ការិយាល័យរបស់អង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម ឬហៅកាត់ថា UNODC បាននិយាយថា បរិមាណផលិតផលអាភៀននៅប្រទេសអាហ្វហ្គានីស្ថានក្នុងឆ្នាំនេះបានធ្លាក់ចុះ៤៨%។
លោក Andrey Avetisyan តំណាងប្រចាំតំបន់របស់បេសកកម្មអង្គការសហប្រជាជាតិប្រឆាំងគ្រឿងញៀនបាននិយាយថា ការធ្លាក់ចុះយ៉ាងខ្លាំងនៃផលិតផលអាភៀនគឺដោយសារតែការរួមសហការល្អពីកងសមត្ថកិច្ច និងអ្នកធ្វើគោលនយោបាយរបស់ប្រទេសអាហ្វហ្គានីស្ថាន។
លោកបាននិយាយថា ក្នុងរយៈពេលប៉ុន្មានឆ្នាំមកនេះ មានការធ្លាក់ចុះយ៉ាងខ្លាំងនូវការដាំ និងការផលិតអាភៀនក្នុងប្រទេសនេះ។
«មានការធ្លាក់ចុះយ៉ាងសំបើមនូវសក្ដានុពលផលិតផលអាភៀនដល់៤៨%។ យើងមានអាភៀន ត្រឹមតែ៣.៣០០តោនប៉ុណ្ណោះក្នុងឆ្នាំនេះ ធៀបនឹងឆ្នាំមុនគឺ ៦.៤០០តោន»។
លោក Avetisyan បានប្រាប់អ្នកកាសែតថា ការដាំអាភៀនក្នុងឆ្នាំ២០១៥ក៏បានធ្លាក់ចុះ១៩%នៅទូទាំងប្រទេស ប៉ុន្តែវាបានកើនឡើងនៅតំបន់ភាគខាងជើងប្រទេសអាហ្វហ្គានីស្ថាន ដោយសារតែមានបញ្ហាអសន្តិសុខនៅកន្លែងខ្លះ។
ការស្ទង់មតិបានបង្ហាញថា មានការធ្លាក់ចុះ១៦% នៅខេត្ត Helmand ដែលជាកន្លែងផលិតអាភៀនធំជាងគេនៅខេត្តភាគខាងត្បួងប្រទេសនេះ ហើយមានការធ្លាក់ចុះទាំងនៅតំបន់ខាងត្បូង និងខាងកើតប្រទេសដែលគេស្គាល់ថាជាតំបន់ផលិតគ្រឿងញៀនខុសច្បាប់។
ទោះបីជាមានការធ្លាក់ចុះបែបនេះក៏ដោយ ក៏បញ្ហាគ្រឿងញៀននៅក្នុងប្រទេសអាហ្វហ្គានីស្ថាននៅតែជាបញ្ហាដ៏ធំមួយ ហើយជោគជ័យក្នុងការដោះស្រាយវា ត្រូវការ ការសហការយ៉ាងជិតស្និទ្ធពីសំណាក់រដ្ឋាភិបាល និងសហគមន៍អន្តរជាតិ។
លោក Avetisyan និយាយថា៖ «យើងមិនគួរមើលស្រាល ការប្រឈមនានាដើម្បីបញ្ឈប់ការដាំអាភៀនក្នុងប្រទេសអាហ្វហ្គានីស្ថាន និងការពាក់ព័ន្ធរបស់វាជាមួយបញ្ហាសន្តិសុខ និងការអភិវឌ្ឍដែលជាបញ្ហាដ៏ធំមួយនោះទេ។ បញ្ហាប្រឈមនេះនឹងត្រូវការ ការតាំងចិត្ត និងការសហការយ៉ាងខ្លាំងពីបណ្ដាភាគីពាក់ព័ន្ធដើម្បីមើលឲ្យគ្រប់ជ្រុងជ្រោយក្នុងការប្រយុទ្ធប្រឆាំងផលិតកម្មគ្រឿងញៀនខុសច្បាប់»។
ការិយាល័យ UNODC បានគូសបញ្ជាក់ថា ប្រសិទ្ធភាពនៃការពង្រឹងសមត្ថកិច្ច ការធ្វើឲ្យសេវាមណ្ឌលកែប្រែប្រសើរឡើង និងការផ្សព្វផ្សាយ ការរិះរកប្រភពសេដ្ឋកិច្ចផ្សេងដល់កសិករអាហ្វហ្គានីស្ថានទាំងអស់នេះគឺជាផ្នែកសំខាន់នៃយុទ្ធសាស្ត្រគ្រប់ជ្រុងជ្រោយ (ទូលំទូលាយ) នេះ។
ប្រទេសអាហ្វហ្គានីស្ថានផលិតអាភៀនជាង៨០%នៃផលិតផលអាភៀនសរុបក្នុងពិភពលោក ហើយកម្រៃពីការជួញដូរគ្រឿងញៀនខុសច្បាប់នេះត្រូវបានគេជឿថា ជាហិរញ្ញវត្ថុសំខាន់ដែលបានផ្ដល់ឲ្យក្រុមសកម្មប្រយុទ្ធតាលីបង់ និងជំរុញឲ្យមានអំពើពុករលួយ ក្នុងប្រទេសនេះ៕
ប្រែសម្រួលដោយ មាន ឥស្សរាយស
