អ៊ុយក្រែនមានអ្នកនាំពាក្យបង្កើតដោយ AI ឈ្មោះថា Victoria Shi ដែលនឹងធ្វើសេចក្តីថ្លែងការណ៍ជាផ្លូវការក្នុងនាមក្រសួងការបរទេសរបស់ខ្លួន។
ក្រសួងនេះបាននិយាយនៅថ្ងៃទី ១ ខែឧសភាថា ខ្លួននឹងប្រើ «ជាលើកដំបូងក្នុងប្រវត្តិសាស្ត្រ» អ្នកនាំពាក្យឌីជីថលដើម្បីអានសេចក្តីថ្លែងការណ៍របស់ខ្លួន ដែលនឹងនៅតែត្រូវបានសរសេរដោយមនុស្ស។
ស្លៀកពាក់ឈុតខ្មៅងងឹត អ្នកនាំពាក្យឌីជីថលនោះបានណែនាំខ្លួនថា នាងមានឈ្មោះ Victoria Shi ជា «មនុស្សឌីជីថលម្នាក់» នៅក្នុងបទបង្ហាញមួយដែលបានបង្ហោះលើបណ្ដាញសង្គម។ រូបនាង Victoria Shi នេះធ្វើកាយវិកាយ ដោយមានដៃនិងក្បាលធ្វើចលនាពេលនាងនិយាយ។
ការិយាល័យសារព័ត៌មានរបស់ក្រសួងការបរទេសបានប្រាប់ទីភ្នាក់ងារព័ត៌មាន AFP ថា សេចក្តីថ្លែងការណ៍ដែលផ្តល់ដោយ Victoria Shi នឹងមិនត្រូវបានបង្កើតដោយ AI ទេ ប៉ុន្តែវាត្រូវបាន «សរសេរ និងផ្ទៀងផ្ទាត់ដោយមនុស្សពិត»។
ការិយាល័យសារព័ត៌មាននេះបាននិយាយថា៖ «គ្រាន់តែរូបភាពប៉ុណ្ណោះដែល AI ជួយយើងបង្កើត»។
រដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយថា អ្នកនាំពាក្យថ្មីនេះ គឺជា «ការលោតផ្លោះផ្នែកបច្ចេកវិទ្យា ដែលមិនទាន់មានសេវាការទូតលើពិភពលោកណា បានធ្វើនៅឡើយទេ»។
លោក Kuleba បានបន្តថា មូលហេតុចម្បងនៃការបង្កើតនាង Victoria Shi គឺ «ចំណេញពេលវេលា និងធនធាន» សម្រាប់អ្នកការទូត។
អ្នកបង្កើតនាង Victoria Shi គឺជាក្រុមមួយដែលមានឈ្មោះថា The Game Changers ដែលបានបង្កើតមាតិកាពិភពនិម្មិតទាក់ទងនឹងសង្រ្គាមនៅអ៊ុយក្រែនផងដែរ។ ឈ្មោះរបស់អ្នកនាំពាក្យឌីជីថលនេះ គឺផ្អែកលើពាក្យជ័យជម្នះ និងភាសាអ៊ុយក្រែនសម្រាប់បញ្ញាសិប្បនិម្មិតគឺ «shtuchniy intelekt»។
រូបរាង និងសំឡេងរបស់ នាង Victoria Shi ត្រូវបានយកគំរូតាមមនុស្សពិត គឺអ្នកនាង Rosalie Nombre តារាចម្រៀង និងជាអតីតបេក្ខនារីក្នុងកម្មវិធីសាច់រឿងពិតរបស់ប្រទេសអ៊ុយក្រែន ដែលធ្វើតាមកម្មវិធី «The Bachelor» របស់សហរដ្ឋអាមេរិក។
អ្នកនាង Nombre កើតនៅទីក្រុង Donetsk ដែលបច្ចុប្បន្នគ្រប់គ្រងដោយរុស្សី នៅភាគខាងកើតអ៊ុយក្រែន។
នាងមានអ្នកតាមដាន ៥៤.០០០ នាក់នៅលើគណនី Instagram របស់នាង ដែលនាងប្រើដើម្បីពិភាក្សាអំពីសេចក្ដីសន្មតនានាអំពីជនជាតិអ៊ុយក្រែនដែលមានជាតិសាសន៍ចម្រុះ និងដែលធំដឹងក្តីជាអ្នកនិយាយភាសារុស្សី។
ក្រសួងការបរទេសអ៊ុយក្រែនបាននិយាយថា អ្នកនាង Nombre បានចូលរួមដោយមិនយកកម្រៃអ្វីទេ។
ក្រសួងបានសង្កត់ធ្ងន់ថា នាង Victoria Shi និងអ្នកនាង Nombre «គឺជាមនុស្សពីរផ្សេងគ្នា» ហើយថា មានតែរូប AI ប៉ុណ្ណោះដែលផ្តល់សេចក្តីថ្លែងការណ៍ជាផ្លូវការ។
ដើម្បីជៀសវាងការក្លែងបន្លំ ការផ្តល់សេចក្តីថ្លែងការណ៍ទាំងអស់នឹងត្រូវបានអមជាមួយលេខកូដ QR ដែលភ្ជាប់ទៅអត្ថបទនៅលើគេហទំព័ររបស់ក្រសួង។
នាង Victoria Shi នឹងធ្វើអត្ថាធិប្បាយអំពីបញ្ហាសេវាកុងស៊ុល ដែលបច្ចុប្បន្នជាប្រធានបទដ៏ចម្រូងចម្រាស។
អ៊ុយក្រែន កាលពីចុងខែមេសា បានផ្អាកសេវាកម្មបែបនេះ សម្រាប់បុរសមានអាយុអាចប្រយុទ្ធដែលរស់នៅក្រៅប្រទេស ដោយតម្រូវឱ្យពួកគេត្រឡប់ទៅប្រទេសរបស់ពួកគេវិញ សម្រាប់នីតិវិធីរដ្ឋបាល និងអាចប្រឈមមុខនឹងការដាក់ឱ្យធ្វើជាទាហាន៕
ប្រែសម្រួលដោយ ចាប ចិត្រា
