ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​ជំនាញ​អ.ស.ប៖ ការ​កំណត់​កាតព្វ​កិច្ច​​ចាក់​​វ៉ាក់​​សាំង​​​​កូវីដ​​១៩​មិន​ស្រប​តាម​បទដ្ឋាន​សិទ្ធិ​មនុស្ស​អន្តរ​ជាតិ


រូបឯការ៖ គិលានុបដ្ឋាយិកាម្នាក់កំពុងចាក់វ៉ាក់សាំងបង្ការជំងឺកូវីដ១៩ របស់ក្រុមហ៊ុនចិន Sinopharm ដល់អ្នកស្ម័គ្រចិត្តទទួលវ៉ាក់សាំងនេះ នៅមន្ទីរពេទ្យកាល់ម៉ែត្រ រាជធានីភ្នំពេញ កាលពីថ្ងៃពុធ ទី១០ ខែកុម្ភៈ ឆ្នាំ២០២១។

អ្នក​ជំនាញ​របស់​អង្គការ​សហ​ប្រជាជាតិ​(អ.ស.ប) ដែល​ឃ្លាំ​មើល​ស្ថានភាព​នានា​នៅ​កម្ពុជា បាន​បង្ហាញ​ក្តី​ព្រួយបារម្ភអំពីការកំណត់​ឲ្យ​ប្រជា​ពលរដ្ឋចាក់​វ៉ាក់​សាំងបង្ការ​ជំងឺ​កូវីដ​១៩ ដោយថា​វា​ជា​ការ​បំពាន​សិទ្ធិ​សុខ​ភាព​ ដែល​កម្ពុជាបាន​ផ្តល់​សច្ចាប័ន។

អ្នក​ជំនាញ​ទាំង​នោះ ​រួម​មានអ្នកស្រី រ៉ូណា ស្មីត (Rhona Smith) ដែល​កាល​នោះ​ជាអ្នក​រាយ​ការណ៍​ពិសេស​ស្តី​ពី​ស្ថាន​ភាព​សិទ្ធិ​មនុស្ស​នៅ​កម្ពុជា និង​អ្នកស្រី​ ត្លាលេង ម៉ូហ្វូកេង ​(Tlaleng Mofokeng) អ្នក​រាយការណ៍​ពិសេស​ស្តី​ពី​សិទ្ធិជន​គ្រប់​រូប​ក្នុង​ការ​ទទួល​បាន​កម្រិត​ជីវភាព​រស់​នៅ​ខ្ពស់​បំផុត​ផ្នែក​សុខភាព​ផ្លូវកាយ និង​សុខភាព​ផ្លូវចិត្ត។អ្នក​ជំនាញ​ទាំងពីរ​នាក់​បាន​ដាក់​លិខិតមួយ​ច្បាប់​ចុះ​ថ្ងៃ​ទី​៤ ខែឧសភា ឆ្នាំ​២០២១ ទៅ​រដ្ឋាភិបាលកម្ពុជា ដោយ​រិះគន់​អនុក្រឹត្យស្តី​ពី​កាតព្វកិច្ច​ក្នុង​ការ​ទទួល​ការ​ចាក់វ៉ាក់​សាំង​កា​រពារ​ជំងឺ​កូវីដ​១៩ ដែលលោក​នាយករដ្ឋមន្រ្តី ហ៊ុន សែន បាន​អនុម័ត​កាល​ពី​ថ្ងៃ​ទី​១១ ខែ​មេសា ឆ្នាំ​២០២១។

បើ​តាម​សេចក្តីប្រកាស​ព័ត៌មានរបស់ការិយាល័យ​ឧត្តម​ស្នង​ការ​អង្គការ​សហ​ប្រជាជាតិទទួល​បន្ទុក​សិទ្ធិ​មនុស្ស​ប្រចាំនៅ​កម្ពុជា (OHCHR) ក្រុម​អ្នក​ជំនាញ​បាន​សម្តែង​កង្វល់​ចំពោះ​មាត្រា​៣​នៃ​អនុ​ក្រឹត្យ​នេះ ដែល​ចែង​អំពីកាតព្វកិច្ច​ក្នុង​ការ​ទទួលការ​ចាក់​វ៉ាក់សាំង​ការពារ​ជំងឺ​កូវីដ​១៩ សម្រាប់មន្ត្រី​រាជ​ការ កង​កម្លាំងប្រដាប់​អាវុធ​គ្រប់​ប្រភេទ ពលរដ្ឋ​ទទួល​អាណត្តិ​សាធារណៈ​តាម​រយៈ​ការ​បោះ​ឆ្នោត​ ចៅក្រម ​ព្រះ​រាជ​អាជ្ញា និង​មន្រ្តី​ដទៃ​ទៀត​នៅ​ក្នុង​ស្ថាប័ន​តុលា​ការ។

ពួកគេ​បាន​រិះគន់​ការ​កំណត់​នៅ​ក្នុង​មាត្រា​៥​នៃ​អនុ​ក្រឹត្យ​នេះ ដែលចែង​ថាអ្នក​ដែល​គេចវេះពីការចាក់​វ៉ាក់សាំង នឹងទទួល​ការ​ព្រមាន​ និង​ការស្តី​បន្ទោស​ពី​ស្ថាប័ន​សាមីរបស់ខ្លួន។ ហើយ​ក្នុង​ករណីមាន​ការ​ខក​ខាន​ម្តង​ហើយ​ម្តង​ទៀត ស្ថាប័នពាក់ព័ន្ធ​អាច​ដាក់​វិន័យផ្សេង​ទៀត ដោយ​យោងតាម​ច្បាប់ និង​បទបញ្ញត្តិជា​ធរមាន។

រូបឯកសារ៖ លោកស្រី រ៉ូណា ស្មីត​ (Rhona Smith) អតីត​អ្នករាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា ថ្លែងទៅកាន់អ្នកសារព័ត៌មាននៅក្នុងសន្និសីទសារព័ត៌មានមួយ នៅរាជធានីភ្នំពេញ ថ្ងៃទី៩ ខែឧសភា ឆ្នាំ២០១៩។
រូបឯកសារ៖ លោកស្រី រ៉ូណា ស្មីត​ (Rhona Smith) អតីត​អ្នករាយការណ៍​ពិសេស​របស់​អង្គការ​សហប្រជាជាតិ​ទទួល​បន្ទុក​សិទ្ធិ​មនុស្ស​នៅ​កម្ពុជា ថ្លែងទៅកាន់អ្នកសារព័ត៌មាននៅក្នុងសន្និសីទសារព័ត៌មានមួយ នៅរាជធានីភ្នំពេញ ថ្ងៃទី៩ ខែឧសភា ឆ្នាំ២០១៩។

ក្រុម​អ្នក​ជំនាញ​របស់​អង្គការ​សហ​ប្រជាជាតិបាន​សង្កត់​ធ្ងន់​ថា​អនុ​ក្រឹត្យស្ដី​ពី​កាតព្វកិច្ច​ក្នុង​ការ​ទទួល​ការ​ចាក់​វ៉ាក់សាំ​ង «អាចមាន​លក្ខណៈ​ផ្ទុយ​នឹងបទបញ្ញត្តិ​នៃ​លិខិតុបករណ៍​សិទ្ធិ​មនុស្ស​អន្តរ​ជាតិ ជាពិសេស​កតិកាសញ្ញាអន្តរជាតិ​ស្តីពី​សិទ្ធិ​សេដ្ឋកិច្ច សង្គម​កិច្ច និង​វប្បធម៌ ដែល​ហៅ​កាត់​ថា​(ICESCR)» ដែល​កម្ពុជា​ជារដ្ឋ​ភាគី ហើយ​ជា​ពិសេសសិទ្ធិសុខភាព ត្រង់​មាត្រា១២នៃកតិកា​សញ្ញា​នេះ។

ក្រុម​អ្នក​ជំនាញ​អ.ស.ប ស្នើយ៉ាង​ទទូច​ដល់​រដ្ឋាភិបាលឲ្យ​ពិចារណា​លុប​ចោល​អនុ​ក្រឹត្យ​នេះ ឬ​ចាត់​វិធាន​ការ​ផ្សេងៗ​ ដើម្បី​ធានា​ភាព​ស្របគ្នា​ជាមួយ​បទដ្ឋាន​សិទ្ធិមនុស្ស​អន្តរ​ជាតិ។

ការ​ដាក់​ចេញ​អនុក្រឹត្យ​ដែល​រង​ការ​រិះគន់​ពី​អ្នក​ជំនាញ​សិទ្ធិ​មនុស្ស​អង្គការ​សហប្រជាជាតិ​នេះ បន្ទាប់​ពី​មាន​ការ​ព្រមាន​ពី​លោក​នាយក​រដ្ឋមន្រ្តី ហ៊ុន សែន នៅ​ក្នុង​សារ​ជា​សាធារណៈ​មួយ ក្រោយ​កម្ពុជា​ទទួល​បាន​វ៉ាក់សាំង​ជា​បន្ត​បន្ទាប់ ដែល​ជា​ជំនួយ​របស់​ចិន។

កាល​ពី​ដើម​ខែ​កក្កដា លោកនាយក​រដ្ឋមន្រ្តី​ ហ៊ុន សែន បាន​ថ្លែង​ថា​ការចាក់​វ៉ាក់​សាំង​បង្ការ​ជំងឺកូវីដ​១៩​នេះ ជា«កេរមរតក»​នយោបាយ​របស់​លោក​ ហើយ​រដ្ឋាភិបាល​បាន​ប្រើប្រាស់​យុទ្ធសាស្រ្ត​ពឹង​ផ្នែក​លើ​វ៉ាក់សាំង​របស់​ចិន ដោយ​មិន​រង់ចាំ​វ៉ាក់សាំង​ពី​ប្រទេស​ណា​នោះ​ទេ។

លោក​បន្ថែម​ថា​អ្នក​ដែល​មិន​ចាក់​វ៉ាក់សាំង ដែល​លោក​ថា​ជឿ​តាម​ការ​ញុះញង់​របស់​អ្នក​ផ្សេង នឹង​ក្លាយ​ជា​«មនុស្ស​ឯកា​»នៅ​ពេល​ប្រជាពលរដ្ឋ​ភាគ​ច្រើន​ចាក់​វ៉ាក់សាំង។

លោក​បន្ថែម​ថា៖ «អញ្ចឹង​បាន​មាន​បង​ប្អូន​ខ្លះ​ទៅ​ចាក់​វ៉ាក់សាំង ថា​ចលនា​ឲ្យ​មក​ចាក់​វ៉ាក់សាំង។ ខ្ញុំ​ថា​មិន​បាច់​ចលនា​ទេ។ អា​អ្នក​ដែល​មិន​មក​ចាក់ ឲ្យ​វា​មិន​មក​ចាក់​ហី​ទៅ។ កុំ​ឲ្យ​គេ​ថា​យើង​ទៅ​រំលោភ​គេ។ ប៉ុន្តែ​លទ្ធផល​ចុង​ក្រោយ អ្នក​ឯង​នឹង​បាន​ឃើញ​នៅ​ត្រង់​ថា​នៅ​ក្នុង​បន្ទប់​១០​នាក់ ៩​នាក់​គេ​ចាក់ អ្នក​ឯង​អត់​ម្នាក់​ចាក់ គឺ​ទើស​ទាល់​គេ គេ​អត់​នៅ​ជា​មួយ»។

លោក ផៃ ​ស៊ី​ផាន អ្នក​នាំពាក្យរដ្ឋាភិបាល​បាន​ថ្លែងការពារ​ចំណាត់​ការ​របស់រដ្ឋាភិបាល​ក្នុង​ការ​កំណត់កាតព្វកិច្ច​នៃការ​ចាក់​វ៉ាក់​សាំង​បង្ការ​ជំងឺកូវីដ​១៩។ លោក​ប្រាប់ ​VOA​ ថាការ​ចាក់​វ៉ាក់​សាំង​នេះ ​នៅ​តែ​ជា​«​ការ​ស្ម័គ្រ​ចិត្ត» លើក​លែង​តែ​មន្រ្តី​រាជ​ការ​ដែល​តម្រូវ​ឲ្យ​ចាក់​វ៉ាក់សាំង ទើប​អាច​ឲ្យ​ចូល​បម្រើ​ការ​ងារ​របស់​ខ្លួន​វិញ​បាន​ជា​ធម្មតា។

លោក​ថ្លែង​ថា៖ «ភាគច្រើ​ន​ យើ​ង​មិន​អាច​ជួប​ជុំ​គ្នា​បំពេញ​[ការងារ]​ទេ ក្រៅ​តែ​ពី​ធ្វើ​ការ​អនឡាញ​[តាម​ផ្ទះ]។ ដូច្នេះ​យុទ្ធសាស្រ្ត​នៃ​ការ​ចាក់​ថ្នាំ​ហ្នឹង បើ​ចាក់គ្រប់​គ្រាន់​អស់​ហើយ ស្ថាប័ន​រដ្ឋាភិបាល​នឹង​បើក​ឲ្យ​ធ្វើ​ការ​ជា​ប្រក្រតី​ភាព​ឡើង​វិញ [ហើយ]​ចំពោះ​ជន​ដែល​គាត់​អត់​ស្ម័គ្រ​ចិត្ត​ចូល​រួម​ អាហ្នឹង​ បាន​គេ​ឲ្យ​គាត់​នៅ​ក្រៅ​សិន​ ទម្រាំ​ស្ថាន​ភាព​កូវីដ​បាន​វិវឌ្ឍ​ទៅ​ល្អ»។

រូបឯកសារ៖ វ៉ាក់សាំង​បង្ការ​ជំងឺ​កូវីដ១៩​ចំនួន ៦ សែន​ដូស​ដែល​ផ្ដល់​ឲ្យ​កម្ពុជា​ដោយ​រដ្ឋាភិបាល​ចិន​ត្រូវ​បាន​បញ្ជូន​មក​ដល់​អាកាសយានដ្ឋាន​អន្តរជាតិ​ភ្នំពេញ​ កាល​ពី​ថ្ងៃទី៧ ខែកុម្ភៈ ឆ្នាំ២០២១។
រូបឯកសារ៖ វ៉ាក់សាំង​បង្ការ​ជំងឺ​កូវីដ១៩​ចំនួន ៦ សែន​ដូស​ដែល​ផ្ដល់​ឲ្យ​កម្ពុជា​ដោយ​រដ្ឋាភិបាល​ចិន​ត្រូវ​បាន​បញ្ជូន​មក​ដល់​អាកាសយានដ្ឋាន​អន្តរជាតិ​ភ្នំពេញ​ កាល​ពី​ថ្ងៃទី៧ ខែកុម្ភៈ ឆ្នាំ២០២១។

លោក​បញ្ជាក់​ថា​ការ​ចាក់​វ៉ាក់សាំង​នេះ ជា​កាតព្វ​កិច្ច​របស់​រដ្ឋាភិបាល «ដើម្បី​ថែរក្សា​សិទ្ធិ​រស់​រាន​មាន​ជីវិត»​របស់​ប្រជាពលរដ្ឋ។

បើ​តាម​ទិន្នន័យ​របស់​ក្រសួង​សុខាភិបាល គិត​ត្រឹម​ថ្ងៃ​អង្គារ​នេះ អាជ្ញាធរ​កម្ពុជាបាន​ចាក់​វ៉ាក់សាំង​ដល់ពលរដ្ឋ​ប្រមាណ​៥​លាននាក់ គឺ​ស្មើ​នឹង​៥០​%​នៃ​ចំនួន​ប្រជាពលរដ្ឋ​១០​លាន​នាក់​ដែល​ត្រូវ​ចាក់។ រដ្ឋាភិបាល​កម្ពុជា​បាន​ពឹង​ផ្អែក​លើ​វ៉ាក់សាំង​ដែល​ទិញ​ និង​ជំនួយ​ឥត​សំណង​ពី​ចិន គឺ​វ៉ាក់សាំង​ស៊ីណូហ្វាម​(Sino​pharm​)​ និង​ស៊ីណូវ៉ាក់ (Sinovac)។

ចាប់​តាំង​ពី​ផ្ទុះ​ឆ្លង​ព្រឹត្តិការណ៍​២០​កុម្ភៈ ប្រជាជន​ហាក់​សម្រុក​ទៅ​ចាក់​វ៉ាក់សាំង ដែល​ពីមុន​មក ពួកគេ​មានភាព​ស្ទាក់​ស្ទើរ ដោយ​សារ​វ៉ាក់សាំង​របស់​ចិន មិន​ទាន់​ត្រូវ​បាន​ទទួល​ស្គាល់​ដោយ​អង្គការ​សុខ​ភាព​ពិភពលោក។ អំឡុង​ពេល​កម្ពុជា​សម្រុក​ចាក់​វ៉ាក់សាំង​នេះ អង្គការ​សុខ​ភាព​ពិភព​លោក​ក៏​បាន​ទទួល​ស្គាល់​វ៉ាក់សាំង​របស់​ចិន សម្រាប់​ការ​ប្រើប្រាស់​ជា​បន្ទាន់​ផង​ដែរ។

លោក​ ឯម សុវណ្ណារ៉ា ​អ្នក​តាម​ដាន​នយោបាយ​កម្ពុជា ថ្លែង​ប្រាប់ VOA ថា​ប្រជាពលរដ្ឋ​មិន​មាន​ជម្រើស​នោះ​ទេ​សម្រាប់​ការ​ចាក់​វ៉ាក់សាំង ខណៈ​អ្នក​ខ្លះ​ទៅ​ចាក់ ដើម្បី​បាន​បណ្ណ​ចាក់​វ៉ាក់សាំង ទើប​អាជ្ញាធរ​អាច​ឲ្យ​បើក​រកស៊ី​ធម្មតា​ ឬ​ក៏​អាច​ឲ្យ​ធ្វើ​ដំណើរ​ទៅ​តាម​បណ្តា​ខេត្ត​នានា។

លោក​និយាយ​ថា៖ «និយាយ​ទៅ​ការ​ស្ម័គ្រ​ចិត្ត​ វា​អត់​ស្ម័គ្រ​ចិត្ត​ពេញ​លេញ​ទាំង​ស្រុង​ទេ ដោយ​សារ​តែ​គាត់​អត់​ជម្រើស​គាត់​ត្រូវ​តែ​ចាក់​ហើយ ដោយ​សារ​តែ​ស្ថាន​ភាព​ជំងឺ​រីកសាយ​ភាយ​ខ្លាំង។ អញ្ចឹង​មធ្យោបាយ សមត្ថកិច្ច​តឹង​តែង អញ្ចឹង​តម្រូវ​ឲ្យ​មាន​ការ​ចាក់​វ៉ាក់សាំង ​ដើម្បី​ទប់​ស្កាត់​ គាត់​ក៏​ចង់​បាន​ដែរ​ គេ​ហៅ​ថា​សេរីភាព​ក្នុង​ការ​ប្រកប​អាជីវ​កម្ម​របស់​គាត់ គាត់​ត្រូវ​តែ​ចាក់​វ៉ាក់សាំង​អញ្ចឹង»។

គួរ​បញ្ជាក់​ថា​អាជ្ញាធរ​សុខាភិបាល​បាន​បញ្ចប់​ការ​ចាក់​វ៉ាក់សាំង​ក្នុង​ភូមិសាស្រ្ត​រាជធានី​ភ្នំពេញ​កាល​ពី​សប្តាហ៍​មុន ដែល​មាន​ប្រមាណ​២​លាន​នាក់ និង​បន្ត​សម្រុក​ចាក់​នៅ​តាម​បណ្តា​ខេត្ត​ឲ្យ​បាន​អស់​នៅ​ត្រឹម​ខែ​តុលា​ខាង​មុខ ខណៈ​ការ​ឆ្លង​នៅ​ទូទាំង​ប្រទេស​មិន​ទាន់​ថមថយ​នៅ​ឡើយ។

នៅ​ថ្ងៃ​អង្គារ​នេះ ក្រសួង​សុខាភិបាល​បាន​រាយ​ការណ៍​ករណី​ឆ្លង​ថ្មី​ចំនួន​៨៣០​នាក់ និង​ករណី​ស្លាប់​២៨​នាក់ ដែល​នាំ​ឲ្យ​ករណី​ស្លាប់​សរុប​នៅ​ទូទាំង​ប្រទេស​មាន​ចំនួន​៩៥៣​នាក់៕

XS
SM
MD
LG