គណបក្សកម្ពុជានិយមរបស់ លោក យ៉ែម បុញ្ញឫទ្ធិ និងគណបក្សខ្មែររួបរួមជាតិរបស់ លោក ញឹក ប៊ុនឆៃ បានសម្រេចច្របាច់បញ្ចូលគ្នាជាគណបក្សតែមួយ ដោយយក«គណបក្សខ្មែររួបរួមជាតិ» មកធ្វើជាតំណាងនៃប៉ូលនយោបាយថ្មីគឺ ប៉ូលនយោបាយប្រជាធិបតេយ្យនិយមកណ្តាល សម្រាប់ត្រៀមចូលរួមប្រកួតប្រជែងការបោះឆ្នោតជាតិឆ្នាំ២០២៣។
ការសម្រេចយកតែឈ្មោះ គណបក្សខ្មែររួបរួមជាតិ ខាងលើ ដែលបច្ចុប្បន្នមានលោក ញឹក ប៊ុនឆៃ ជាប្រធាន មកចូលរួមឈរឈ្មោះបោះឆ្នោតនោះ គឺដើម្បីកៀរគរការគាំទ្រពីអ្នកបោះឆ្នោត ដោយមិនប្រកាន់និន្នាការនយោបាយ និងធានាបាននូវឯករាជ្យភាព អធិបតេយ្យភាព និងការពារបូរណភាពទឹកដី។
ប្រធានគណបក្សខ្មែររួបរួមជាតិ លោក ញឹក ប៊ុនឆៃ ប្រាប់អ្នកសារព័ត៌មាននៅក្នុងពិធីចុះហត្ថលេខាស្តីពីការច្របាច់គណបក្សទាំងពីរបញ្ចូលគ្នានៅព្រឹកថ្ងៃចន្ទនេះថា ការរួបរួមគ្នានេះនឹងបង្កើតបានប៉ូលនយោបាយថ្មីមួយ ដោយឈរនៅកណ្តាល និងមិនយកគណបក្សនយោបាយណាមួយមកធ្វើជាសត្រូវ ហើយក៏មិនប្រកាន់យកភូមិសាស្ត្រនយោបាយដែលមានទំនោរទៅកាន់ប្រទេសមហាអំណាចណាមួយនោះផងដែរ។
លោកថ្លែងថា៖ «ប៉ូលនយោបាយថ្មីយើងខ្ញុំថ្មី គឺប៉ូលនយោបាយប្រជាធិបតេយ្យនិយមកណ្តាល គឺថាយើងខ្ញុំមិនលម្អៀងទៅរកខាងនេះដាច់មុខ យកខាងនោះធ្វើជាសត្រូវ ក៏មិនលម្អៀងទៅខាងនោះដាច់មុខ យកខាងនេះធ្វើសត្រូវ គឺគោលនយោបាយរបស់យើងខ្ញុំគឺទំនាក់ទំនងសហប្រត្តិបត្តិការជាមួយបណ្តាបបក្សនយោបាយទាំងអស់ដោយអត់មានការរើសអើង និន្នាការនយោបាយ ពណ៌សម្បុរទេ។ ហើយក៏ធ្វើការទំនាក់ទំនងជាមួយបណ្តាប្រទេសទាំងអស់ក៏ដូចគ្នាដែរ មិនប្រកាន់និន្នាការនយោបាយ ឬពណ៌សម្បុរនយោបាយទេ»។
ចំណែកប្រធានគណបក្សកម្ពុជានិយម លោក យ៉ែម បុញ្ញឫទ្ធិ ថ្លែងថា មូលហេតុដែលគណបក្សកម្ពុជានិយម ច្របាច់បញ្ចូលគ្នា ជាមួយគណបក្សខ្មែររួបរួមជាតិ គឺដើម្បីបង្កើតប៉ូលនយោបាយប្រជាធិបតេយ្យសេរីថ្មីមួយ ដើម្បីប្រមូលផ្តុំកម្លាំងគាំទ្រ ដែលផ្តល់តម្លៃខ្ពស់ដល់របបនយោបាយប្រជាធិបតេយ្យសេរីនិយម។
លោកថ្លែងថា៖ «ការរួបរួមគ្នារវាងអ្នកតស៊ូ លើកកម្ពស់វីរភាពអ្នកតស៊ូ ដើម្បីជាតិ បូករួមអ្នកប្រជាធិបតេយ្យ គឺជាកត្តាចម្បង ហើយសំខាន់បំផុត ព្រោះការតស៊ូរបស់ឯកឧត្តម [ញឹក ប៊ុនឆៃ] គោលដៅតែមួយគត់ ដើម្បីឯករាជ្យ អធិបតេយ្យភាព បូរណភាពទឹកដី និងប្រជាធិបតេយ្យ នេះជាគោលដៅចម្បងដែលយើងសម្រេចរួបរួមគ្នា»។
បើតាមកិច្ចព្រមព្រៀងរវាងគណបក្សខ្មែររួបរួមជាតិ និងគណបក្សកម្ពុជានិយមធ្វើនៅថ្ងៃចន្ទទី១០ ខែតុលា ឆ្នាំ២០២២ នេះ ការរួបរួមរវាងអ្នកតស៊ូដើម្បីជាតិ អ្នកជាតិនិយម អ្នកប្រជាធិបតេយ្យសេរីនិយម គឺមានភាពចាំបាច់ក្នុងដំណើរការកសាងប្រជាធិបតេយ្យសេរី នៅក្នុងប្រទេសកម្ពុជា និងស្របទៅតាមឆន្ទៈប្រជាពលរដ្ឋខ្មែរផងដែរ។
អ្នកវិភាគនយោបាយ លោកបណ្ឌិត មាស នី យល់ថា ការរួមបញ្ចូលគ្នានេះជាការវិវឌ្ឍផ្នែកនយោបាយល្អមួយ ព្រោះគណបក្សតូចៗចាប់ផ្តើមរួមសាមគ្គីគ្នាឡើងវិញ។ ប៉ុន្តែលោកថាការទាក់ទាញសំឡេងគាំទ្រពីម្ចាស់ឆ្នោតបានច្រើនឬយ៉ាងណានោះ គឺមិនទាន់អាចធ្វើការប៉ាន់ស្មានបាននៅឡើយ។
លោកប្រាប់វីអូអេថា៖ «ខ្ញុំគិតថាវាជាដំណើរការវិជ្ជមានមួយ ទោះបីជាយើងគិតថាកម្លាំងទាំងពីរនេះ នៅមានកម្លាំងតូច ក៏ប៉ុន្តែមិនច្បាស់ថា ពេលចូលគ្នាទៅវានឹងនៅកាន់តែតូចទេ [ឬ]អាចទាញចូលគ្នា អាចមានកម្លាំងធំ»។
គួរបញ្ជាក់ថា មុនពេលគណបក្សខ្មែររួបរួមជាតិ ច្របាច់បញ្ចូលគ្នាជាមួយគណបក្សកម្ពុជានិយមនេះ គឺគណបក្សខ្មែររួបរួមជាតិ បានប្រកាសដកខ្លួនចេញពីសម្ព័ន្ធភាពអ្នកប្រជាធិបតេយ្យខ្មែរ ដែលរួមមានគណបក្សសំបុកឃ្មុំសង្គមប្រជាធិបតេយ្យ របស់លោក ម៉ម សូណង់ដូ និងគណបក្សខ្មែរតែមួយ របស់លោក គុជ លី នៅថ្ងៃទី០៩ ខែតុលា ឆ្នាំ២០២២។ គណបក្សខ្មែររួបរួមជាតិនេះអះអាងថា ការចងសម្ព័ន្ធភាពនយោបាយនេះ គឺមិនអាចអនុវត្តទៅបានដោយរលូន នៅក្នុងការបោះឆ្នោតជ្រើសតំណាងរាស្ត្រអាណត្តិទី៧នេះ។
បើតាមប្រធានគណបក្សខ្មែររួបរួមជាតិ លោក ញឹក ប៊ុនឆៃ ការច្របាច់បញ្ចូលគ្នានេះ នឹងអាចធ្វើឱ្យគណបក្សទទួលបានអាសនៈក្នុងរដ្ឋសភា នាការបោះឆ្នោតថ្នាក់ជាតិឆ្នាំ២០២៣ ខាងមុខនេះ៕
