ធនាគារ UBS ដែលជាធនាគារធំជាងគេបង្អស់របស់ស្វីស គ្រោងនឹងទិញធនាគារ Credit Suisse ដែលជាធនាគារធំជាងគេទីពីររបស់ស្វីសនិងជាគូប្រជែងរបស់ខ្លួន ក្នុងទឹកប្រាក់ ៣,២៥ ពាន់លានដុល្លារដើម្បីដាក់ឱ្យស្ថិតនៅក្រោមការគ្រប់គ្រងរបស់ខ្លួន បន្ទាប់ពីមានការពិភាក្សាកាលពីចុងសប្ដាហ៍ក្នុងគោលបំណងបង្ការកុំឱ្យមានវិបត្តិធនាគារអន្តរជាតិធំជាងនេះកើតឡើង ប៉ុន្តែភាគហ៊ុននៅអាស៊ីបានធ្លាក់ចុះនៅថ្ងៃចន្ទនេះដោយសារក្ដីបារម្ភអំពីរឿងនេះ។
កិច្ចព្រមព្រៀងទិញធនាគារ Credit Suisse នេះគឺសំខាន់ដើម្បីបង្ការកុំឱ្យមានភាពចលាចលសេដ្ឋកិច្ចរីករាលដាលនៅទូទាំងប្រទេសស្វីសនិងធ្លាយចេញទៅក្រៅប្រទេស។ នេះបើតាមការបញ្ជាក់របស់រដ្ឋាភិបាលស្វីស។
វិធានការនេះត្រូវបានស្វាគមន៍នៅក្នុងសហរដ្ឋអាមេរិក អាល្លឺម៉ង់ និងចក្រភពអង់គ្លេស ថាជាវិធានការមួយដែលនឹងគាំទ្រស្ថិរភាពហិរញ្ញវត្ថុ បន្ទាប់ពីមានភាពចលាចលរយៈពេលមួយសប្ដាហ៍ក្រោយពីធនាគារពីររបស់សហរដ្ឋអាមេរិកបានដួលរលំមក។
ការទិញធនាគារ Credit Suisse នេះត្រូវបានប្រកាសនៅក្នុងសន្និសីទកាសែត បន្ទាប់ពីមានការពិភាក្សាគ្នានៅឯក្រសួងហិរញ្ញវត្ថុស្វីសនៅទីក្រុង Bern មក និងនៅពេលដែលទីផ្សារភាគហ៊ុនជិតបើកដំណើរការនៅថ្ងៃចន្ទនេះ។
អ្នកដែលមានវត្តមាននៅក្នុងសន្និសីទកាសែតនោះគឺប្រធានាធិបតីស្វីសលោក Alain Berset ប្រធានធនាគារ UBS លោក Colm Kelleher និងប្រធានធនាគារ Credit Suisse លោក Axel Lehmann រួមជាមួយនឹងរដ្ឋមន្ត្រីក្រសួងហិរញ្ញវត្ថុស្វីសនិងប្រធាននៃធនាគារជាតិស្វីស (SNB) និងនិយ័តករហិរញ្ញវត្ថុ FINMA ផងដែរ។
ប្រទេសស្វីសមានកេរ្តិ៍ឈ្មោះដោយសារភាពលេចធ្លោនៃប្រព័ន្ធធនាគាររបស់ខ្លួន។ លោក Berset បាននិយាយថា ការទិញធនាគារ Credit Suisse នេះគឺជា «ដំណោះស្រាយល្អបំផុតសម្រាប់ការស្ដារទំនុកចិត្តឡើងវិញដែលកំពុងធ្លាក់ចុះនៅក្នុងទីផ្សារហិរញ្ញវត្ថុក្នុងពេលថ្មីៗនេះ»។
លោក Berset បានបន្ថែមថា ប្រសិនបើធនាគារ Credit Suisse ដួលរលំ វានឹងមាន «ផលវិបាកដែលមិនអាចគណនាបានសម្រាប់ប្រទេសនិងសម្រាប់ស្ថិរភាពហិរញ្ញវត្ថុអន្តរជាតិ»៕
