ទីភ្នាក់ងារផ្ដល់ជំនួយនានារបស់អង្គការសហប្រជាជាតិកំពុងប្រញាប់ប្រញាល់បញ្ជូនជំនួយសង្គ្រោះរាប់តោនសម្រាប់មនុស្សរាប់ពាន់នាក់ដែលរងគ្រោះរញ្ជួយដីដ៏ខ្លាំងមួយ កាលពីថ្ងៃពុធ ទី២២ ខែមិថុនា នៅខេត្ត Khost និងខេត្ត Paktika ប្រទេសអាហ្វហ្គានីស្ថាន។ មនុស្សជាង ១.០០០ នាក់ត្រូវបានរាយការណ៍ថា បានស្លាប់ និងយ៉ាងហោចណាស់ជាង ១.៦០០ នាក់បានរងរបួស។
ទីភ្នាក់ងារផ្ដល់ជំនួយនានារំពឹងថា ចំនួននៃមនុស្សស្លាប់ និងរងរបួសអាចនឹងកើនឡើង ខណៈដែលប្រតិបត្តិការស្វែងរក និងជួយសង្គ្រោះកំពុងបន្តធ្វើ នៅភាគអាគ្នេយ៍នៃប្រទេសអាហ្វហ្គានីស្ថាន។ ពួកគេបានកត់សម្គាល់ថា មនុស្សជាច្រើនកំពុងដេកនៅក្នុងផ្ទះដែលសាងសង់ពីភក់ នៅពេលការរញ្ជួយដីកម្លាំងរំញ័រ៥,៩លើជញ្ជីងរិចទ័របានកើតឡើង។
ថ្លែងពីរដ្ឋធានីកាប៊ុល លោក Mohamed Ayoya តំណាងអង្គការ UNICEF ប្រចាំប្រទេសអាហ្វហ្គានីស្ថាន បាននិយាយថា កុមារយ៉ាងហោចណាស់ចំនួន១២១នាក់ បានស្លាប់ និង៦៧នាក់នាក់បានរងរបួស នៅក្នុងការបំផ្លិចបំផ្លាញដែលបានបណ្ដាលឲ្យផ្ទះរាប់ពាន់ខ្នងរងការបំផ្លាញទាំងស្រុង ឬ រងការខូចខាត។
លោកថ្លែងថា ក្រុមអ្នកជំនាញផ្នែកសុខាភិបាលបានទៅដល់នៅកន្លែងកើតហេតុភ្លាមៗនៅក្នុងស្រុកដែលរងការប៉ះពាល់ធ្ងន់ធ្ងរ បន្ទាប់ពីគ្រោះរញ្ជួយដីកាលពីពាក់កណ្ដាលអធ្រាត្រឈានចូលថ្ងៃទី ២២ ខែមិថុនា។ ពួកគេកំពុងវាយតម្លៃការខូចខាត និងតម្រូវការចាំបាច់បន្ទាន់។
លោកថ្លែងដូច្នេះថា៖ «យើងបានដឹងហើយថា ក្មេងៗ និងក្រុមគ្រួសារពួកគេ ដែលទទួលរងការប៉ះពាល់ពីការរញ្ចួយដីនេះ កំពុងត្រូវការជាបន្ទាន់នូវទីជម្រក ទឹកសម្រាប់បរិភោគ ការថែទាំផ្នែកសុខាភិបាល និងការការពារ។ កុមារ និងមនុស្សវ័យជំទង់ គឺជាក្រុមជនងាយរងគ្រោះ និងមានហានិភ័យខ្ពស់ក្នុងការបំបែកចេញពីគ្រួសារ ការរងទុក្ខវេទនាផ្លូវអារម្មណ៍ និងផ្លូវចិត្ត ការរំលោភបំពាន ការកេងប្រវ័ញ្ច និងអំពើហិង្សាក្នុងទម្រង់ផ្សេងទៀត»។
លោក Ayoya បានថ្លែងទៀតថា អង្គការ UNICEF កំពុងផ្ដល់ថ្នាំពេទ្យសម្រាប់គ្រាអាសន្ន គ្រឿងផ្គត់ផ្គង់ផ្នែកវេជ្ជសាស្ត្រផ្សេងទៀត និង សម្ភារៈសម្រាប់ព្យាបាលកុមារ ដែលមានជំងឺរាគរូស និងជួយបង្ការការឆ្លងជំងឺអាសន្នរោគ។ លោកកត់សម្គាល់ថា មនុស្សជាច្រើនកំពុងស្ថិតនៅក្នុងហានិភ័យខ្ពស់ក្នុងការឆ្លងជំងឺទាំងនេះ ដោយសារតែការខូចប្រព័ន្ធផ្គត់ផ្គង់ទឹក និង អនាម័យមានកម្រិតទាប។
ទីភា្នក់ងារអង្គការសហប្រជាជាតិទទួលបន្ទុកជនភៀសខ្លួន ក៏បានបញ្ចេញជំនួយសង្គ្រោះច្រើនតោនចេញពីឃ្លាំងរបស់ខ្លួននៅទីក្រុងកាប៊ុល ទៅកាន់កាន់តំបន់នានាដែលរងផលប៉ះពាល់។ អ្នកស្រី Shabia Mantoo អ្នកនាំពាក្យឧត្តមស្នងការអង្គការអង្គការសហប្រជាជាតិទទួលបន្ទុកជនភៀសខ្លួន UNHCR បានថ្លែងថា សម្ភារៈទាំងនោះ ដែលរួមមានតង់ ភួយ ប៊ីដុងទឹក សម្ភារៈផ្ទះបាយ និងសម្ភារៈសំខាន់ៗជាច្រើនទៀត អាចផ្គត់ផ្គង់មនុស្សបានប្រហែល៤.២០០នាក់។
អ្នកស្រីថ្លែងដូច្នេះថា៖ «UNHCR បានដាក់ពង្រាយបុគ្គលិកដើម្បីជួយរៀបចំទីជម្រកសម្រាប់មនុស្សដែលគ្មានផ្ទះសម្បែងដោយសារតែការបំផ្លិចបំផ្លាញនេះ។ ក្រុមការងាររបស់ UNHCR ក៏កំពុងតែបង្កើតមណ្ឌលផ្គត់ផ្គង់ចំនួន៣កន្លែង នៅស្រុក Giyan, Bermal និង Spera ដើម្បីឲ្យសម្ភារៈមនុស្សធម៌ដែលដឹកចេញពីទីក្រុងកាប៊ុលទៅដល់ទីនោះ អាចត្រូវបានបញ្ជូនបន្តភ្លាមៗទៅកាន់សហគមន៍ដែលរងការប៉ះពាល់ដោយគ្រោះរញ្ជូយដីនេះ»។
អ្នកស្រី Mantoo ថ្លែងបន្តទៀតថា ជម្លោះ និងអស្ថិរភាពអស់រយៈពេល៤ទសវត្សរ៍នៅអាហ្វហ្គានីស្ថានបានធ្វើឱ្យមនុស្សរាប់លាននាក់ប្រឈមការស្រេកឃ្លាន និងទុរ្ភិក្ស។ អ្នកស្រីនិយាយថា ត្រូវមានការគាំទ្រចាំបាច់ និងបន្ទាន់ជាច្រើនទៀតដើម្បីបញ្ចៀសគ្រោះមហន្តរាយផ្នែកមនុស្សធម៌ដែលនឹងកើតមាននៅពេលក្រោយ។
ពួកតាលីបង់ដែលគ្រប់គ្រងអំណាចដ៏តឹងរ៉ឹង ហើយដែលបានក្ដោបអំណាចនៅប្រទេសនេះកាលពីខែ សីហា ឆ្នាំមុន ក៏កំពុងអំពាវនាវរកជំនួយពីអន្តរជាតិផងដែរ៕
ប្រែសម្រួលដោយ លោក ពិន ស៊ីសុវណ្ណ
