ភ្ជាប់​ទៅ​គេហទំព័រ​ទាក់ទង

លោក​ប្រធានាធិបតី Trump នឹង​បង្កើត​ទំនាក់ទំនង​ដែល​មាន​ការ​ជួយ​គ្នា​ជាមួយ​នឹង​ប្រទេស​ចិន


លោក​ប្រធានាធិបតី Donald Trump ថ្លែង​ក្នុង​កិច្ចប្រជុំ​មួយ​ជាមួយ​នឹង​ប្រធាន​តម្រួត​តំបន់​នៅ​ក្នុង​សេតវិមាន ក្នុង​រដ្ឋធានី​វ៉ាស៊ីនតោន កាលពី​ថ្ងៃទី៧ ខែកុម្ភៈ ឆ្នាំ២០១៧។

លោក​ប្រធានាធិបតី​ស.រ.អា. Donald Trump បាន​និយាយ​ថា ​លោក​នឹង​អភិវឌ្ឍន៍​ «ទំនាក់ទំនង​មួយ​ប្រកប​ដោយ​ការ​ស្ថាបនា​ដែល​ផ្តល់​អត្ថប្រយោជន៍​ដល់​ស.រ.អា. និង​ប្រទេស​ចិន»។

សេតវិមាន​បាន​និយាយ​នៅ​ក្នុង​សេចក្តី​ថ្លែងការណ៍​មួយ​កាលពី​ថ្ងៃ​ពុធ​ថា លោក Trump បាន​សម្តែង​មនោសញ្ចេតនា​នេះ​នៅ​ក្នុង​សារ​លិខិត​មួយ​ច្បាប់​ផ្ញើ​ទៅ​ជូន​លោក​ប្រធានាធិបតី​ចិន Xi Jinping។

សេតវិមាន​បាន​និយាយ​ដែរ​ថា ​លោក​ Trump បាន​អរគុណ​លោក​ Xi ចំពោះ​លិខិត​មួយ​ច្បាប់​ដែល​លោក​ប្រធានាធិបតី​ចិន​បាន​សរសើរ​លោក​នៅ​ពេល​លោក​សម្ពោធ​ចូល​កាន់​តំណែង​កាល​ពី​ខែ​មុន។ លោក Trump ក៏​បាន​ជូនពរ​ដល់​ប្រជារាស្ត្រ​ចិន​ «ឱ្យ​បាន​សប្បាយ​រីករាយ​ក្នុង​ពិធីបុណ្យ​អុជ​គោម និង​ឱ្យ​មាន​ភាព​សម្បូរ​រុងរឿង​ក្នុង​ឆ្នាំ​រកា​ផង​ដែរ»។

លោក Lu Kang អ្នកនាំពាក្យ​នៃ​ក្រសួង​ការបរទេស​ចិន​បាន​និយាយ​នៅ​ថ្ងៃ​ព្រហស្បតិ៍​នេះ​ថា​ ប្រទេស​ចិន​អរគុណ​ដល់​សារលិខិត​របស់​លោក Trump ហើយ​ថា​ ចិន​ចង់​ធ្វើ​ការ​ជាមួយ​ស.រ.អា.​ដើម្បី​ឧបត្ថម្ភ​ផ្ចុង​ផ្តើម​កិច្ច​សហប្រតិបត្តិការ និង​អភិវឌ្ឍន៍​ចំណង​ទាក់ទង​គ្នា​ឱ្យ​បាន​ជិតស្និទ្ធ​ជាង​មុន​ថែម​ទៀត។

មេដឹកនាំ​ស.រ.អា.​ និង​ចិន​ទាំង​ពីរ​នាក់​នេះ​មិន​បាន​និយាយ​គ្នា​ទេ​ចាប់​តាំង​ពី​លោក​ Trump បាន​ក្លាយ​ទៅ​ជា​ប្រធានាធិបតី​អាមេរិកាំង​ ក៏​ប៉ន្តែ​លោក Kang បាន​ថ្លែង​ថា​ ប្រទេស​ទាំង​ពីរ​បាន​ថែរក្សា​ឱ្យ​មាន «ការ​ទាក់ទង​គ្នា​យ៉ាង​ជិត​ស្និទ្ធ»៕

XS
SM
MD
LG