ប្រធានាធិបតីសហរដ្ឋអាមេរិកលោក Donald Trump បាននិយាយថា សហរដ្ឋអាមេរិក «កំពុងធ្វើបានល្អ» នៅក្នុងការបង្កើតវ៉ាក់សាំងការពារជំងឺកូវីដ១៩ ស្របពេលដែលមន្ទីរពិសោធន៍មួយនៅរដ្ឋ North Carolina បានចាប់ផ្ដើមផលិតវ៉ាក់សាំងដែលមានសង្ឃឹមកាលពីថ្ងៃច័ន្ទម្សិលមិញ។
លោក Trump បានធ្វើទស្សនកិច្ចទៅកាន់មន្ទីរពិសោធន៍នោះនៅក្រៅទីក្រុង Raleigh។ មន្ទីរពិសោធន៍នេះនឹងចាប់ផ្ដើមផលិតវ៉ាក់សាំងដើម្បីពិសោធន៍លើមនុស្ស ៣ ម៉ឺននាក់ នៅរដូវស្លឹកឈើជ្រុះនៅពេលខាងមុខនេះ។
ក្រុមហ៊ុន Fujifilm Diosynth កំពុងផលិតវ៉ាក់សាំងការពារជំងឺកូវីដ១៩ ឲ្យក្រុមហ៊ុន Novavax នៅទីក្រុង Gaithersburg រដ្ឋ Maryland ដែលបានបង្កើតវ៉ាក់សាំងនេះ។
ក្រុមហ៊ុន Novavax ទទួលបានថវិកាចំនួន ១ ពាន់ ៦ រយលានដុល្លារពីរដ្ឋាភិបាលសហព័ន្ធ ដែលជាផ្នែកមួយនៃកិច្ចប្រឹងប្រែងបង្កើនល្បឿនបង្កើតវ៉ាក់សាំងការពារជំងឹកូវីដ១៩។
រដ្ឋបាលរបស់លោក Trump បានចាប់ផ្ដើមកម្មវិធី Operation Warp Speed ដែលជាកម្មវិធីមួយដែលវ៉ាក់សាំងការពារជំងឺកូវីដ១៩ ជាច្រើនកំពុងបង្កើតឡើងក្នុងពេលជាមួយគ្នា ក្នុងក្ដីសង្ឃឹមថានឹងទទួលបានវ៉ាក់សាំងដ៏មានសុវត្ថិភាព និងប្រសិទ្ធភាពចំនួន ៣០០ លានដូស នៅត្រឹមខែមករា ឆ្នាំក្រោយ។
ស្របពេលដែលលោក Trump កំពុងធ្វើទស្សនកិច្ចនៅរដ្ឋ North Carolina លោកអនុប្រធានាធិបតី Mike Pence ស្ថិតនៅទីក្រុង Miami រដ្ឋ Florida ដែលនៅទីនោះ ការពិសោធន៍វ៉ាក់សាំងការពារជំងឺកូវីដ១៩ មួយទៀត ដែលបានបង្កើតរួមគ្នាដោយវិទ្យាស្ថានជាតិសុខាភិបាលសហរដ្ឋអាមេរិក និងក្រុមហ៊ុន Moderna បានចាប់ផ្ដើមកាលពីថ្ងៃច័ន្ទម្សិលមិញ៕
