបាលរបស់លោក ហ៊ុន សែន ដែលកំពុងកាន់អំណាចអស់រយៈពេលជិត៤០ឆ្នាំ។
ក្នុងនោះ សារព័ត៌មាន Fresh News ដែលស្និទ្ធនឹងរដ្ឋាភិបាល តែងតែផ្សព្វផ្សាយអត្ថបទ ដែលវាយប្រហារជាបន្តបន្ទាប់លើលោក William Heidt ឯកអគ្គរដ្ឋទូតអាមេរិកប្រចាំកម្ពុជា។
លោក William Heidt បានបន្ថែមក្នុងកិច្ចពិភាក្សាតុមូលនោះថា លោកទទួលស្គាល់បញ្ហាពាក់ព័ន្ធនឹងការទម្លាក់គ្រាប់បែកលើប្រទេសកម្ពុជា។ លោកបញ្ជាក់ថា អាមេរិកបានប្តេជ្ញាចិត្តក្នុងការដោះស្រាយបញ្ហាទាំងនោះ តាមរយៈការផ្តល់ជំនួយសម្រាប់ការងារលុបបំបាត់យុទ្ធភណ្ឌមិនទាន់ផ្ទុះ។ លោកពន្យល់បន្ថែមថា ពាក់កណ្តាលនៃទឹកប្រាក់ជំនួយត្រូវបានប្រើសម្រាប់លុបបំបាត់យុទ្ធភណ្ឌដែលទម្លាក់ដោយយន្តហោះអាមេរិកនៅភាគខាងកើតនៃប្រទេសកម្ពុជា ហើយទឹកប្រាក់ពាក់កណ្តាលទៀត ត្រូវបានប្រើសម្រាប់ដោះមីនរបស់ចិន សូវៀត និងវៀតណាម នៅភាគខាងលិចនៃប្រទេសនៅតាមចម្ការមីន ដែលមានគ្រោះថ្នាក់១០ដងលើសគ្រាប់ដែលទម្លាក់ដោយអាមេរិក។
ពាក់ព័ន្ធនឹងព្រឹត្តិការណ៍នយោបាយនៅកម្ពុជាក្នុងរយៈពេលប៉ុន្មានខែចុងក្រោយនេះ លោក William Heidt បញ្ជាក់ថា មិនបានធ្វើឲ្យប៉ះពាល់ដល់រដ្ឋាភិបាលអាមេរិកនោះទេ ប៉ុន្ដែលោកថា វាបានបង្កតែផលវិបាកដល់ប្រទេសកម្ពុជា និងប្រជាពលរដ្ឋខ្មែរប៉ុណ្ណោះ។
លោកបន្ថែមថា អាមេរិកអំពាវនាវឲ្យរដ្ឋាភិបាលកម្ពុជាស្តារស្ថានភាពនយោបាយឡើងវិញ ដើម្បីធានាដល់ការបោះឆ្នោតជាតិនៅឆ្នាំខាងមុខ អាចទទួលយកបានទាំងមជ្ឈដ្ឋានជាតិ និងសហគមន៍អន្ដរជាតិ ។
លោកមានប្រសាសន៍ថា៖ «យើងសូមចូលរួមជាមួយសហភាពអឺរ៉ុប ក្នុងការទាមទារឲ្យដោះលែងលោក កឹម សុខា ជាបន្ទាន់។ ដំណើរការធម្មតារបស់ទីផ្សារសារព័ត៌មានកម្ពុជាក៏គួរទទួលបានការស្តារឡើងវិញផងដែរ។ ការដាក់សម្ពាធលើសង្គមស៊ីវិលគួរត្រូវបានបញ្ឈប់។ ហើយប្រហែលជាសំខាន់ជាងនេះទៅទៀតនោះ រដ្ឋាភិបាល បក្សប្រឆាំង និងសង្គមស៊ីវិលគួរតែចាប់ផ្តើមកិច្ចសន្ទនា អំពីអនាគតប្រជាធិបតេយ្យរបស់កម្ពុជាក្នុងបរិយាកាសបើកចំហរ គោរព និងគ្មានសម្ពាធ»។
ក្នុងវីដេអូឃ្លីបមួយដែលរដ្ឋាភិបាលសម្អាងជាភស្តុតាងចាប់ខ្លួនមេដឹកនាំបក្សប្រឆាំង លោក កឹម សុខា បានថ្លែងទៅកាន់អ្នកគាំទ្រក្នុងប្រទេសអូស្ត្រាលី កាលពីឆ្នាំ២០១៤ ថាយុទ្ធសាស្រ្តរបស់លោកមានការគាំទ្រដោយសហរដ្ឋអាមេរិក។ លោកថាយុទ្ធសាស្រ្តនោះ គឺ«ដើម្បីផ្លាស់ប្តូរមេដឹកនាំផ្តាច់ការ»។
លោក កឹម សុខា បន្តក្នុងវីដេអូឃ្លីបនោះថា អង្គការអាមេរិកបានហៅរូបលោកទៅសហរដ្ឋអាមេរិកដើម្បីសិក្សា និងបានផ្តល់យោបល់ឲ្យលោកឈប់ធ្វើនយោបាយមួយរយៈ និងបង្កើតអង្គការមួយកាលពីឆ្នាំ២០០២។
គណបក្សប្រឆាំងបានចាត់ទុកការចាប់ខ្លួន លោក កឹម សុខា ជារឿងនយោបាយ ហើយបានច្រានចោលការចោទប្រកាន់ថា គណបក្សមានទំនាក់ទំនងជាមួយសហរដ្ឋអាមេរិក ដើម្បីផ្តួលរំលំរដ្ឋាភិបាល។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្រ្តី ប្រាប់ VOA ថា ការថ្លែងរបស់លោក កឹម សុខា បង្ហាញថា សហរដ្ឋអាមេរិកជាអ្នកនៅពីក្រោយខ្នង និងជាអ្នកលូកដៃជ្រៀតជ្រែកចូលបញ្ហាលទ្ធិប្រជាធិបតេយ្យកម្ពុជា ដូច្នេះលោកថា កម្ពុជាគ្រាន់តែប្រើប្រាស់សិទ្ធិប្រឆាំងនឹងការលូកដៃចូលកិច្ចការផ្ទៃក្នុងរបស់កម្ពុជាប៉ុណ្ណោះ។ លោកបន្តថា ការថ្លែងរបស់ឯកអគ្គរដ្ឋទូតអាមេរិកប្រចាំកម្ពុជា គឺជាការបិទបាំងទង្វើជ្រៀតជ្រែកចូលអធិបតេយ្យរបស់កម្ពុជា។
លោកមានប្រសាសន៍ថា៖ «ការលើកឡើងហ្នឹងវាមិនឆ្លើយតបទៅនឹងអ្វីដែលកើតឡើងជាក់ស្តែងរបស់កម្ពុជា។ គឺជាយន្តការនយោបាយ ដើម្បីលាក់លៀមនូវការលូកដៃ និងជ្រៀតជ្រែកចូលក្នុងអធិបតេយ្យរបស់កម្ពុជា»។
ទោះជាយ៉ាងណា លោក ផៃ ស៊ីផាន ក៏បានសរសេរនៅលើហ្វេសប៊ុករបស់លោកនៅថ្ងៃអង្គារនេះដែរថា កម្ពុជានៅតែរក្សាកិច្ចសហការជាមួយរដ្ឋាភិបាលសហរដ្ឋអាមេរិក ជាមួយការគោរពផលប្រយោជន៍គ្នាទៅវិញទៅមក។
លោក William Heidt ឯកអគ្គរដ្ឋទូតអាមេរិកប្រចាំនៅកម្ពុជា បានលើកឡើងថា ចាប់តាំងពីបង្កើតស្ថានទូតអាមេរិកនៅកម្ពុជាឡើងវិញក្នុងឆ្នាំ១៩៩៤ រដ្ឋាភិបាលអាមេរិកមានគោលដៅសំខាន់ គឺដើម្បីស្ដារទំនាក់ទំនងការទូតប្រទេសទាំងពីរឡើងវិញ តាមរយៈការជួយអភិវឌ្ឍសេដ្ឋកិច្ច វិស័យអប់រំ សុខភាពសាធារណៈ និងជំរុញប្រព័ន្ធយុត្តិធម៌ និងលទ្ធិប្រជាធិបតេយ្យជាដើម៕
