កុមារម្នាក់ក្នុងចំណោមកុមារ៥នាក់ក្នុងប្រទេសអ៊ីរ៉ាក់បច្ចុប្បន្ននេះ ប្រឈមនឹងការស្លាប់ របួស ហិង្សាផ្លូវភេទ ការចាប់ពង្រត់ និងការបង្ខំឲ្យចូលរួមក្នុងក្រុមប្រដាប់អាវុធ។ នេះបើយោងតាមទីភ្នាក់ងារទទួលបន្ទុកខាងកុមាររបស់អង្គការសហប្រជាជាតិ។
«កុមារក្នុងប្រទេសអ៊ីរ៉ាក់ប្រឈមនឹងការបាញ់បោះ និងកំពុងត្រូវបានគេចាត់ទុកជាមុខសញ្ញា»។ នេះបើយោងតាមសម្តីរបស់លោក Peter Hawkins អ្នកតំណាងអង្គការ UNICEF ប្រចាំប្រទេសអ៊ីរ៉ាក់។
យោងតាមរបាយការណ៍ចុងក្រោយបំផុតរបស់អង្គការ UNICEF ក្នុងរយៈពេល២ឆ្នាំកន្លះមុននេះ ក្នុងមួយខែ កុមារប្រមាណចំនួន៥០នាក់ត្រូវបានចាប់ពង្រត់និងបង្ខំឲ្យប្រយុទ្ធឬត្រូវបានបំពានផ្លូវភេទ។
កុមារា Aziz ដែលនេះមិនមែនឈ្មោះពិតទេ វ័យ១១ឆ្នាំ ត្រូវបានក្រុមប្រដាប់អាវុធចាប់ពង្រត់នៅប៉ែកខាងជើងប្រទេសអ៊ីរ៉ាក់កាលពីពាក់កណ្តាលឆ្នាំ២០១៤។
កុមារារូបនេះបាននិយាយនៅក្នុងវីដេអូមួយដែលផ្តល់ដោយអង្គការ UNICEF ថា «ពួកគេបានមកដល់ដោយជិះរថយន្តដឹកទំនិញធំមួយគ្រឿង។ នៅក្នុងរថយន្តនោះមានបុរសជាច្រើននាក់ដែលប្រដាប់ដោយកាំភ្លើងស្វ័យប្រវត្តិ។ ពួកគេមានពុកមាត់និងសក់វែង»។
កុមារារូបនេះត្រូវបានបង្ខំឲ្យរៀនសូត្រអំពីសាសនា រៀនប្រើប្រាស់អាវុធ និងបង្ខំឲ្យមើលវីដេអូអំពីហិង្សាធ្ងន់ធ្ងរដោយប្រព្រឹត្តដោយអ្នកចាប់ខ្លួនពួកគេទៅលើជនស៊ីវិល។
យោងតាមរបាយការណ៍នោះ កុមារអ៊ីរ៉ាក់ជិត១០ភាគរយ ដែលស្មើនឹងជាង១លាន៥សែននាក់ ត្រូវបានបង្ខំឲ្យរត់គេចចេញពីផ្ទះសម្បែងរបស់ពួកគេ ដោយសារតែអំពើហិង្សាដែលបានកើតឡើងតាំងពីដើមឆ្នាំ២០១៤៕
