លោកប្រធានាធិបតីសហរដ្ឋអាមេរិក ដូណាល់ ត្រាំ ទំនងជាកំពុងធ្វើការតថ្លៃដ៏ធំមួយជាមួយប្រធានាធិបតីចិន ស៊ី ជីងពីង ដែលក្នុងកិច្ចព្រមព្រៀងនីមួយៗនឹងទទួលបានអ្វីដែលលោកប្រធានាធិបតីចិនចង់បាន ដូចជាការធានាខាងស្ថិរភាពសេដ្ឋកិច្ចមុន ពេលសមាជគណបក្សកុម្មុយនិស្តដ៏សំខាន់មួយនៅក្នុងការដោះដូរដើម្បីឲ្យចិនជួយក្នុងការទប់ស្កាត់កម្មវិធីនុយក្លេអ៊ែររបស់ប្រទេសកូរ៉េខាងជើង។
សំណើនោះកើតមានឡើងនៅក្នុងកិច្ចសម្ភាសន៍ជាមួយទូរទស្សន៍ និងការចុះផ្សាយនៅក្នុងបណ្តាញព័ត៌មានសង្គមនៅសប្តាហ៍នេះ។ នៅក្នុងសារតាមប្រព័ន្ធ Twitter ចំនួន ២ដែលបានចុះផ្សាយនៅសប្តាហ៍នេះ លោកប្រធានាធិបតីត្រាំបានស្នើថា លោកនឹងយល់ព្រមមិនចាប់ផ្តើមគំរាមកំហែងធ្វើសង្គ្រាមពាណិជ្ជកម្មជាមួយប្រទេសចិនទេ ដើម្បីជួយធ្វើឲ្យប្រាកដថា សេដ្ឋកិច្ចក្នុងប្រទេសចិនខ្លាំងនៅពេលដែលគណបក្សកាន់អំណាចរបស់ចិនសើរើពិនិត្យមើលឡើងវិញនូវសមទ្ធិផលរបស់លោកប្រធានាធិបតី ស៊ី ជីងពីង ហើយនិងការសម្រេចថាតើលោកស្ថិតនៅបន្តកាន់អំណាចឬទេ។ លោកប្រធានាធិបតីត្រាំនិយាយថា អ្វីដែលប្រធានាធិបតីស៊ីត្រូវធ្វើគឺដោះស្រាយបញ្ហាកូរ៉េ។
លោកប្រធានាធិបតីត្រាំបាននិយាយតាមសារ Twitterថា «ខ្ញុំបានពន្យល់ទៅប្រធានាធិបតីចិនថា កិច្ចព្រមព្រៀងពាណិជ្ជកម្មជាមួយសហរដ្ឋអាមេរិក នឹងកាន់តែប្រសើរឡើងសម្រាប់ប្រទេសចិន ប្រសិនបើពួកគេ ដោះស្រាយបញ្ហាកូរ៉េខាងជើងនោះ។
ក្នុងសារតាមប្រព័ន្ធ Twitterទី២ ប្រធានាធិបតីដូណាល់ ត្រាំនិយាយថា «ប្រទេសកូរ៉េខាងជើងកំពុងស្វែងរកបញ្ហាសម្រាប់ខ្លួនឯង។ ប្រសិនបើ ចិនសម្រេចជួយ ការណ៍នេះនឹងក្លាយជាការណ៍អស្ចារ្សណាស់។ ប្រសិនបើអត់ យើងនឹងដោះស្រាយបញ្ហានេះដោយគ្មានចិន»។
លោកBalbina Hwangធ្លាប់បានបម្រើការងារជាទីប្រឹក្សាពិសេសនៅក្រសួងការបរទេសអាមេរិកទទួលបន្ទុកកិច្ចការអាស៊ីខាងកើតក្នុងរដ្ឋបាលរបស់លោក George W Bush បាននិយាយថា ការស្នើរបស់ប្រធានាធិបតីត្រាំនេះ ហាក់ដូចជាធ្វើឲ្យមានការលំបាកដល់រដ្ឋាភិបាលក្រុងប៉េកាំង៕
