លោក Mevlut Cavusoglu រដ្ឋមន្រ្តីការបរទេសតួកគី បាននិយាយនៅថ្ងៃពុធនេះថា អាជ្ញាធរបានរកឃើញខ្មាន់កាំភ្លើងម្នាក់ដែលបានសម្លាប់មនុស្ស៣៩នាក់នៅក្នុងការវាយប្រហារនៅថ្ងៃបុណ្យចូលឆ្នាំសាកលនៅឯរង្គសាលមួយនៅក្នុងទីក្រុងអ៊ីស្តង់ប៊ុលហើយ។
លោកCavusoglu បានធ្វើការប្រកាសនេះក្នុងអំឡុងនៃការផ្តល់កិច្ចសម្ភាសន៍ជាមួយទីភ្នាក់ងារ Anadolu ដែលចាត់ចែងដោយរដ្ឋ ក៏ប៉ុន្តែ លោកមិនបានផ្តល់ឈ្មោះអ្នកវាយប្រហារនោះទេ។
អាជ្ញាធរ បានស្វែងរកអ្នកបាញ់ប្រហារនោះចាប់តាំងពីព្រឹកថ្ងៃអាទិត្យមកនៅពេលដែលជននោះបានរត់គេចខ្លួនពីរង្គសាល Reina។
បណ្តាញផ្សព្វផ្សាយតួកគីបានផ្សាយវីដេអូកាលពីថ្ងៃអង្គារពីបុរសម្នាក់ដែលពួកគេបាននិយាយថាជាជនសង្ស័យខ្មាន់កាំភ្លើងដែលបានដើរជុំវិញទីលាន Taksim នៃទីក្រុងអ៊ីស្តង់ប៊ុល។ គេមិនទាន់ដឹងច្បាស់នៅឡើយថាតើនៅពេលណាដែលវីដេអូនោះបានថត។ អាជ្ញាធរបានចេញផ្សាយពីរូបភាពរបស់ជនសង្ស័យដែលបានមកពីម៉ាស៊ីនថតសន្តិសុខ។
ទីភ្នាក់ងារព័ត៌មាន Anadolu ក៏បានរាយការណ៍នៅថ្ងៃពុធនេះដែរថាពួកអាជ្ញាធរបានឃុំខ្លួនមនុស្ស៥នាក់ថែមទៀតនៅក្នុងការទាក់ទិនទៅនឹងការវាយប្រហារនេះ។ ជនទាំង៥នាក់នោះត្រូវបានសង្ស័យថាជាសមាជិករបស់ក្រុមរដ្ឋឥស្លាមហើយបានស្ថិតនៅក្នុងការឃុំឃាំងនៅក្នុងទីក្រុង Izmir ភាគខាងលិច។
លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានសំដែងការចូលរួមរំលែកទុក្ខកាលពីថ្ងៃអង្គារអំឡុងពេលនិយាយទូរស័ព្ទជាមួយលោក Recep Tayyip Erdogan ប្រធានាធិបតីនៃប្រទេសតួកគី៕
