មន្ត្រីសិទ្ធិមនុស្សកំពូលរបស់អង្គការសហប្រជាជាតិបានហៅការបង្ក្រាបទៅលើជនជាតិភាគតិចរ៉ូហ៊ីងយ៉ានៅក្នុងប្រទេសមីយ៉ាន់ម៉ាថាជា «ការពាក់ស្លាកប្រល័យពូជសាសន៍» បន្ទាប់ពីរបាយការណ៍ថ្មីមួយបានចោទប្រកាន់ពីការសាងសង់មូលដ្ឋានយោធាមីយ៉ាន់ម៉ានៅក្នុងភូមិរបស់ជនជាតិរ៉ូហ៊ីងយ៉ាធ្លាប់តាំងទៅលំនៅ។
លោកស្រី Yanghee Lee អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅក្នុងប្រទេសមីយ៉ាន់ម៉ា បានប្រើប្រាស់ភាសាខ្លាំងបំផុតរបស់លោកស្រី ពណ៌នាអំពីស្ថានភាពនៅក្នុងរដ្ឋRakhine ភាគខាងជើងប្រទេសមីយ៉ាន់ម៉ា ទៅកាន់ក្រុមប្រឹក្សាសិទ្ធិមនុស្សរបស់អង្គការសហប្រជាជាតិកាលពីថ្ងៃចន្ទនៅក្នុងទីក្រុងហ្សឺណែវ។
លោកស្រីបានថ្លែងថា «ខ្ញុំកាន់តែជឿថាឧក្រិដ្ឋកម្មដែលបានប្រព្រឹត្តឡើងក្រោយថ្ងៃទី៩ ខែតុលា ឆ្នាំ២០១៦ និងក្រោយថ្ងៃទី២៥ ខែសីហា ឆ្នាំ២០១៧បានធ្វើឲ្យមីយ៉ាន់ម៉ាពាក់ស្លាកប្រល័យពូជសាសន៍ ហើយលោកស្រីបានអំពាវនាវដោយលក្ខខ័ណ្ឌខ្លាំងក្លាបំផុតសុំឲ្យមានការទទួលខុសត្រូវទៅលើទង្វើទាំងនេះ»។
អង្គការសហប្រជាជាតិបានប្រើប្រាស់ពាក្យថា «បោសសម្អាតពូជសាសន៍» ពណ៌នាអំពីការបង្ក្រាបរបស់យោធាមីយ៉ាន់ម៉ាទៅលើជនជាតិរ៉ូហ៊ីងយ៉ាកាន់សាសនាឥស្លាមចំនួន៧សែននាក់ ដែលត្រូវបានបង្ខំឲ្យភៀសខ្លួនទៅក្នុងប្រទេសបង់ក្លាដែស។
ទាហានមីយ៉ាន់ម៉ាត្រូវបានចោទប្រកាន់ថាបានប្រហារជីវិតមនុស្ស ចាប់រំលោភ និងដុតបំផ្លាញភូមិរបស់ជនជាតិរូហ៊ីងយ៉ា ជាការឆ្លើយតបទៅនឹងការសកម្មភាពរបស់ពួកបះបោររ៉ូហ៊ីងយ៉ា៕
