ប្រធានាធិបតីសហរដ្ឋអាមេរិកលោកដូណាល់ ត្រាំ បានអញ្ជើញទៅដល់ប្រទេសជប៉ុន ដើម្បីបំពេញទស្សនកិច្ចផ្លូវការរយៈពេល ៤ ថ្ងៃដោយមានពិធីនិងការប្រកួតកីឡាដ៏អ៊ឹកធឹក ទោះជាយ៉ាងណាក៏ដោយ មន្រ្តីជាន់ខ្ពស់សេតវិមានម្នាក់ សន្យាថា «នឹងមានកិច្ចការដុំកភួនខ្លះដើម្បីប្រកាស»។
ការផ្តោតលើការថតរូបជាជាងការធ្វើកិច្ចព្រមព្រៀង អាចជាចេតនាមួយផ្នែករបស់នាយករដ្ឋមន្រ្តីជប៉ុនលោក Shinzo Abe ដែលបានធ្វើឲ្យមានទំនាក់ទំនងដ៏ជិតស្និទ្ធជាមួយប្រធានាធិបតី ត្រាំ។ មេដឹកនាំទាំងពីរបានជួបគ្នា ឬនិយាយជាមួយគ្នាជាង ៤០ លើក ដែលមិនធ្លាប់មានកាលពីពេលមុន។ នេះតាមការបញ្ជាក់របស់សេតវិមាន។
លោក Tomohiko Taniguchi ជាសាស្រ្តាចារ្យនៃសាកលវិទ្យាល័យ Keio ដែលជាអ្នកសរសេរសុន្ទរកថាគោលនយោបាយការបរទេសដ៏សំខាន់មួយឲ្យនាយករដ្ឋមន្រ្តីជប៉ុន មើលឃើញថា ក្រៅពីដំណើរទស្សនកិច្ចនេះ នឹងមានខ្លឹមសារតិចតួច។ ក៏ប៉ុន្តែ លោក Taniguchi និយាយទៀតថា នាយករដ្ឋមន្រ្តីជប៉ុនលោក អាបេ ជាមេដឹកនាំបរទេសតែម្នាក់គត់ ដែលប្រធានាធិបតី ត្រាំ អាចចំណាយពេលជាមួយនិងនិយាយរាប់សិបម៉ោងជាមួយ ដោយគ្មានការប្រុងប្រៀបរៀបចំចំណុចសំខាន់ៗ ដែលជាតម្លៃយុទ្ធសាស្រ្តសម្រាប់វិស័យការទូតជប៉ុន។
ថ្លែងទៅកាន់ក្រុមមេដឹកនាំពាណិជ្ជកម្មកំពូលៗជាច្រើន ភ្លាមៗបន្ទាប់ពីចុះចតនៅទី ក្រុងតូក្យូ ប្រធានាធិបតី ត្រាំ បានសរសើរ «ទំនាក់ទំនងដ៏ល្អបំផុតនៅពេលឥឡូវនេះជាមួយជប៉ុន ជាងពេលណាៗទាំងអស់ដែលប្រទេសទាំង២មាន»។
លោកប្រធានាធិបតីដូណាល់ ត្រាំ ត្រូវអញ្ជើញចូលរួមពិធីជប់លៀងជាមួយព្រះអធិរាជថ្មី លេងកូនហ្គោលជាមួយលោកនាយករដ្ឋមន្រ្តីជប៉ុន ហើយនិងមើលកីឡាបុរាណស៊ូម៉ូ ផ្តល់ពានរង្វាន់ត្រាំជូនជើងឯកបោកចំបាប់។
គោលដៅមួយរបស់លោកនាយករដ្ឋមន្រ្ តីអាបេ ក្នុងអំឡុងដែលពួកលោកស្ថិតនៅជាមួយគ្នាក្នុងទីក្រុងតូក្យូគឺ ធ្វើឲ្យប្រាកដថា ប្រធានាធិបតី ត្រាំ បានតាំងចិត្តចូលរួមជំនួបកំពូលរបស់មេដឹកនាំ ដែលមានប្រទេសជឿនលឿន ២០ ហៅកាត់ G20 នៅខែក្រោយដែលប្រទេសជប៉ុន នឹងធ្វើជាម្ចាស់ផ្ទះក្នុងទីក្រុង អូសាកា៕
