មន្ត្រីអ៊ុយក្រែននិយាយនៅថ្ងៃពុធនេះថា ការវាយប្រហារមួយដោយគ្រាប់មីស៊ីលដ៏ប្រល័យរបស់រុស្ស៊ីបានចំទីក្រុង Chernihiv នៅភាគជើងអ៊ុយក្រែន។
អភិបាលក្រុង Chernihiv លោក Oleksandr Lomako និយាយលើតេឡេក្រាមថា មនុស្សយ៉ាងតិច ៨ នាក់បានស្លាប់និង ១៨ នាក់ផ្សេងទៀតរងរបួស។
អភិបាលតំបន់ លោក Vyacheslav Chaus និយាយថា គ្រាប់មីស៊ីលមួយចំនួនត្រូវបានបាញ់ចំផ្នែកកណ្តាលនៃទីក្រុង Chernihiv ។
លោកថា មានជនស៊ីវិលរងគ្រោះនិងរបួសជាច្រើននាក់។
ដោយឡែក ក្រសួងការពារជាតិរុស្ស៊ីបានរាយការណ៍នៅថ្ងៃពុធនេះពីការបំផ្លាញដ្រូនមួយគ្រឿងរបស់អ៊ុយក្រែននៅលើតំបន់ Mordovia។
ជាមួយគ្នានេះដែរ ប្រធានាធិបតីអ៊ុយក្រែនលោក Volodymyr Zelenskyy បានថ្លែងក្នុងសុន្ទរកថាប្រចាំរាត្រីកាលពីថ្ងៃអង្គារថា លោកនឹងស្នើសុំឱ្យមានកិច្ចប្រជុំមួយរបស់ក្រុមប្រឹក្សាអ៊ុយក្រែន-អូតង់ ដើម្បីពិភាក្សាលើការការពារដែនអាកាសអ៊ុយក្រែន ការផ្គត់ផ្គង់អាវុធប្រឆាំងយន្តហោះ ប្រព័ន្ធអាវុធផ្សេងៗនិងគ្រាប់មីស៊ីលជាដើម»។
ទន្ទឹមនឹងនេះដែរ រដ្ឋមន្ត្រីការបរទេសសហរដ្ឋអាមេរិកលោក Antony Blinken កំពុងចូលរួមក្នុងកិច្ចប្រជុំនៃក្រុមប្រទេសដែលមានឧស្សាហកម្មជឿនលឿនទាំង ៧ ឬ G7 នៅក្នុងប្រទេសអ៊ីតាលី ដែលក្រសួងការបរទេសអាមេរិកនិយាយថា លោកនឹងពិភាក្សាអំពីការបារម្ភរបស់អាមេរិកលើការគាំទ្ររបស់ចិនទៅលើឧស្សាហកម្មយោធារបស់រុស្ស៊ី៕
ព័ត៌មានខ្លះដកស្រង់ពីទីភ្នាក់ងារសារព័ត៌មានThe Associated Press, Agence France-Presse និង Reuters ។
វេទិកាបញ្ចេញមតិ