ការិយាល័យសិទ្ធិមនុស្សនៃអង្គការសហប្រជាជាតិបានរិះគន់ដល់ការសម្រេចរបស់រដ្ឋបាលលោក Trump ក្នុងការចាប់ផ្តើមឲ្យមានទោសប្រហារជីវិតថ្នាក់សហព័ន្ធឡើងវិញ ក្រោយពីបានបញ្ឈប់អស់រយៈពេល១៦ឆ្នាំមក ដោយនិយាយថា វាជាការរំខានដល់និន្នាការជាតិ និងអន្តរជាតិក្នុងការលុបបំបាត់ចោលទោសប្រហារជីវិត។
ការិយាល័យអង្គការសិទ្ធិមនុស្សនៃអង្គការសហប្រជាជាតិ បានឲ្យដឹងថា ការសម្រេចរបស់រដ្ឋាភិបាលក្រុងវ៉ាស៊ីនតោន ក្នុងការចាប់ផ្តើមឲ្យមានទោសប្រហារជីវិតថ្នាក់សហព័ន្ធឡើងវិញ ជាការប្រឆាំងនឹងសិទ្ធិមូលដ្ឋានបំផុតនៃសិទ្ធិមនុស្ស នោះគឺសិទ្ធិក្នុងការមានជីវិតរស់នៅ។ ការិយាល័យនេះ ក៏បានឲ្យដឹងផងដែរថា ការសម្រេចនេះ បានបន្ទុចបង្អាក់ដល់ដំណើរការលុបបំបាត់ចោលទោសប្រហារជីវិតទូទាំងសាកលលោក។
អង្គការសហប្រជាជាតិ រាយការណ៍ថា ១៧០ប្រទេសនៃប្រទេសចំនួន ១៩០ ដែលជាសមាជិកអង្គការសហប្រជាជាតិ បានលុបបំបាត់ចោលទោសប្រហារជីវិតទាំងក្នុងច្បាប់ និងទាំងក្នុងការអនុវត្ត។
លោក Rupert Colville អ្នកនាំពាក្យការិយាល័យសិទ្ធិមនុស្សនៃអង្គការសហប្រជាជាតិ បានថ្លែងថា ការប្រហារជីវិតមនុស្ស គឺជាអំពើខុសឆ្គងតាមហេតុផលជាច្រើន។ លោកថ្លែងទៀតថា ការព្រួយបារម្ភខ្លាំងបំផុត គឺអាចមានការកាត់ទោសប្រហារជីវិតមនុស្សដែលគ្មានទោសចំពោះបទឧក្រិដ្ឋដែលគេត្រូវបានចោទប្រកាន់។ លោកថ្លែងថា របាយការណ៍នៅក្នុងសហរដ្ឋអាមេរិក ដែលផ្អែកទៅលើភស្តុតាងតាមរយៈ DNA បានបង្ហាញថា រដ្ឋខ្លះ បានកាត់ទោសប្រហារជីវិតមនុស្សដែលគ្មានទោសកំហុស។
លោក Rupert Colville ថ្លែងថា៖
«វាក៏គ្មានភស្តុតាងពិតប្រាកដណាមួយដែរ ដែលបង្ហាញថា ទោសប្រហារជីវិត បានរារាំងមនុស្សមិនឲ្យប្រព្រឹត្តបទឧក្រិដ្ឋនោះទេ ដែលនោះជាហេតុផល ដែលជាញឹកញាប់ត្រូវបានគេ លើកយកមកធ្វើជាមូលហេតុដែលគេអនុវត្តទោសប្រហារជីវិត។ ហើយក៏មានការព្រួយបារម្ភជាច្រើនផងដែរ ជាពិសេស នៅសហរដ្ឋអាមេរិក ដែលបានអនុវត្តការកាត់ទោសនេះ ដោយភាពរើសអើង ជាពិសេសទៅលើអ្នកដែលមានប្រវត្តិក្រីក្រ និងមានកំណើតពីជនជាតិភាគតិច»។
កាលពីសប្តាហ៍មុន លោក William Barr រដ្ឋមន្រ្តីក្រសួងយុត្តិធម៌សហរដ្ឋអាមេរិកបានសម្រេចឲ្យមានទោសប្រហារជីវិតថ្នាក់សហព័ន្ធឡើងវិញ។ លោក William Barr ថ្លែងថា ការប្រហារជីវិតអ្នកទោស៥នាក់ដំបូង ដែលស្ថិតនៅក្នុងបញ្ជីទោសប្រហារជីវិត និងចាប់ផ្តើមនៅខែធ្នូខាងមុខនេះ ហើយអ្នកទោសផ្សេងទៀតនឹងត្រូវកំណត់ពេលប្រហារជីវិតនៅពេលក្រោយទៀត។
ក្នុងពេលបច្ចុប្បន្ននេះ មានអ្នកទោស៦០នាក់ មានឈ្មោះក្នុងបញ្ជីទោសប្រហារជីវិតថ្នាក់សហព័ន្ធ នៅក្នុងសហរដ្ឋអាមេរិក។ ការស្ទង់មតិនាពេលថ្មីៗនេះ បានរកឃើញថា ពលរដ្ឋអាមេរិកាំង ៥៦ ភាគរយ គាំទ្រឲ្យមានទោសប្រហារជីវិត ដែលនេះ ជាចំនួនធ្លាក់ចុះគួរឲ្យកត់សម្គាល់ ពី ៨០ ភាគរយ កាលពីពាក់កណ្តាលទសវត្សរ៍ ១៩៩០។
លោក Rupert Colville ថ្លែងថា ការសម្រេចរបស់លោក William Barr គឺប្រឆាំងទៅនឹងនិន្នាការក្នុងសហរដ្ឋអាមេរិក និងអន្តរជាតិ។ លោកបានកត់សម្គាល់ថា រដ្ឋចំនួន ២១ ក្នុងសហរដ្ឋអាមេរិក បានលុបបំបាត់ចោលទាំងស្រុងនូវទោសប្រហារជីវិត ហើយរដ្ឋចំនួន៤ទៀត បានចេញបម្រាមមិនឲ្យមានទោសប្រហារជីវិត ដែលការនេះ ធ្វើឲ្យរដ្ឋដែលគ្មានទោសប្រហារជីវិត និងរដ្ឋមានទោសប្រហារជីវិត មានចំនួនស្មើគ្នា៕
ប្រែសម្រួលដោយអ្នកស្រី លី ម៉ូរីវ៉ាន់
