យុទ្ធនាការឃោសនាបោះឆ្នោតប្រធានាធិបតីសហរដ្ឋអាមេរិកដ៏ស្វិតស្វាញ និងជូរចត់ បានឈានមកដល់ទីបញ្ចប់ ហើយការបោះឆ្នោតកំពុងប្រព្រឹត្តទៅនៅថ្ងៃអង្គារនេះ។
អ្នកបោះឆ្នោតរាប់សិបលាននាក់កំពុងធ្វើដំណើរទៅកាន់ការិយាល័យបោះឆ្នោតនានានៅទូទាំងប្រទេស ដើម្បីសម្រេចថាតើនឹងត្រូវទុកលោកប្រធានាធិបតី Donald Trump ខាងគណបក្សសាធារណរដ្ឋ ជាមេដឹកនាំសហរដ្ឋអាមេរិករយ:ពេល ៤ ឆ្នាំទៀត ឬក៏ទម្លាក់លោក ដោយជ្រើសរើសលោក Joe Biden បេក្ខជនប្រធានាធិបតីខាងគណបក្សប្រជាធិបតេយ្យ ជំនួសវិញ។
ដោយសារមានការរាតត្បាតនៃជំងឺកូវីដ១៩ នៅក្នុងសហរដ្ឋអាមេរិក អ្នកបោះឆ្នោតជាង ៩៨ លាននាក់បានបោះឆ្នោតមុនថ្ងៃបោះឆ្នោតរួចហើយ។ ចំនួននេះគឺច្រើនជាង ២ ភាគ ៣ នៃសន្លឹកឆ្នោតដែលបោះសរុបប្រមាណជិត ១៣៩ លានសន្លឹក នៅក្នុងការបោះឆ្នោតឆ្នាំ ២០១៦ ទៅទៀត ដែលនៅពេលនោះ លោក Trump បានយកឈ្នះបេក្ខជនប្រធានាធិបតីខាងគណបក្សប្រជាធិបតេយ្យអ្នកស្រី Hillary Clinton។
ដោយអ្នកបោះឆ្នោតមុនថ្ងៃបោះឆ្នោតមានចំនួនច្រើនសន្ធឹកសន្ធាប់ សន្លឹកឆ្នោតដែលបោះសរុបសម្រាប់ឆ្នំា ២០២០ នេះ ត្រូវបានអ្នកខ្លះប៉ាន់ស្មានថា អាចឈានដល់ប្រមាណ ១៥០ លានសន្លឹក ឬច្រើនជាងនេះ ដែលវាអាចជាចំនួនច្រើនបំផុតក្នុងប្រវត្តិសាស្ត្រសហរដ្ឋអាមេរិក។
ប៉ុន្តែដោយសារមានច្បាប់ផ្សេងៗគ្នាតាមរដ្ឋនីមួយៗទាក់ទិននឹងរយៈពេលនៃការរាប់សន្លឹកឆ្នោត ដែលផ្ញើតាមប្រៃសណីយ៍ ដែលរដ្ឋខ្លះនឹងរាប់នៅយប់ថ្ងៃអង្គារនេះដែលជាថ្ងៃបោះឆ្នោត ហើយរដ្ឋខ្លះទៀតនឹងរង់ចាំរាប់សន្លឹកឆ្នោតដែលផ្ញើមកដល់ក្រោយថ្ងៃបោះឆ្នោត នោះលទ្ធផលនៃការបោះឆ្នោតប្រហែលជាមិនទាន់អាចដឹងភ្លាមៗនោះទេ៕
