លោកប្រធានាធិបតីអាមេរិក ដូណាល់ ត្រាំ គ្មានបំណងនឹងរារាំងលោក James Comey អតីតប្រធាន FBI មិនឲ្យផ្តល់សក្ខីកម្មដល់សភានៅក្នុងសប្តាហ៍នេះ អំពីសន្ទនាសំខាន់ដែលអ្នកទាំងពីរបាននិយាយគ្នាកាលពីដើមឆ្នាំនេះ នៅមុនពេលដែលលោក ត្រាំ បានដេញលោកចេញពីតំណែងនោះទេ។ នេះបើយោងតាមសេតវិមានដែលបានឲ្យដឹងកាលពីថ្ងៃច័ន្ទ។
លោក ត្រាំ បានពិចារណាថាតើគួរប្រើប្រាស់អភ័យឯកសិទ្ធិប្រតិបត្តិទៅលើសន្ទនានៅសេតវិមានរបស់លោកជាមួយនឹងលោក Comey និងមិនអនុញ្ញាតឲ្យលោក Comey ផ្តល់សក្ខីកម្មនៅថ្ងៃព្រហស្បតិ៍នេះ នៅចំពោះមុខគណៈកម្មាធិការស៊ើបការសម្ងាត់របស់ព្រឹទ្ធសភាឬយ៉ាងណា។
ប៉ុន្តែលោកស្រី Sarah Huckabee Sanders អ្នកនាំពាក្យរបស់សេតវិមានបានថ្លែងថា៖ «ដើម្បីសម្របសម្រួលដល់ការពិនិត្យមើលទៅលើការពិតឲ្យបានហ្មត់ចត់» លោក ត្រាំ នឹងមិនព្យាយាមបញ្ឈប់ការផ្តល់សក្ខីកម្មរបស់លោក Comey នោះទេ។
នៅពេលដែលលោក ត្រាំ បញ្ឈប់ការងាររបស់លោក Comey កាលពីមួយខែមុន លោក Comey ដឹកនាំការស៊ើបអង្កេតរបស់ការិយាល័យស៊ើបអង្កេតសហព័ន្ធទៅលើការជ្រៀតជ្រែករបស់រុស្ស៊ីនៅក្នុងយុទ្ធនាការបោះឆ្នោតរបស់ប្រធានាធិបតីកាលពីឆ្នាំមុន និងលទ្ធភាពដែលអាចមានការឃុបឃិតគ្នាដោយខុសច្បាប់រវាងជំនួយការយុទ្ធនាការបោះឆ្នោតរបស់លោក Comey និងរុស្ស៊ី ដែលមានគោលបំណងជួយឲ្យលោក ត្រាំ យកឈ្នះលើគូប្រជែងខាងគណបក្សប្រជាធិបតេយ្យរបស់លោក គឺលោកស្រី Hillary Clinton អតីតរដ្ឋមន្ត្រីក្រសួងការបរទេសអាមេរិក៕
