អង្គការការពារសិទ្ធិមនុស្សលីកាដូ បានឲ្យដឹងថា មានប្រជាពលរដ្ឋជាង ៧.០០០ នាក់បានចូលរួមប្រារព្ធទិវាសិទ្ធិនារីអន្តរជាតិ ៨ មីនា ឆ្នាំ ២០១៨។ ក្នុងឱកាសប្រារព្ធទិវាសាកលនេះ ប្រេសិតពិសេសរបស់អ.ស.ប ទទួលបន្ទុកសិទ្ធិមនុស្សនៅកម្ពុជាអ្នកស្រី រ៉ូណា ស្មីត បានអំពាវនាវសូមឲ្យបញ្ឈប់ការបំភិតបំភ័យ និងការយាយីរំខានដល់ស្រ្តីជនជាតិដើមភាគតិច សកម្មជនបរិស្ថាន និងសកម្មជនដីធ្លី។ តាមការបញ្ជាក់របស់អង្គការការពារសិទ្ធិមនុស្សបានឲ្យដឹងថា មានការរារាំងមិនឲ្យរៀបចំទិវានេះ នៅក្នុងសហគមន៍មួយក្នុងខេត្តត្បូងឃ្មុំ។
ក្នុងថ្ងៃទីបួននៃដំណើរការស្វែងយល់អំពីស្ថានភាពសិទ្ធិមនុស្ស និងនយោបាយនៅកម្ពុជា អ្នកស្រី រ៉ូណា ស្មីត (Rhona Smith) ប្រេសិតពិសេសរបស់អង្គការសហប្រជាជាតិ (អ.ស.ប) ទទួលបន្ទុកសិទ្ធិមនុស្សនៅកម្ពុជា បានអំពាវនាវឲ្យមានការបញ្ឈប់ការរំលោភបំពានសិទ្ធិរបស់អ្នកតស៊ូមតិ និងយាយីដល់សិទ្ធិរបស់ជនជាតិដើមភាគតិច។
តាមព័ត៌មានដែលបានបង្ហោះលើគណនីហ្វេសប៊ុករបស់ការិយាល័យឧត្ដមស្នងការអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា (OHCHR) បានឲ្យដឹងក្នុងន័យដើមថា៖
«ក្នុងឱកាសប្រារព្ធទិវាសិទ្ធិនារី អ្នករាយការណ៍ពិសេសស្តីពីកម្ពុជា សាស្រ្តាចារ្យ រ៉ូណា ស្មីត បាន អំពាវនាវសូមឲ្យបញ្ឈប់ការបំភិតបំភ័យ និងការយាយីរំខានដល់ស្រ្តីជនជាតិដើមភាគតិច សកម្មជនបរិស្ថាន និងសកម្មជនដីធ្លី។ សូមក្រោកឈរដើម្បីសិទិ្ធមនុស្ស និងអ្នកការពារសិទិ្ធមនុស្សគ្រប់រូបនៅកម្ពុជា»។
ការអំពាវនាវរបស់អ្នកស្រី ស្មីត បានធ្វើឡើងនៅចំពេលដែលប្រទេសកម្ពុជា បានប្រារព្ធទិវាសិទ្ធិនារីអន្តរជាតិ ៨ មីនា ឆ្នាំ ២០១៨ និងនៅពេលមានសេចក្តីរាយការណ៍អំពីការរារាំងរបស់អាជ្ញាធរមិនឲ្យប្រជាពលរដ្ឋនៅតាមសហគមន៍មួយជួបជុំគ្នាប្រារព្ធទិវាអន្តរជាតិនេះ។
តាមការបញ្ជាក់របស់អង្គការការពារសិទ្ធិមនុស្សលីកាដូបានឲ្យដឹងថា មានប្រជាពលរដ្ឋដែលជាសមាជិកសហគមន៍ សហជីព និងនៅតាមមូលដ្ឋានប្រមាណជាង ៧.០០០ នាក់បានចូលរួមប្រារព្ធទិវាសាកលនេះ នៅក្នុងខេត្តយ៉ាងហោចណាស់ចំនួនបួន និងនៅទីតាំងផ្សេងៗនៅក្នុងរាជធានីភ្នំពេញ។
អង្គការការពារសិទ្ធិមនុស្សនេះ បានឲ្យដឹងតាមឲ្យដឹងតាមគេហទំព័ររបស់ខ្លួនថា ខ្លួនមានការគ្រោងរៀបចំទិវានេះ នៅក្នុងសហគមន៍មួយស្ថិតក្នុងខេត្តត្បូងឃ្មុំ តែត្រូវបានបញ្ឈប់ដោយប៉ូលិស និងអាជ្ញាធរមូលដ្ឋាន។
លោក ផុន សុផល ប្រធានសហគមន៍ជាំក្រវៀន បានប្រាប់ VOA នៅថ្ងៃព្រហស្បតិ៍នេះថា សហគមន៍របស់លោកដែលស្ថិតក្នុងស្រុកមេមត់ ឃុំជាំក្រវៀន ខេត្តត្បូងឃ្មុំ ដើមឡើយបានសុំការអនុញ្ញាតពីមេឃុំ និងចៅហ្វាយស្រុករួចហើយ តែមកដល់ថ្ងៃប្រារព្ធទិវាសិទ្ធិនារីនេះ ស្រាប់តែមានអាជ្ញាធរជិត១០នាក់មករារាំងមិនឲ្យដំណើរការការរៀបចំទិវានេះ។ លោកនិយាយថា៖
«ហើយយើងក៏មានលិខិតអញ្ជើញទៅ កិច្ចការនារីស្រុក អញ្ជើញលោក មេឃុំ និងអភិបាលស្រុកឲ្យចូលរួមដើម្បីបើកកម្មវិធីហ្នឹងដែរ ប៉ុន្តែមិនដឹងថា ម៉េចបានជា អីចឹងទេ? យើងចង់សួរមូលហេតុថា មូលហេតុអីបានគាត់មកឃាត់យើង ប៉ុន្តែគាត់នៅតែនិយាយថា ដោយសារតែយើងអត់មានលក្ខខណ្ឌ»។
លោកបានបញ្ជាក់បន្ថែមថា ការហាមឃាត់នេះ បានធ្វើឡើងបន្ទាប់ពីខាងអាជ្ញាធរឃុំ ជាំក្រវៀនបានរៀបចំពិធីស្រដៀងគ្នានេះ តែគ្មានអ្នកចូលរួម។ យ៉ាងណាក៏ដោយ លោកថា ការហាមឃាត់នេះ ស្តែងឲ្យឃើញពីការរឹតត្បិតសិទ្ធិជួបជុំរបស់ប្រជាពលរដ្ឋ។
VOA មិនអាចសុំការអធិប្បាយពី លោក អ៊ូច យឺន មេឃុំជាំក្រវៀន និងលោក ចេង ប៊ុនរ៉ា អភិបាលស្រុកមេមត់ បានទេនៅថ្ងៃព្រហស្បតិ៍នេះ។
ក្នុងថ្ងៃនៃការប្រារព្ធទិវាសិទ្ធិនារីអន្តរជាតិនេះ ក៏មានប្រជាពលរដ្ឋមួយចំនួនបានចេញតវ៉ា ទាមទាររកដំណោះស្រាយសម្រាប់ទំនាស់ដីធ្លីរបស់ពួកគេផងដែរ។
អ្នកស្រី ផាវ ញឺង តំណាងប្រជាពលរដ្ឋមានទំនាស់ដីធ្លីជាមួយក្រុមហ៊ុនស្ករអំពៅនៅខេត្តកោះកុង បានថ្លែងថា៖
«ដោយសារតែពួកខ្ញុំបាត់បង់សិទ្ធិជាស្ត្រីមេផ្ទះ ដែលមិនបានរកស៊ី មិនបានធ្វើការងារនៅផ្ទះដោយសារតែបាត់បង់ដីធ្លី មានការរំលោភយកពីក្រុមហ៊ុនស្ករអំពៅហ្នឹង ពួកខ្ញុំមកតវ៉ានៅហ្នឹង»។
អ្នកស្រី ផាវ ញឺង តំណាងប្រជាពលរដ្ឋជាង ១៧០ គ្រួសារ កំពុងស្វែងរកដំណោះស្រាយលើវិវាទដីធ្លីជាមួយក្រុមហ៊ុនស្ករអំពៅ ដែលធ្លាប់កាន់កាប់ដោយលោក លី យ៉ុងផាត់ សមាជិកព្រឹទ្ធសភាគណបក្សប្រជាជនកម្ពុជា។
សកម្មជនដីធ្លីនិងពលរដ្ឋដែលរងការរំលោភបំពានដីធ្លីមួយចំនួនត្រូវគេរាយការណ៍មកថា ត្រូវចាប់ដាក់គុក រងការវាយប្រហារពីអាជ្ញាធរ ដែលការពារទ្រព្យសម្បត្តិ ដីធ្លីរបស់អ្នកមានអំណាចនិងក្រុមហ៊ុនជាដើម៕
