លោកប្រធានាធិបតីសហរដ្ឋអាមេរិក ដូណាល់ ត្រាំនិងលោកស្រីអធិការបតីអាល្លឺម៉ង់ Angela Merkel បានចាប់ដៃគ្នាដ៏កក់ក្តៅនៅពេលបញ្ចប់ជំនួបដើម្បីស្គាល់គ្នាដែលមានភាពមិនស្រួលនៅសេតវិមានកាលពីថ្ងៃសុក្រម្សិលមិញដែលហាក់ដូចជាប្រាប់ឲ្យដឹងពីការលំបាកនៅខាងមុខសម្រាប់ទំនាក់ទំនងឆ្លងកាត់មហាសមុទ្រអាត្លង់ទិកនេះ។
លោកប្រធានាធិបតីត្រាំនិងលោកស្រីអធិការបតី Merkel ដែលត្រូវបានគេចាត់ទុកជាមេដឹកនាំដ៏មានអំណាច២នៅក្នុងពិភពលោកខាងលិច ទំនងគេចចេញផុតពីការចាប់ផ្តើមដ៏លំបាកនៅក្នុងជំនួបទល់មុខគ្នាលើកដំបូងរបស់ពួកគេ។ ពួកគេមិនបានចាប់ដៃគ្នានៅពេលអង្គុយថតរូបនៅក្នុងការិយាល័យរាងពងក្រពើបន្ទាប់ពីការបើកការសន្ទនា។
ទោះជាយ៉ាងណាក៏ដោយ នៅឯសន្និសីទកាសែតក្រោយមក បន្ទាប់ពីការចរចាអស់រយៈពេល២ម៉ោង មេដឹកនាំទាំង២បានធ្វើសេចក្តីថ្លែងការណ៍ដែលនឹងបន្ធូរបន្ថយការព្រួយកង្វល់។
លោក Charles Kupchan អ្នកសិក្សាស្រាវជ្រាវនៅឯក្រុមប្រឹក្សាទំនាក់ទំនងបរទេសនិយាយថា «អស់លោកជាមេដឹកនាំស៊ីវិល។ ពួកគាត់មិនបានបង្ហាញភាពដូចគ្នាណាមួយទេ ហើយគេអាចមើលដឹងថា មានការខ្វែងគំនិតគ្នាគួរឲ្យកត់សម្គាល់នៅក្នុងជំនួបនេះ»។
លោកប្រធានាធិបតីត្រាំមិនបានលើកយកការរិះគន់លោកស្រី Merkel ដែលលោកបានធ្វើនៅពេលដែលលោកឈរឈ្មោះប្រធានាធិបតីកាលពីឆ្នាំទៅ នៅពេលដែលលោកបាននិយាយថា គោលនយោបាយរបស់លោកស្រីអធិការបតីនៃការស្វាគមន៍ជនអន្តោប្រវេសន៍បានបំផ្លាញប្រទេសរបស់លោកស្រីហើយនឹងផ្នែកភាគច្រើនរបស់តំបន់អឺរ៉ុប៕
