លោកប្រធានាធិបតីសហរដ្ឋអាមេរិក ដូណាល់ ត្រាំ បានសន្យាកាលពីថ្ងៃសុក្រថា អ្នកទទួលខុសត្រូវចំពោះផ្ញើកញ្ចប់សង្ស័យជាគ្រាប់បែកទៅឲ្យអតីតប្រធានាធិបតី បារ៉ាក់ អូបាម៉ា មន្រ្តីជាន់ខ្ពស់ផ្សេងៗទៀតរបស់គណបក្សប្រជាធិបតេយ្យ និងក្រុមអ្នករិះគន់ប្រធានាធិបតីត្រាំនឹងត្រូវកាត់ទោសទៅតាមច្បាប់។
លោកប្រធានាធិបតីត្រាំបានប្រាប់ក្រុមមនុស្សប្រកបដោយការសាទរមួយដែលចូលរួមសន្និសីទកំពូលភាពជាមេដឹកនាំរបស់យុវជនស្បែកខ្មៅនៅឯសេតវិមានថា៖ «អ្នកដែលបង្កសកម្មភាពភេរវកម្មទាំងនោះគួរឲ្យស្អប់ហើយមិនមានទីកន្លែងនៅក្នុងប្រទេសរបស់យើងទេ។ យើងមិនដែលអនុញ្ញាតិឲ្យមានអំពើហិង្សាខាងនយោបាយចាក់ឬសនៅក្នុងប្រទេសអាមេរិកទេ»។
មន្រ្តីម្នាក់របស់ក្រសួងយុត្តិធម៌សហរដ្ឋអាមេរិកប្រាប់ឲ្យដឹងកាលពីថ្ងៃសុក្រថា ក្រុមអាជ្ញាធរសហព័ន្ធបានចាប់ខ្លួនមនុស្សម្នាក់នៅក្នុងការទាក់ទិនទៅនឹងកញ្ចប់សង្ស័យចំនួន១២ដែលផ្ញើរតាមប៉ុស្តិ៍។ លោកស្រី Sarah Isgur Flores អ្នកនាំពាក្យក្រសួងយុត្តិ ធម៌បាននិយាយថា អាជ្ញាធរមានគម្រោងប្រកាសព័ត៌មានបន្ថែមទៀតនៅឯសន្និ សីទកាសែតមួយនៅរសៀលថ្ងៃសុក្រម៉ោងនៅសហរដ្ឋអាមេរិក។
តាមបណ្តាញព័ត៌មានមួយចំនួនដែលបានដកស្រង់សម្តីអាជ្ញាធរពង្រឹងច្បាប់មកចុះផ្សាយថា ជនដែលត្រូវចាប់ខ្លួននោះបានត្រូវគេប្រាប់ឈ្មោះថា Cesar Alteri Sayoc Jr. អាយុ៥៦ឆ្នាំបានចុះឈ្មោះជាអ្នកសាធារណរដ្ឋនៅរដ្ឋ Florida។ កំណត់ត្រាតុលា ការបង្ហាញថា Sayoc មានប្រវត្តិឧក្រិដ្ឋកម្មយ៉ាងវែង រួមមានការកាត់ទោសពីការគំរាមកំហែងនៅឆ្នាំ២០០២ពីការគប់និងដាក់គ្រឿងផ្ទុះ។ លោកRonald Lowy មេធាវីរដ្ឋ Florida ដែលតំណាងឲ្យ Sayoc បាននិយាយថា កូនក្តីរបស់លោកបានត្រូវតុលាការកាត់ទោសកាលពីខែសីហា ឆ្នាំ២០០២ ពីការគំរាមកំហែងចោលគ្រាប់បែកក្នុងអំឡុងនៃការសន្ទនាជាមួយតំណាងរដ្ឋ៕
