លោកប្រធានាធិបតីអាមេរិក ដូណាល់ ត្រាំ បានរិះគន់ទីភ្នាក់ងារអនុវត្តច្បាប់កំពូលរបស់អាមេរិកចំពោះការរំលងសញ្ញាណនានា នៅមុនពេលដែលយុវជនវ័យ១៩ឆ្នាំម្នាក់បានធ្វើការបាញ់ប្រហាររង្គាលនៅឯវិទ្យាល័យមួយក្នុងរដ្ឋ Florida កាលពីសប្តាហ៍មុន។
លោក ត្រាំ បានបង្ហោះសារមួយលើបណ្តាញសង្គម Tweeter កាលពីល្ងាចថ្ងៃសៅរ៍ថា «សោកស្តាយខ្លាំងណាស់ ដែលប៉ូលិស FBI មើលរំលងសញ្ញាណជាច្រើន ដែលផ្ញើចេញដោយជនសង្ស័យនៅក្នុងការបាញ់ប្រហារនៅសាលារៀនមួយក្នុងរដ្ឋ Florida។ រឿងនេះមិនអាចទទួលយកបាននោះទេ។ ពួកគេចំណាយពេលវេលាច្រើនហួសហេតុដើម្បីព្យាយាមបញ្ជាក់ថា រុស្ស៊ីឃុបឃិតជាមួយនឹងយុទ្ធនាការឃោសនាបោះឆ្នោត ត្រាំ ប៉ុន្តែគ្មានការឃុបឃិតនោះទេ។ ត្រឡប់ទៅធ្វើការងារធម្មតាវិញ ហើយធ្វើឲ្យយើងទាំងអស់គ្នាមានមោទនភាព»។
លោក Jeff Sessions រដ្ឋមន្ត្រីក្រសួងយុត្តិធម៌អាមេរិកបានបញ្ជាឲ្យមានការវាយតម្លៃភ្លាមៗទៅលើថាតើក្រសួងយុត្តិធម៌និងការិយាល័យស៊ើបអង្កេតសហព័ន្ធឆ្លើយតបទៅនឹងការព្រមានអំពីលទ្ធភាពដែលអាចមានឃាតករសម្លាប់រង្គាលដោយរបៀបណា។
ប៉ូលិស FBI បាននិយាយកាលពីពេលមុននេះថា ខ្លួនបានទទួលសេចក្តីរាយការណ៍អំពីបណ្តាញសង្គមមួយដែលត្រូវបានបង្ហោះពីគណនីរបស់បុគ្គលម្នាក់ដែលបានកំណត់អត្តសញ្ញាណខ្លួនថាឈ្មោះ Nikolas Cruz ដែលនិយាយថា «ខ្ញុំនឹងក្លាយទៅជាឃាតករជំនាញខាងបាញ់សម្លាប់នៅតាមសាលារៀន»។ ក៏ប៉ុន្តែប៉ូលិស FBI បាននិយាយថា ខ្លួនមិនអាចកំណត់បានពីពេលវេលា ទីតាំង ឬអត្តសញ្ញាណ ពិតប្រាកដរបស់អ្នកដែលបង្ហោះសារនោះទេ៕
