អង្គការស្បៀងអាហារនិងកសិកម្មរបស់ អសប ឲ្យដឹងថា តម្លៃម្ហូបអាហារនៅក្នុងតំបន់អាស៊ីនៅតែមានតម្លៃខ្ពស់ ទោះជាមានការធ្លាក់បន្តិចនៅក្នុងខែមេសា។ ក្រុមមន្ត្រី អសប កំពុងអំពាវនាវដល់រដ្ឋាភិបាលឲ្យប្រុងប្រយ័ត្នជាមុនដើម្បីការពារអំពើទាំងឡាយដែលអាចនាំឲ្យអាហារឡើងថ្លៃ។
អង្គការស្បៀងអាហារនិងកសិកម្មរបស់ អសប ហៅកាត់ថា អង្គការ FAOឲ្យដឹងថាតម្លៃលក់រាយនៃស្រូវសាលីនិងអង្ករនៅក្នុងទ្វីបអាស៊ីបានចុះបន្តិចនៅក្នុងខែមេសា ជាការចុះថ្លៃដំបូងបង្អស់នៅក្នុងរយៈពេល៩ខែ។
អង្គការ FAO និយាយថាតម្លៃអង្ករ ដែលជាម្ហូបសំខាន់ជាងគេនៃទ្វីបអាស៊ី បានចុះចំនួន២ភាគរយនៅក្នុងប្រទេសកម្ពុជានិងសិរីលង្ការ ហើយនិងចុះប្រមាណកន្លះភាគរយនៅក្នុងប្រទេសបង់ក្លាដេស្ហ៍។
នៅក្នុងប្រទេសឥណ្ឌា តម្លៃស្រូវសាលីបានធ្លាក់ចុះ៧ភាគរយ។ ប៉ុន្តែ អង្គការ FAOបានកំណត់ថា ការធ្លាក់ចុះតម្លៃម្ហូបអាហារយ៉ាងសង្ខេបនេះ មកពីតម្លៃប្រេងឆៅបានចុះខ្លាំង។
ទោះជាមានការចុះថ្លៃនៅក្នុងតំបន់ខ្លះៗក៏ដោយ ក៏តម្លៃអង្ករចាប់តាំងពីមួយឆ្នាំកន្លងមក នៅតែមានតម្លៃខ្ពស់ដល់ទៅ២៩ភាគរយនៅក្នុងប្រទេសបង់ក្លាដេស្ហ៍ ២៥ភាគរយក្នុងប្រទេសចិន និង៤០ភាគរយនៅក្នុងប្រទេសវៀតណាមនិងប្រទេសលាវដែរ។
លោក Hiroyuki Konuma អ្នកតំណាងនៃអង្គការ FAOប្រចាំតំបន់អាស៊ី ប៉ាស៊ីហ្វិក បានមានប្រសាសន៍ប្រាប់ក្រុមអ្នកយកព័ត៌មានកាលពីថ្ងៃពុធថា តម្លៃម្ហូបអាហារនៅពាសពេញតំបន់នៅតែមានតម្លៃខ្ពស់ហើយកំពុងប៉ះពាល់ដល់ជនក្រីក្រយ៉ាងខ្លាំង។
«ដូច្នេះ ផលប៉ះពាល់អវិជ្ជមាននៃការឡើងថ្លៃលក់រាយនៃគ្រឿងទំនិញម្ហូបអាហារ ជាពិសេសអាហារសំខាន់ៗដូចជាអង្ករនិងស្រូវសាលីនោះ វាកំពុងប៉ះពាល់ដល់គ្រួសារក្រីក្រជាច្រើនដែលចំណាយទៅលើម្ហូបអាហារចំនួន ៧០ភាគរយនៃប្រាក់ចំណូលមួយថ្ងៃរបស់ពួកគេ»។
តម្លៃអាហារពិភពលោក ឡើងដល់អត្រាខ្ពស់ខ្លាំងនៅក្នុងខែកុម្ភះដោយមកពីតម្លៃប្រេងឆៅបានឡើងថ្លៃដោយសារមានអស្ថេរភាពនយោបាយ នៅក្នុងមជ្ឈឹមបូព៌ាប្រទេសនិងអាហ្វ្រិកខាងជើង។
តម្លៃប្រេងឥន្ធនះភ្ជាប់ទាក់ទងទៅនឹងតម្លៃម្ហូបអាហារយ៉ាងជិតស្និត តាមរយះការដឹកជញ្ជូននិងតម្លៃរៀបចំទុកដាក់ម្ហូប។
លោក Konuma ថ្លែងថា ប្រទេសទាំងឡាយចាំបាច់ត្រូវធ្វើការប្រុងប្រយ័ត្នមុនជាបន្ទាន់ដើម្បីការពារកុំឲ្យវិបត្តិម្ហូបអាហារឡើងថ្លៃដូចឆ្នាំ២០០៨ ត្រឡប់មកវិញម្តងទៀត នៅខណៈតម្លៃអាហារសំខាន់ខ្លះៗឡើងថ្លៃពីរដង ក្នុងរយះពេលប៉ុន្មានខែ។ លោកផ្តល់យោបល់ឲ្យប្រទេសនៅអាស៊ីបង្កើតវិធានការការពារសុវត្តិភាពសង្គមសម្រាប់ជនក្រីក្រនិងការបម្រុងអាហារទុកសម្រាប់ពេលអាសន្ន។
ប្រែសម្រួលដោយ នុច សារីតា
