នៅពេលដែលក្បួនក្រុមជនចំណាកស្រុកមកពីតំបន់កណ្តាលនៃទ្វីបអាមេរិកកំពុងដើរទៅកាន់ព្រំដែនខាងជើងនៃប្រទេសម៉ិកស៊ិក លោកប្រធានាធិបតីស.រ.អា. Donald Trump បានហៅសេចក្តីសង្ឃឹមនៃក្រុមជនទាំងនេះក្នុងការចូលមកក្នុងប្រទេសអាមេរិកថាជា «ភាពមានអាសន្នរបស់ជាតិ»។
សមាជិកជាង២ពាន់នៃកងឆ្មាំជាតិបានត្រូវដាក់ពង្រាយរួចស្រេចហើយនៅក្នុងតំបន់នោះ។ ក៏ប៉ុន្តែទោះជាយ៉ាងណាក៏ដោយក៏កាលពីថ្ងៃព្រហស្បតិ៍លោក Donald Trump បានព្រមានថាលោកនឹងបញ្ជូនក្រុមទាហានទៅកាន់ព្រំដែនដើម្បីរារាំងក្បួនទូរចរនេះកុំឱ្យចូលក្នុងស.រ.អា.។
លោក Trump បានសរសេរតាម Twitter ថា «ខ្ញុំនឹងបញ្ជូនទាហានសម្រាប់ភាពមានអាសន្ននេះរបស់ជាតិ។ ជនចំណាកស្រុកទាំងនេះត្រូវតែបញ្ឈប់!»។លោក Trump ក៏បានយល់ស្របជាមួយមន្ត្រីម្នាក់នៃសហជីពក្រុមអ្នកយាមល្បាតព្រំដែនដែលថាគេគួរបន្ទោសប្រជាធិបតេយ្យអំពីបញ្ហាពួកជនចំណាកស្រុកដែលស្វះស្វែងមកជ្រកកោនក្នុងស.រ.អា.។
លោក Trump ក៏បានរិះគន់ប្រទេសហុងឌូរ៉ាស អែលសាវ៉ាឌ័រនិងប្រទេសក្វាតេម៉ាឡាដែលមិនបានបញ្ឈប់ពលរដ្ឋខ្លួនមិនឱ្យចាកចេញពីប្រទេសពួកគេមកកាន់ស.រ.អា.។ លោកប្រធានាធិបតីបាននិយាយកាលពីថ្ងៃចន្ទថាលោកនឹងចាប់ផ្តើមកាត់ផ្តាច់ឬបន្ថយជំនួយបរទេសដល់ប្រទេសទាំងនេះហើយលោកបានគំរាមកំហែងកាលពីសប្តាហ៍មុនថានឹងប្រើទាហានឱ្យបិទព្រំដែនផងដែរ៕
