ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក Trump ច្រានចោល​ការ​ចោទ​ប្រកាន់​ថ្មី​ដែល​ថា លោក​ជំពាក់​គុណ​លោក Putin


លោក​ប្រធានាធិបតី ដូណាល់ ត្រាំ ដើរ​កាត់​លោក​ប្រធានាធិបតី Vladimir Putin នៅ​ពេល​អស់​លោក​ថត​រូប​ជា​ក្រុម​ នៅ​ក្នុង​កិច្ចប្រជុំ G-20 ក្នុង​ក្រុង Buenos Aires ប្រទេស​អាហ្សង់ទីន កាលពី​ថ្ងៃទី៣០ ខែវិច្ឆិកា ឆ្នាំ២០១៨។

ប្រធានាធិបតី​អាមេរិក​លោក Donald Trump បាន​ច្រានចោល​សេចក្ដី​រាយការណ៍​ថ្មីៗ​មួយ​ចំនួន​ដែល​ថា លោក​ជំពាក់​គុណ​ប្រទេស​រុស្ស៊ី និង​ប្រធានាធិបតី​រុស្ស៊ី​លោក Vladimir Putin ឬ​ក៏​លោក​លាក់​ទិន្នន័យ​នៃ​ការ​សន្ទនា​លក្ខណៈ​ឯកជន​របស់​លោក​ជាមួយ​នឹង​លោក Putin នៅ​ពេល​ដែល​ពួកគេ​បាន​ជួប​គ្នា ៥ ដង​កន្លង​មក ដែល​ក្នុង​នោះ​មាន​ទាំង​ជំនួប​របស់​លោក​ទាំង​ពីរ​កាល​ពី​ខែ​កក្កដា​នៅ​ក្នុង​ទីក្រុង Helsinki ប្រទេស​ហ្វាំងឡង់​ផង​ដែរ។

នៅ​ពេល​ដែល​អ្នកស្រី Jeanine Pirro ដែល​ជា​អ្នក​សម្របសម្រួល​កម្មវិធី​ពិភាក្សា​តាម​ទូរទស្សន៍ Fox News សួរ​លោក Trump ដោយ​ផ្ទាល់​កាល​ពី​យប់​ថ្ងៃ​សៅរ៍​ថា​តើ​លោក​កំពុង​ធ្វើ​ការ ឬ​ក៏​ធ្លាប់​ធ្វើ​ការ​ឲ្យ​ប្រទេស​រុស្ស៊ី​ឬ​ទេ លោក Trump ឆ្លើយ​ក្នុង​សម្ដី​ដើម​ថា៖ «ខ្ញុំ​គិត​ថា នេះ​ជា​សំណួរ​មាក់ងាយ​ខ្លាំង​បំផុត ដែល​គេ​សួរ​ខ្ញុំ​កន្លង​មក‍»។

លោក Trump បាន​និយាយ​ថា៖ «ប្រសិនបើ​អ្នក​សួរ​ប្រជាពលរដ្ឋ​នៅ​ក្នុង​ប្រទេស​រុស្ស៊ី គេ​ប្រាកដ​ជា​ឆ្លើយ​ថា ខ្ញុំ​មាន​ការ​តឹងតែង​លើ​ប្រទេស​រុស្ស៊ី​ជាង​នរណាៗ​ទាំង​អស់ ប្រហែល​ជា​ជាង​ប្រធានាធិបតី​អាមេរិក​ណាៗ​ទាំង​អស់ ប៉ុន្តែ​ប្រាកដ​ណាស់​គឺ​ជាង​ប្រធានាធិបតី​អាមេរិក​សម័យ​ទំនើប ៣ ឬ ៤ នាក់​ចុង​ក្រោយ​នេះ។ ទោះ​តាម​ទស្សនៈ​យល់​ឃើញ​ណា​ក៏​ដោយ គឺ​គ្មាន​នរណា​ម្នាក់​មាន​ការ​តឹងតែង​ជាង​ខ្ញុំ​នោះ​ទេ​លើ​ប្រទេស​រុស្ស៊ី‍»។

លោក Trump គឺ​មាន​ប្រតិកម្ម​ចំពោះ​សេចក្ដី​រាយការណ៍​មួយ​នៅ​ក្នុង​កាសែត The New York Times ដែល​ថា មន្ត្រី​ទីភ្នាក់ងារ FBI បាន​ចាប់ផ្ដើម​ស៊ើប​អង្កេត​លើ​ករណី​ថា​តើ​លោក Trump «មាន​បាន​ធ្វើ​ការ​ដោយ​ឆន្ទៈ​ឲ្យ​ប្រទេស​រុស្ស៊ី ឬ​ក៏​ធ្លាក់​ចូល​ទៅ​ក្នុង​ឥទ្ធិពល​របស់​រដ្ឋាភិបាល​ក្រុង​មូស្គូ​ដោយ​មិន​ដឹង​ខ្លួន ឬ​ក៏​យ៉ាង​ណា​នោះ‍» ដោយសារតែ​ទីភ្នាក់ងារ FBI ចាប់​អារម្មណ៍​ចំពោះ​ទង្វើ​របស់​លោក Trump បន្ទាប់ពី​លោក Trump បាន​បញ្ឈប់​អតីត​ប្រធាន​ទីភ្នាក់ងារ FBI លោក James Comey ចេញ​ពី​តំណែង​កាល​ពី​ខែ​ឧសភា ឆ្នាំ ២០១៧ មក ដែល​នៅ​ពេល​នោះ លោក James Comey ដឹកនាំ​ការ​ស៊ើប​អង្កេត​អំពី​ការ​ជ្រៀតជ្រែក​របស់​រុស្ស៊ី​ចូល​ក្នុង​ការ​បោះ​ឆ្នោត​ប្រធានាធិបតី​អាមេរិក​ឆ្នាំ ២០១៦៕

XS
SM
MD
LG