ការិយាល័យសិទ្ធិមនុស្សអង្គការសហប្រជាជាតិបានអំពាវនាវកាលពីថ្ងៃអង្គារឱ្យមានការស៊ើបអង្កេតការវាយប្រហារតាមអាកាសរបស់អ៊ីស្រាអែលដែលបានសម្លាប់យ៉ាងតិចណាស់ក៏២២នាក់ដែរនៅក្នុងតំបន់ភាគខាងជើងប្រទេសលីបង់។
អ្នកនាំពាក្យការិយាល័យសិទ្ធិមនុស្សអង្គការសហប្រជាជាតិលោក Jeremy Laurence បានប្រាប់ពួកអ្នកយកព័ត៌មាននៅក្នុងទីក្រុងហ្សឺណែវប្រទេសស្វ៊ីសថាស្រ្តី១២នាក់និងកូនក្មេង២នាក់ស្ថិតនៅក្នុងចំណោមអ្នកដែលត្រូវបានសម្លាប់នៅក្នុងការវាយប្រហារកាលពីថ្ងៃចន្ទនៅក្នុងភូមិ Aito។
លោកបាននិយាយទៀតថា៖ «យើងយល់ថាវាជាអគារអ្នកស្រុករស់នៅកម្ពស់៤ជាន់ដែលត្រូវបានវាយប្រហារ។ ដោយសារកត្តាទាំងនោះនៅក្នុងគំនិត យើងមានការបារម្ភពិតប្រាកដទាក់ទិននឹងច្បាប់មនុស្សធម៌អន្តរជាតិ ក៏ដូចជាច្បាប់សង្គ្រាមនិងគោលការណ៍ នៃភាពខុសគ្នានៃសមាមាត្រ»។
យោធាអ៊ីស្រាអែលបាននិយាយកាលពីថ្ងៃអង្គារថាស៊ីរ៉ែនបន្លឺតាមអាកាសបានបន្លឺឡើងនៅក្នុងតំបន់ Haifa ខណៈដែលប្រព័ន្ធការពារដែនអាកាសអ៊ីស្រាអែលបានបាញ់ស្ទាក់ការបាញ់ជាច្រើនដែលបានឆ្លងចូលក្នុងប្រទេសអ៊ីស្រាអែលមកពីប្រទេសលីបង់។
កងកម្លាំងការពារជាតិអ៊ីស្រាអែលក៏បានរាយការណ៍ដែរកាលពីថ្ងៃអង្គារពីការសម្លាប់ពួកសកម្មប្រយុទ្ធរាប់សិបនាក់នៅក្នុងការវាយប្រហារតាមអាកាសប្រឆាំងនឹងទីដៅរបស់ក្រុម Hezbollahក្នុងតំបន់ភាគខាងត្បូងប្រទេសលីបង់។
នាយករដ្ឋមន្ត្រីអ៊ីស្រាអែលលោក Benjamin Netanyahuបានសន្យាកាលពីថ្ងៃចន្ទថាអ៊ីស្រាអែលនឹង«បន្តវាយប្រហារក្រុមHezbollah ដោយមិនមានក្តីមេត្តាក្នុងផ្នែកទាំងអស់នៃប្រទេសលីបង់ រួមទាំងទីក្រុងបេរុតផង»។
លោកNetanyahuបានប្រាប់ប្រធានាធិបតីសហរដ្ឋអាមេរិកលោក Joe Biden ថាការវាយប្រហារសងសឹករបស់អ៊ីស្រាអែល នឹងដៅលើទីដៅយោធាតែប៉ុណ្ណោះ ហើយមិនមែនលើរោងចក្រប្រេងឬនុយក្លេអ៊ែរទេ។ នេះបើតាមពួកមន្ត្រីសហរដ្ឋអាមេរិក។
កាសែត Washington Post និងWall Street Journal បានដកស្រង់សម្តីពួកមន្ត្រីដែលកាសែតទាំង២បានរាយការណ៍កាលពីយប់ថ្ងៃចន្ទថាលោកNetanyahuបានធ្វើការសន្យាក្នុងអំឡុងនៃការនិយាយតាមទូរសព្ទរវាងមេដឹកនាំទាំង២កាលពីសប្តាហ៍មុន៕
វេទិកាបញ្ចេញមតិ