ប្រធានាធិបតីសហរដ្ឋអាមេរិកលោក ដូណាល់ ត្រាំ ថ្លែងកាលពីថ្ងៃព្រហស្បតិ៍ថា លោកខកចិត្តនឹងប្រទេសចិនចំពោះការដែលចិនខកខានមិនបានទប់ស្កាត់ជំងឺកូវីដ១៩ ដោយលោកថា ការឆ្លងរាតត្បាតជុំវិញពិភពលោកនៃវីរុសកូរ៉ូណាដែលបង្កជំងឺនេះនឹងធ្វើឲ្យល្អក់កករដល់ការចរចាកិច្ចព្រមព្រៀងពាណិជ្ជកម្មជាមួយរដ្ឋាភិបាលទីក្រុងប៉េកាំង។
នៅក្នុងបទសម្ភាសន៍មួយដែលផ្សាយតាមទូរទស្សន៍ Fox Businesses លោកត្រាំថា លោកខកចិត្តយ៉ាងខ្លាំងជាមួយប្រទេសចិន ដែលអាមេរិកបានសម្រេចកិច្ចព្រមព្រៀងខ្លះហើយ និងខកចិត្តចំពោះលោកប្រធានាធិបតី Xi Jinping ដែលកន្លងមកលោកត្រាំអះអាងថា លោកមានទំនាក់ទំនងល្អជាមួយលោក Xi។
ក្រោមលក្ខខណ្ឌនៃដំណាក់កាលទី១នៃកិច្ចព្រមព្រៀងពាណិជ្ជកម្មដែលត្រូវបានចុះហត្ថលេខាកាលពីខែមករា ប្រទេសចិនបានសន្យាទិញផលិតផលនិងសេវាកម្មអាមេរិកតម្លៃយ៉ាងតិច២០០ពាន់លានដុល្លារ ក្នុងរយៈពេលពីរឆ្នាំ ខណៈដែលរដ្ឋាភិបាលក្រុងវ៉ាស៊ីនតោនព្រមបន្ថយពន្ធខ្លះលើទំនិញនាំចូលពីចិន។
វីរុសកូរ៉ូណាប្រភេទថ្មីបានចាប់ផ្តើមឆ្លងរាលដាលដោយស្ងាត់ៗពីទីក្រុងវូហានប្រទេសចិនកាលពីខែធ្នូ គឺក្នុងអំឡុងបរិបទដែលសហរដ្ឋអាមេរិកនិងចិនកំពុងចរចាសម្រេចបានកិច្ចព្រមព្រៀងពាណិជ្ជកម្មដំណាក់កាលទី១។
កាសែតរបស់រដ្ឋចិនមួយរាយការណ៍ថា ទីប្រឹក្សារដ្ឋាភិបាលនៅក្រុងប៉េកាំងខ្លះចង់ឲ្យប្រទេសចិនចរចាកិច្ចព្រមព្រៀងជាមួយអាមេរិកឡើងវិញ ប៉ុន្តែលោកត្រាំថ្លែងម្តងទៀតថា លោកមិនចាប់អារម្មណ៍ចរចាឡើងវិញទេ៕
