រដ្ឋបាលរបស់លោកប្រធានាធិបតី ត្រាំ និយាយថា វាជាពេលវេលាសម្រាប់ការពង្រឹងច្បាប់ដែលគ្រប់គ្រងការជួលកម្មករបរទេសខ្លះនៅក្នុងសហរដ្ឋអាមេរិក ហើយនិងការពិនិត្យមើលឡើងវិញនូវច្បាប់ដែលតម្រូវឲ្យក្រសួងរបស់រដ្ឋាភិបាលសហរដ្ឋអាមេរិកប្រើប្រាស់ផលិតផលធ្វើនៅក្នុងប្រទេសអាមេរិក។
លោកប្រធានាធិបតី ដូណាល់ ត្រាំ មានគម្រោងចុះហត្ថលេខាលើបទបញ្ជាប្រធានាធិបតីចំពោះច្បាប់ទិញទំនិញអាមេរិក និងការជួលជនជាតិអាមេរិកាំងនៅថ្ងៃនេះនៅពេលដែលលោកប្រធានាធិបតីទៅបំពេញទស្សនកិច្ចរោងចក្រផលិតឧបករណ៍ជាច្រើននៅក្នុងរដ្ឋ Wisconsin នៅតំបន់កណ្តាលភាគខាងលិចសហរដ្ឋអាមេរិក។
នៅក្នុងការថ្លែងត្រួសៗប្រាប់ពួកអ្នកកាសែត ពួកមន្រ្តីជាន់ខ្ពស់របស់រដ្ឋបាលអាមេរិក បាននិយាយថា ភាពចន្លោះប្រហោងនៃច្បាប់ជាច្រើនមានន័យថា កម្មករនិងក្រុមហ៊ុនអាមេរិកាំងបានបាត់បង់ការងារ និងការប្រកួតប្រជែងពាណិជ្ជកម្មទៅបរទេសដែលធ្វើឲ្យប៉ះពាល់ដល់សេដ្ឋកិច្ចអាមេរិកាំង។
លោកប្រធានាធិបតី ត្រាំ នឹងចុះហត្ថលេខាលើបទបញ្ជាប្រធានាធិបតី ថ្វីបើលោកបានស្ថាបនាអាណាចក្រពាណិជ្ជកម្មមុនពេលឈរឈ្មោះជាប្រធានាធិបតី ដែលក្នុងនោះលោក ជាធម្មតាបានផ្ទេរការងារនៅក្នុងប្រទេសទៅឲ្យក្រុមហ៊ុនផលិតផ្សេងទៀតនៅឯបរទេសដែរ។ ផលិតផលមានយីហោត្រាំ រួមមានក្រវ៉ាត់ក អាវធំ អាចយឺត គ្រឿងសង្ហារឹម ស្រាវ៉ុលកា ទំនិញប្រើប្រាស់ក្នុងផ្ទះ និងប្រដាប់ប្រើប្រាស់នៅសណ្ឋាគារប្រណិតរបស់លោក បានផលិតនៅខាងក្រៅសហរដ្ឋអាមេរិក ទោះយ៉ាងនោះក៏មាន ទំនិញរបស់លោកខ្លះបានធ្វើនៅក្នុងសហរដ្ឋអាមេរិកដែរ៕
