ប្រធានាធិបតីសហរដ្ឋអាមេរិកលោក Donald Trump កាលពីថ្ងៃចន្ទបានលើកឡើងថា ក្រុមមន្ត្រីពង្រឹងការអនុវត្តច្បាប់មានជាប់ពាក់ព័ន្ធនឹងសកម្មភាពក្បត់ជាតិនៅពេលដែលពួកគេជំរុញឲ្យធ្វើវិសោធនកម្មរដ្ឋធម្មនុញ្ញកាលពីឆ្នាំ២០១៧ ដើម្បីដកលោកចេញពីតំណែង ខណៈបើកការស៊ើបអង្កេតមួយប្រឆាំងនឹងរូបលោក។
លោក Trump បាននិយាយរិះគន់អតីតនាយកការិយាល័យស៊ើបអង្កេតសហព័ន្ធស្តីទីលោក Andrew McCabe អ្នកដែលបានប្រាប់ទៅសារព័ត៌មាន CBS នៅក្នុងកម្មវិធីមួយដែលមានរយៈ៦០នាទីកាលពីថ្ងៃអាទិត្យ ដែលនៅក្នុងកម្មវិធីនោះលោក និងអនុរដ្ឋមន្ត្រីក្រសួងយុត្តិធម៌លោក Rod Rosenstein បានពិភាក្សាគ្នាអំពីការវិសោធនកម្មរដ្ឋធម្មនុញ្ញទី២៥ដែលនឹងអនុញ្ញាតឲ្យអនុប្រធានាធិបតី និងក្រុមសំឡេងភាគច្រើននៃសមាជិកគណៈរដ្ឋមន្ត្រី១៥នាក់អាចប្រកាសថា ប្រធានាធិបតីអសមត្ថភាពដោះស្រាយការងារក្នុងនាមជាប្រធានាធិបតី និងអនុញ្ញាតឲ្យអនុប្រធានាធិបតីធ្វើជាប្រធានាធិបតីស្តីទីបាន។
លោក McCabe បាននិយាយថាវាប្រហែលជាបទឧក្រិដ្ឋនៅពេលលោកTrump បានបណ្តេញលោក James Comey នាយកការិយាល័យស៊ើបអង្កេតសហព័ន្ធកាលពីខែឧសភាឆ្នាំ២០១៧ ដែលនៅពេលនោះលោក Comey កំពុងដឹកនាំការស៊ើបអង្កេតរបស់ទីភ្នាក់ងារនៅក្នុងទំនាក់ទំនងរវាងយុទ្ធការបោះឆ្នោតរបស់លោក Trumpជាមួយនឹងប្រទេសរុស្ស៊ីនៅ អំឡុងពេលបោះឆ្នោតប្រធានាធិបតីកាលពីឆ្នាំ២០១៦។ នៅប៉ុន្មានថ្ងៃក្រោយមកលោក Trump បាននិយាយថាលោកសម្រេចចិត្តបណ្តេញលោក Comey ចេញពីតំណែងនៅពេលដែលលោកគិតអំពីបញ្ហារុស្ស៊ី។
លោក McCabe ដែលក្រោយមកត្រូវបានដកចេញពីតំណែងបន្ទាប់ពីមប្រើការងារឲ្យទីភ្នាក់ងារ FBI អស់រយៈពេល២១ឆ្នាំនោះបាននិយាយថា «ការលើកឡើងអំពីវិសោធនកម្មនេះគឺថា ប្រសិនបើប្រធានាធិបតីបានរារាំងដល់ក្រសួងយុត្តិធម៌នៅក្នុងដំណើរការស៊ើបអង្កេត បានបណ្តេញនាយក FBI ដើម្បីធ្វើឲ្យប៉ះពាល់ ឬឈានទៅដល់បិទការស៊ើបង្កេតអំពីការជ្រៀតជ្រែករបស់រុស្ស៊ីដែលប្រហែលជាបានគាំទ្រដល់យុទ្ធនាការរបស់លោកនោះ ក្នុងនាមជាអ្នកស៊ើបការសម្ងាត់ម្នាក់ អ្នកត្រូវតែសួរខ្លួនឯងថា ហេតុអ្វីប្រធានាធិបតីសហរដ្ឋអាមេរិកធ្វើដូច្នេះ?»
