ភ្ជាប់​ទៅ​គេហទំព័រ​ទាក់ទង

លោក Trump ថ្លែង​ក្នុង​ប្រទេស​ជប៉ុន​ថា គ្មាន​មេដឹកនាំ​ផ្ដាច់ការ​ណា​អាច​មើលងាយ​សេចក្ដី​សម្រេច​ចិត្ត​របស់​សហរដ្ឋ​អាមេរិក​បាន​ទេ


នាយករដ្ឋមន្រ្តី​ជប៉ុន Shinzo Abe ឈរ​ជិត​ប្រធានាធិបតី​សហរដ្ឋ​អាមេរិក​លោក​ Donald Trump​ នៅ​ពេល​បរិភោគ​អាហារ​ពេលល្ងាច​ក្នុង​ភោជនីយដ្ឋាន​មួយ​ក្នុង​ទីក្រុង​តូក្យូ ប្រទេស​ជប៉ុន។

នៅ​ថ្ងៃ​អាទិត្យ​នេះ ប្រធានាធិបតី​សហរដ្ឋ​អាមេរិក​លោក Donald Trump បាន​ប្រាប់​ទាហាន​នានា​នៅ​ឯ​មូលដ្ឋាន​ទ័ព​អាកាស Yokota នៅ​ក្នុង​ប្រទេស​ជប៉ុន​ថា៖ «គ្មាន​នរណា​ម្នាក់ មេដឹកនាំ​ផ្ដាច់​ការ​ណា​ម្នាក់ ឬ​ក៏​របប​ណា​មួយ... អាច​មើលងាយ​សេចក្ដី​សម្រេច​ចិត្ត​របស់​សហរដ្ឋ​អាមេរិក​បាន​ទេ‍»។

ការ​លើក​ឡើង​របស់​លោក​ដូច​នេះ​បាន​ធ្វើ​ឡើង​នៅ​ពេល​ចាប់ផ្ដើម​នៃ​ដំណើរ​ទស្សនកិច្ច​រយៈពេល​ជិត ២ សប្ដាហ៍​របស់​លោក​ទៅ​កាន់​ទ្វីប​អាស៊ី ដែល​ដំណើរ​ទស្សនកិច្ច​នេះ​ត្រូវ​គេ​រំពឹង​ថា​នឹង​ផ្ដោត​លើ​បញ្ហា​កូរ៉េ​ខាង​ជើង និង​ពាណិជ្ជកម្ម។

យោបលរបស់​លោក​មួយ​ចំនួន​ទោះបីជា​លើក​ឡើង​ដោយ​ផ្ទាល់​ចំពោះ​ទាហាន​អាមេរិកាំង​ក៏​ដោយ ក៏​អាច​ទំនង​ជា​ការ​ព្រមាន​ដោយ​សម្ងាត់​ចំពោះ​ប្រទេស​កូរ៉េ​ខាង​ជើង។ លោក Trump បាន​លើក​ឡើង​ចំពោះ​ទាហាន​អាមេរិកាំង​យ៉ាង​ដូច្នេះ​ថា៖ «អ្នក​ជា​ការ​គំរាមកំហែង​ដ៏​ខ្លាំងក្លា​ចំពោះ​ពួក​អ្នក​ប្រើ​អំណាច​ផ្ដាច់ការ និង​មេដឹកនាំ​ផ្ដាច់ការ​នានា​ដែល​ចង់​ព្យាបាទ​មនុស្ស​ស្លូត​ត្រង់‍»។

បន្ទាប់ពី​បាន​ថ្លែង​នៅ​ឯ​មូលដ្ឋាន​ទ័ព​អាកាស Yokota នោះ​រួច​មក លោក Trump បាន​ធ្វើ​ដំណើរ​តាម​ឧទ្ធម្ភាគចក្រ Marine One រយៈពេល ២៥ នាទី ទៅ​កាន់​ទីលាន​វាយ​កូន​ហ្គោល Kasumigaseki Country Club នៅ​ក្នុង​អាណា​ខេត្ត Saitama ជិត​ទីក្រុង​តូក្យូ។ លោក​ត្រូវ​បាន​ទទួល​ស្វាគមន៍​ដោយ​នាយក​រដ្ឋមន្ត្រី​ជប៉ុន​លោក Shinzo Abe នៅ​ទី​នោះ ដែល​ទីលាន​វាយ​កូន​ហ្គោល​នេះ​នឹង​ក្លាយជា​កន្លែង​រៀបចំ​ការ​ប្រកួត​កីឡា​វាយ​កូន​ហ្គោល​អូឡាំពិក​ក្រុង​តូក្យូ​ឆ្នាំ ២០២០ ខាង​មុខ​នេះ។

នៅ​ពេល​កំពុង​លេង​កីឡា​វាយ​កូន​ហ្គោល​នេះ មន្ត្រី​អាមេរិក​បាន​និយាយ​ថា លោក Trump និង​លោក Abe បាន​និយាយ​បន្តិច​បន្តួច​អំពី​កូរ៉េ​ខាង​ជើង។ មន្ត្រី​រូប​នោះ​បាន​បញ្ជាក់​ថា លោក​ទាំង​ពីរ​នឹង​ពិភាក្សា​អំពី​រឿង​នេះ​នៅ​ពេល​ពិសា​អាហារ​ពេល​ល្ងាច​នា​យប់​ថ្ងៃ​អាទិត្យ​នេះ និង​នៅ​ពេល​ប្រជុំ​នៅ​ថ្ងៃ​ចន្ទ​ស្អែក៕

XS
SM
MD
LG