លោកឧកញ៉ា គិត ធាង អ្នកជំនួញលេចធ្លោម្នាក់ដែលត្រូវសាលាដំបូងរាជធានីភ្នំពេញចោទថា ជាប់ពាក់ព័ន្ធនឹងការផ្តល់ទីតាំងឲ្យប្រើប្រាស់គ្រឿងញៀននិងជួញដូរគ្រឿងញៀននោះ ត្រូវបានដោះលែងឲ្យមានសេរីភាពវិញ កាលពីពេលថ្មីៗនេះ តាមដីកាសម្រេចរបស់សាលាឧទ្ធរណ៍។ នេះបើយោងតាមមន្រ្តីរដ្ឋាភិបាល។
លោក គិត ធាង អាយុ៥៥ឆ្នាំ ជាម្ចាស់អតីតមណ្ឌលកម្សាន្តរ៉ុក (ROCK) ដែលត្រូវបានចាប់ខ្លួនកាលពីអំឡុងខែមីនា ឆ្នាំ២០១៩ ក្រោយមានការថ្លែងរបស់លោកនាយករដ្ឋមន្រ្តី ហ៊ុន សែន។ នគរបាលបានចោទលោក គិត ធាង ថា ជាប់ពាក់ព័ន្ធការចែកចាយគ្រឿងញៀននៅមណ្ឌលកម្សាន្តរ៉ុក។ ក្រោយមក គឺក្នុងអំឡុងខែមីនាដដែល លោកត្រូវបានបណ្តាញព័ត៌មានក្នុងស្រុករាយការណ៍ថា ត្រូវបានតុលាការផ្តន្ទាទោសឲ្យជាប់ពន្ធនាគាររយៈពេល៤ឆ្នាំ ក្រោមបទចោទថា ចាត់ចែងនិងសម្រួលឲ្យមានការប្រើប្រាស់ដោយខុសច្បាប់នូវសារជាតិញៀននិងបទសមគំនិត។
អ្នកនាំពាក្យក្រសួងមហាផ្ទៃ លោកនាយឧត្តមសេនីយ៍ខៀវ សុភ័គ ប្រាប់វីអូអេនៅថ្ងៃចន្ទនេះថា លោក គិត ធាង ត្រូវបានដោះលែងតាមសាលដីការបស់សាលាឧទ្ធរណ៍ តែលោកមិនចាំច្បាស់កាលបរិច្ឆេទនៃសេចក្តីសម្រេចរបស់សាលាឧទ្ធរណ៍នោះទេ។ លោក គិត ធាង បានជាប់ពន្ធនាគារប្រមាណ២ឆ្នាំ គិតមកត្រឹមថ្ងៃដោះលែងឲ្យមានសេរីភាពឡើងវិញ។
លោកថ្លែងថា ៖ «ពូឃើញដែរសេចក្តីសម្រេចរបស់សាលាឧទ្ធរណ៍ហ្នឹងណ៎ា! ដូចជាដីកាហ្នឹងហើយដូចជាមាន...ប៉ុន្តែរឿងដោះលែងថ្ងៃណា ថ្ងៃណា ពូមិនបានដឹងច្បាស់ទេ»។
បើតាមលោក ខៀវ សុភ័គ លោក គិត ធាង មានសំណុំរឿងគ្រឿងញៀនចំនួនពីរនៅសាលាដំបូងរាជធានីភ្នំពេញ គឺករណីមួយពាក់ព័ន្ធនឹងការផ្តល់ទីតាំងឲ្យប្រើប្រាស់គ្រឿងញៀន និងករណីមួយទៀត គឺពាក់ព័ន្ធនឹងការសង្ស័យថា លោកជួញដូរគ្រឿងញៀន។
លោកបន្ថែមថា៖ «ប៉ុន្តែតាមយើងចាំដែលសាលាដំបូងលោកបានប្រកាសកន្លងមក លោកបានបំបែកសំណុំរឿងជាពីរ។ សំណុំរឿងមួយទៀត គឺសំណុំរឿងស្តីអំពីការជួញដូរគ្រឿងញៀនហ្នឹងហើយ។ អានោះនៅទេ សាលាដំបូងលោកកំពុងតែដំណើរការនីតិវិធី កំពុងតែជម្រះ គ្រាន់តែមិនទាន់បើកសវនាការ ដោយសារតែស្ថានភាពនៃជំងឺកូវីដហ្នឹង។ ហ្នឹងនៅទេ នៅមួយរឿងហ្នឹងទៀត»។
ក្រុមមន្ត្រីសិទ្ធិមនុស្សប្រតិកម្មថា តុលាការហាក់ដូចជាធ្វើការសម្រេចដែលមានលក្ខណៈស្តង់ដារពីរ គឺរវាងអ្នកជាប់ចោទបទឧក្រិដ្ឋគ្រឿងញៀននិងសកម្មជនមនសិការនិងនយោបាយឯទៀតដែលបានកំពុងជាប់ឃុំក្នុងពន្ធនាគារ បន្ទាប់ពីសំណើសុំនៅក្រៅឃុំរបស់ពួកគេត្រូវបានតុលាការច្រានចោលជាបន្តបន្ទាប់។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព និយាយថា តុលាការទំនងជាមានហេតុផលណាមួយសមស្របតាមនីតិវិធីច្បាប់ ដែលអាចអនុញ្ញាតឲ្យលោក គិត ធាង បានដើរចេញពីពន្ធនាគារ។
ក៏ប៉ុន្តែលោកស្រីលើកឡើងនូវមន្ទិលថា ហេតុអ្វីបានជាតុលាការយល់យោគឲ្យជនដែលជាប់ពាក់ព័ន្ធនឹងបទល្មើសគ្រឿងញៀន បានចេញពីពន្ធនាគារលឿន មុនកាលកំណត់នៃការអនុវត្តទោស ខណៈសកម្មជននិងមេដឹកនាំសហជីពមួយចំនួនត្រូវបានតុលាការបន្តឃុំខ្លួន ដោយខ្លះបានទទួលការកាត់ទោសតែនៅជាប់ក្នុងពន្ធនាគារដដែល ដោយពុំមានការព្យួរទោស។ ចំណែកអ្នកខ្លះទៀតបានដាក់សំណើសុំនៅក្រៅឃុំ តែត្រូវបានតុលាការបដិសេធចោល តួយ៉ាងដូចករណីរបស់លោក រ៉ុង ឈុន មេដឹកនាំសហជីពជាដើមនោះ។
លោកស្រីបញ្ជាក់ថា៖ «វាបានបង្ហាញនូវវិសមភាព នៅក្នុងប្រព័ន្ធយុត្តិធម៌ដែលនៅពេលណាដែលមានករណីពាក់ព័ន្ធនឹងអ្នកមានទ្រព្យធន ឬក៏អ្នកមានអំណាចអីជាដើមហ្នឹង គឺត្រូវបានហាក់ដូចជាត្រូវបានទទួលនូវការសម្រាល ឬក៏មិនត្រូវបាននាំមកយក នាំមកដាក់ទោសអីឲ្យបានត្រឹមត្រូវទៅតាមនីតិវិធីច្បាប់ទេ។ ប៉ុន្តែផ្ទុយទៅ វិញ ចំពោះសកម្មជនតួយ៉ាង ដូចលោក រ៉ុង ឈុន ឬក៏យុវជនខាងបរិស្ថានអីជាដើម គឺពួកគាត់បច្ចុប្បន្ននេះ គឺស្ថិតនៅក្នុងការឃុំខ្លួនបណ្តោះអាសន្នហើយរង់ចាំការសវនាការជំនុំជម្រះអីជាដើម»។
នាយករងទទួលបន្ទុកឃ្លាំមើលនិងការពារសិទ្ធិមនុស្សអង្គការលីកាដូ លោក អំ សំអាត ចង់ឃើញសាលាឧទ្ធរណ៍ផ្តល់ការពន្យល់ដល់សាធារជនឲ្យបានច្បាស់លាស់អំពីហេតុផលនៃការដោះលែងលោក គិត ធាង។
លោកថ្លែងថា ធ្វើដូច្នេះ គឺដើម្បីបញ្ចៀសការរិះគន់ថា ប្រព័ន្ធយុត្តិធម៌នៅកម្ពុជាមានស្តង់ដារពីរ ដែលមានន័យថា អ្នកប្រព្រឹត្តបទឧក្រិដ្ឋធ្ងន់ធ្ងរបានទទួលការសម្រាលទោស ប៉ុន្តែអ្នកប្រព្រឹត្តបទលើ្មសមជ្ឈិមដូចយ៉ាងសកម្មជនបរិស្ថានមួយចំនួនមិនទទួលបានការសម្រាលទោស និងមិនមានការយកចិត្តទុកដាក់ត្រឹមត្រូវនៅក្នុងពន្ធនាគារ ជាពិសេសពេលមានជំងឺ។
លោកមានប្រសាសន៍ថា៖ «ជាការកត់សម្គាល់ ដែលគេមើលឃើញថា ឧកញ៉ាមួយចំនួនក៏ដូចជាអ្នកដែលមានទ្រព្យធន មួយចំនួនភាគច្រើនមិនសូវជាជាប់ពន្ធនាគារទេ មានឈ្មោះក្នុងពន្ធនាគារ ប៉ុន្តែស្នាក់នៅមន្ទីរពេទ្យ រហូតទៅដល់ថ្ងៃចេញ។ អីចឹងវាជារឿងមួយដែលគេមើលទៅវាខុសគ្នា ហើយគេគិតថាវាអាចស្តង់ដារពីរចំពោះសកម្មជនការពារសិទ្ធិមនុស្ស ការពារបរិស្ថាន ឬក៏យុវជនដែលធ្វើការងារសង្គម»។
កាលពីចុងខែកុម្ភៈ ឆ្នាំ២០១៩ កម្លាំងនគរបាលបានបង្ក្រាបបទល្មើសគ្រឿងញៀននៅមណ្ឌលកម្សាន្តរ៉ុកដែលមានទីតាំងស្ថិតនៅតាមបណ្តោយមហាវិថីព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ ហើយដកហូតបានគ្រឿងញៀនជាង៣៩គីឡូក្រាមនិងសារធាតុញៀនជាទឹក ជាង៩គីឡូក្រាម។
ក្រោយមកអាជ្ញាធរមានសមត្ថកិច្ចបានចាប់ខ្លួនលោក គិត ធាង និងជនសង្ស័យប្រមាណជា១០នាក់ទៀត រួចបញ្ជូនទៅតុលាការក្រុងភ្នំពេញ ដើម្បីបើកការស៊ើបអង្កេត។
ការចាប់ខ្លួនលោក គិត ធាង បានកើតឡើង ក្រោយមានប្រតិកម្មពីលោកនាយករដ្ឋមន្ត្រី ហ៊ុន សែន ដែលនៅក្នុងអំឡុងពេលនៃការចែកសញ្ញាបត្រមួយកាលពីខែមីនា ឆ្នាំ២០១៩ បានបង្ហាញការភ្ញាក់ផ្អើលចំពោះការរកឃើញគ្រឿងញៀនក្នុងចំនួនច្រើននៅក្លឹបកម្សាន្តរ៉ុក ដែលមានទីតាំងជាប់សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE)។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន ច្រានចោលការរិះគន់របស់ក្រុមសកម្មជនសិទ្ធិមនុស្ស ដោយថាលោក គិត ធាង បានឈ្នះការតវ៉ាប្រឆាំងនឹងសេចក្តីសម្រេចរបស់សាលាដំបូង ក្នុងដំណាក់កាលសាលាឧទ្ធរណ៍ ដែលយល់ស្របនឹងការទាមទារឲ្យលោកបានរួចពីការអនុវត្តទោសក្នុងពន្ធនាគារ ពោលគឺឧកញ៉ារូបនោះ មិនមែនត្រូវបានដោះលែងឲ្យស្ថិតនៅក្រៅឃុំបណ្តោះអាសន្នទេ។
លោកប្រាប់វីអូអេថា៖ «បានន័យថាសាមីខ្លួនគេប្តឹងឧទ្ធរណ៍ ជំទាស់ទៅនឹងការសម្រេចរបស់សាលាដំបូង។ ឥឡូវឧទ្ធរណ៍គេសម្រេច។ គេសម្រេច គ្រាន់ថាការផ្តន្ទាទោសពន្ធនាគារហ្នឹង គេបន្ថយដូចជាមកនៅត្រឹមពីរឆ្នាំ ហើយការឃុំខ្លួនពន្ធនាគាររបស់គាត់ហ្នឹង មកដល់ពេលហ្នឹង គឺវាគ្រប់ពីរឆ្នាំហើយ ហើយទោសដែលនៅសល់ប៉ុន្មានហ្នឹង នៅតែអនុវត្តដែរ ក៏ប៉ុន្តែទោសព្យួរ។ នេះជានីតិវិធីតុលាការ»។
នៅពេលសួរអំពីករណីមួយទៀតរបស់លោក គិត ធាង ដែលត្រូវតុលាការចោទថាមានពាក់ព័ន្ធនឹងការជួញដូរគ្រឿងញៀននោះ លោក ជិន ម៉ាលីន បង្វែរសំណួរទៅសាលាឧទ្ធរណ៍វិញ។
វីអូអេមិនទាន់អាចសុំការអធិប្បាយពីអ្នកនាំពាក្យសាលាឧទ្ធរណ៍ លោក ទូច ថារិទ្ធ និងអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា បានទេ នៅថ្ងៃចន្ទនេះ។
ចំណែកលោក អ៊ី រិន្ទ អ្នកនាំពាក្យសាលាដំបូងរាជធានីភ្នំពេញមិនឆ្លើយតបសំណួរតាមប្រព័ន្ធទំនាក់ទំនងតេឡេក្រាម។
កន្លងទៅ មានសេចក្តីរាយការណ៍ថា លោក គិត ធាង មានជំងឺពេលឃុំខ្លួនក្នុងពន្ធនាគារ ហើយត្រូវបានបញ្ជូនមកខាងក្រៅ ដើម្បីព្យាបាលផងដែរ។
គួរបញ្ជាក់ថា លោក គិត ធាង គឺជាបងប្រុសបង្កើតរបស់អ្នកឧកញ៉ា គិត ម៉េង ដែលជាអ្នកមានលំដាប់ខ្ពស់មួយរូបនៅកម្ពុជា និងជាប្រធានក្រុមហ៊ុន The Royal Group ដែលបានបោះទុនវិនិយោគលើវិស័យជាច្រើន មានទាំងវិស័យទូរគមនាគមន៍ សេវាកម្ម និងអចលនទ្រព្យ។ លោក គិត ម៉េង ក៏បានចូលរួមចំណែកជាថវិកាជាច្រើនដល់រដ្ឋាភិបាលអំឡុងពេលប្រយុទ្ធប្រឆាំងនឹងការរាតត្បាតជំងឺកូវីដ១៩ ដូចជាការទិញវ៉ាក់សាំងចាក់បង្ការជំងឺកូវីដ១៩ជាដើម៕
