ក្នុងខណៈពេលដែលសមាជិកនៃក្រុមរៀបចំការផ្ទេរតំណែងរបស់លោក Trump កំពុងជជែកដេញដោលចំពោះអ្នកដែលគួរកាន់តំណែងធ្វើជារដ្ឋមន្ត្រីក្រសួងការបរទេស លោក Trump បានបន្តតែងតាំងបុគ្គលពីររូបទៀតកាលពីថ្ងៃសុក្រម្សិលម៉ិញនេះ។
លោកស្រី Kathleen Troia McFarland ឬ KT McFarland នឹងធ្វើជាអនុទីប្រឹក្សាសន្តិសុខជាតិ ហើយលោក Donald F.McGahn នឹងធ្វើជាជំនួយការប្រធានាធិបតីនិងទីប្រឹក្សាសេតវិមាន។
មុខតំណែងទាំងពីរមិនចាំបាច់ត្រូវការការអនុម័តពីព្រឹទ្ធសភានោះទេ។
នៅក្នុងសេចក្តីថ្លែងការណ៍មួយ លោក Trump បានលើកឡើងពីបទពិសោធន៍និងទេពកោសល្យដ៏អស្ចារ្យរបស់លោកស្រី McFarland ហើយថា លោកស្រីមានផ្នត់គំនិតស្របច្បាប់ដ៏ឈ្លាសវៃ អាកប្បកិរិយាដ៏ល្អ ហើយនិងមានការយល់ដឹងយ៉ាងជ្រាលជ្រៅចំពោះច្បាប់រដ្ឋធម្មនុញ្ញ»។
លោកស្រីធ្វើជាអ្នកវិភាគសន្តិសុខជាតិនិងជាអ្នកសរសេរព័ត៌មានឲ្យទូរទស្សន៍ Fox News។ លោកស្រីធ្លាប់ឈរឈ្មោះធ្វើជាសមាជិកព្រឹទ្ធសភាឲ្យរដ្ឋ New York កាលពីឆ្នាំ២០០៦ ប៉ុន្តែមិនបានទទួលជោគជ័យនោះទេ។
ចំណែកឯលោក McGahn ដែលជាអតីតប្រធានគណៈកម្មការៀបចំការបោះឆ្នោតសហព័ន្ធ ហើយធ្លាប់ធ្វើជាមេធាវីរបស់លោក Trump ក្នុងអំឡុងពេលយុទ្ធនាការ។
រហូតមកដល់ពេលនេះអ្នកណានឹងក្លាយជារដ្ឋមន្ត្រីក្រសួងការបរទេសក្រោមការគ្រប់គ្រងរបស់លោក Trump នៅមិនទាន់ដឹងនៅឡើយនោះទេ រហូតទាល់តែការបែកបាក់គ្នានៅក្នុងក្រុមរៀបចំការផ្ទេរតំណែងនេះអាចដោះស្រាយរួចរាល់សិន។
ក្រុមជំទាស់ទាំង២នៅក្នុងក្រុមការងាររៀបចំដំណើរការផ្ទេរតំណែងរបស់លោកប្រធានាធិបតីជាប់ឆ្នោតត្រូវបានបែងចែកជា២រវាងបេក្ខជនប្រធានាធិបតីខាងគណបក្សសាធារណរដ្ឋកាលពីឆ្នាំ២០១២ លោក Mitt Romney និងអតីតអភិបាលក្រុងញូវយ៉កលោក Rudolph Giuliani។
នៅក្នុងសារមួយដែលបង្ហោះលើបណ្តាញសង្គម Twitter កាលពីថ្ងៃព្រហស្បតិ៍ ទីប្រឹក្សារបស់លោកTrump លោកស្រី Kellyanne Conway បានបង្ហាញមនោសញ្ចេតនាប្រឆាំងនឹងលោក Romney។ លោកស្រី Conway បានមានប្រសាសន៍ថា លោកស្រីបានទទួលនូវក្តីបារម្ភពីមនុស្សម្នាដែលចោទសួរទៅលើភាពស្មោះត្រង់របស់លោក Romney ដែលជាអតីតអភិបាលរដ្ឋ Massachusetts ដែលបានហៅលោក Trump ថាជាមនុស្សក្លែងក្លាយក្នុងអំឡុងពេលនៃការធ្វើយុទ្ធនាការបោះឆ្នោត៕
