អតីតប្រធានាធិបតីសហរដ្ឋអាមេរិក លោក Donald Trump នៅតែរឹងទទឹង ក្រោយពីបានក្លាយជាអតីតមេដឹកនាំសហរដ្ឋអាមេរិកដំបូងគេដែលត្រូវបានចោទប្រកាន់ដោយតុលាការពីបទល្មើសព្រហ្មទណ្ឌ។ លោក Trump បានថ្លែងសង្កថាតែប៉ុន្មានម៉ោងក្រោយពីបង្ហាញខ្លួននៅតុលាការក្រុង New York ដែលនៅទីនោះលោកអះអាងថាលោកគ្មានទោសដូចការចោទប្រកាន់ព្រហ្មទណ្ឌចំនួន៣៤បទចោទនោះទេ។ បទចោទប្រកាន់ទាំងនេះកើតចេញពីការផ្តល់លុយបិទមាត់តារាសម្តែងអាសអាភាស ដែលក្រុមរដ្ឋអាជ្ញាចោទប្រកាន់ថាជាផ្នែកមួយនៃផែនការល្មើសច្បាប់ ដើម្បីមានឥទ្ធិពលលើការបោះឆ្នោតប្រធានាធិបតីឆ្នាំ២០១៦ ដែលនៅពេលនោះលោក Trump បានឈ្នះ។
ពេលថ្លែងទៅកាន់ក្រុមអ្នកគាំទ្រដែលត្រូវបានអញ្ជើញឱ្យចូលក្នុងភូមិគ្រឹះលម្ហែកាយឯកជន Mar-a-Lago របស់លោកក្នុងរដ្ឋ Florida កាលពីយប់ថ្ងៃអង្គារ អតីតប្រធានាធិបតីសហរដ្ឋអាមេរិកលោក Donald Trump បាននិយាយថា លោក«មិនដែលគិតថារឿងបែបនេះអាចកើតឡើងនៅសហរដ្ឋអាមេរិកទេ»។
លោក Trump ថ្លែងយ៉ាងដូច្នេះថា៖ «បទឧក្រិដ្ឋតែមួយគត់ដែលខ្ញុំបានប្រព្រឹត្តគឺការពារជាតិរបស់យើងដោយឥតខ្លាចពីជនដែលព្យាយាមបំផ្លាញជាតិយើង»។
លោក Trump លើកឡើងថាសំណុំរឿងនេះត្រូវបានដាក់ពាក្យបណ្ដឹងទៅតុលាការដោយការិយាល័យរដ្ឋអាជ្ញាក្រុង New York ដើម្បីជ្រៀតជ្រែកចូលក្នុងការបោះឆ្នោតប្រធានាធិបតីឆ្នាំ២០២៤ខាងមុខនេះ។
ការស្ទង់មតិបង្ហាញថាលោក Trump នាំមុខគូប្រជែងផ្សេងៗទៀតដោយងាយស្រួលនៅក្នុងគណបក្សរបស់លោកដែលបានប្រកាសបេក្ខភាព ហើយលោកត្រូវគេរំពឹងថានឹងចូលរួមប្រកួតប្រជែង ដើម្បីទទួលបានការតែងតាំងពីគណបក្សសាធារណរដ្ឋសម្រាប់ការបោះឆ្នោតប្រធានាធិបតីនៅឆ្នាំក្រោយ៕
ប្រែសម្រួលដោយលោក សាយ មុន្នី
