ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ប្រធានា​ធិបតី​អាមេរិក​​និយាយ​ថា លោក Shanahan លាចេញ​ពី​តំណែង​ជា​រដ្ឋមន្រ្តី​ការពារ​ប្រទេស​ស្តីទី


រូបឯកសារ៖ រដ្ឋមន្រ្តីការពារជាតិស្តីទីអាមេរិកលោក Patrick Shanahan ថ្លែងទៅកាន់ក្រុមអ្នកសារព័ត៌មាននៅវិមានសភាអាមេរិក ក្នុងរដ្ឋធានីវ៉ាស៊ីនតោន កាលពីថ្ងៃទី២១ ខែឧសភា ឆ្នាំ២០១៩។

លោក​ប្រធានាធិបតី​ Trump ​មិនមាន​រដ្ឋ​មន្រ្តីការ​ពារ​ប្រទេស​អចិន្រ្តៃយ៍​ ចាប់​តាំង​ពី​លោក James Mattis លាចេញ​ពី​ដំណែង​មក។

ប្រធានា​ធិបតី​សហរដ្ឋ​អាមេរិក​លោក ដូណាល់ ​ត្រាំ ​បាន​ប្រកាស​កាល​ពី​ថ្ងៃ​អង្គារ​ថា ​លោក Patrick Shanahan បាន​ដក​ខ្លួន​ចេញ​ពីការ​ពិចារណា​ជារដ្ឋ​មន្រ្តីការ​ពារ​ប្រទេស​សហរដ្ឋ​អាមេរិក។ លោក​ ត្រាំ​ និយាយ​ទៀត​ថា លោក​ចង់​ចំណាយ​ពេល​កាន់​តែ​ច្រើន​ឡើង​ជាមួយ​ក្រុម​គ្រួសារ​របស់​លោក។

ប្រធានា​ធិបតី ​ត្រាំ​ និយាយ​ទៀត​ថា លោក Mark Esper នាយ​អគ្គ​កងទ័ព​ជើងគោក​នឹង​ជំនួស​លោក Shanahan ជា​រដ្ឋមន្រ្តី​ការពារ​ប្រទេស​អាមេរិក​ស្តីទី។

លោក Esper ត្រូវ​បាន​គេជឿ​ជាក់​ថា ​ជា​គូ​ប្រកួតប្រជែង​នាំ​មុខ​ជា​រដ្ឋមន្រ្តី​ក្រសួង​ការពារ​ប្រទេស ប្រសិន​បើ​លោក Shanahan មិន​បាន​ទទួល​ការតែងតាំង​ពី​ព្រឹទ្ធ​សភា​សហរដ្ឋ​អាមេរិក​នោះ​ទេ។

កាសែត USA Today បាន​រាយការណ៍​កាល​ពី​ថ្ងៃ​អង្គារ​ថា ​ការិយាល័យ​ស៊ើប​អង្កេត​សហព័ន្ធ (FBI) ​បាន​ធ្វើ​ការ​ស៊ើបអង្កេត​ជម្លោះ​ដែល​មាន​រយៈ​ពេល​៩​ឆ្នាំ​រវាង​លោក Shanahan និង​លោកស្រី Kimberly ដែល​កាល​នោះ​ជាភរិយា​របស់​លោក ​ដែល​ជា​ផ្នែក​មួយ​នៃ​ការ​ពិនិត្យ​ប្រវត្តិរូប​មុនពេល​សវនាការ​ទទួល​ការតែង​តាំង​ពី​ព្រឹទ្ធសភា។

កាសែត USA Today រាយការណ៍​ទៀត​ថា លោក Shanahan និង​អតីត​ភរិយារបស់​លោក បាន​បញ្ជាក់​ក្នុង​បណ្តឹង​តុលាការ​និង​របាយការណ៍​របស់​ប៉ូលិស​ថា ជម្លោះ​នោះ​បាន​រីក​កាន់​តែ​ធំឡើង។

​ការ​ដក​ខ្លួន​របស់​លោក Shanahan ពី​ការ​ពិចារណា ​កើត​មាន​ឡើង​នៅពេល​ដែល​មាន​ការ​កើនឡើង​នូវការ​តានតឹង​របស់​សហរដ្ឋ​អាមេរិក​ជាមួយ​អ៊ីរ៉ង់។

លោក​ប្រធានាធិបតី​ ត្រាំ ​មិនមាន​រដ្ឋ​មន្រ្តីការ​ពារ​ប្រទេស​អចិន្រ្តៃយ៍​ចាប់​តាំង​ពី​លោក James Mattis លាចេញ​ពី​ដំណែង​មក៕

XS
SM
MD
LG