រដ្ឋមន្ត្រីការបរទេសសហរដ្ឋអាមេរិកលោក Rex Tillerson បានគាំទ្រការអះអាងរបស់នាយករដ្ឋមន្ត្រីអង់គ្លេសលោកស្រី Theresa May ដែលថា រដ្ឋាភិបាលរុស្ស៊ីគឺជាអ្នកវាយប្រហារលើអតីតចារកម្មរុស្ស៊ីនៅក្នុងប្រទេសអង់គ្លេស ដោយលោកបាននិយាយថា រឿងនេះ «នឹងជំរុញឲ្យមានការឆ្លើយតប» ជាក់ជាមិនខាន។
លោក Tillerson បាននិយាយកាលពីថ្ងៃចន្ទម្សិលមិញនៅពេលលោកធ្វើដំណើរទៅកាន់ប្រទេសកាប់វែរដែលជាប្រទេសដីកោះនៅទ្វីបអាហ្វ្រិក យ៉ាងដូច្នេះថា៖ «នេះគឺជាទង្វើដ៏អាក្រក់ជាទីបំផុត។ រឿងនេះគឺកើតឡើងចេញពីរុស្ស៊ីយ៉ាងពិតប្រាកដ»។
លោក Tillerson បាននិយាយដូច្នេះតាមទូរស័ព្ទជាមួយនឹងរដ្ឋមន្ត្រីការបរទេសអង់គ្លេសលោក Boris Johnson ភ្លាមៗ បន្ទាប់ពីលោកបានចាកចេញពីប្រទេសនីហ្សេរីយ៉ា។ លោក Tillerson បញ្ចប់ដំណើរទស្សនកិច្ចរយៈពេល ៥ ថ្ងៃរបស់លោកទៅកាន់ទ្វីបអាហ្វ្រិកកាលពីថ្ងៃចន្ទម្សិលមិញ
លោកស្រី Theresa May បានបញ្ជាក់យ៉ាងច្បាស់ថា អតីតភ្នាក់ងារចារកម្មបន្លំខ្លួនរបស់រុស្ស៊ី លោក Sergei Skripal និងកូនស្រីរបស់លោក ត្រូវបានគេបំពុលដោយសារធាតុពុលមួយប្រភេទដែលផលិតឡើងនៅក្នុងប្រទេសរុស្ស៊ី។
លោកស្រីបានបន្ថែមទៀតថា ទង្វើនេះស្មើនឹងការប្រើអាវុធគីមីលើទឹកដីរបស់ចក្រភពអង់គ្លេសដូច្នេះដែរ។
រដ្ឋាភិបាលរុស្ស៊ីបានជំទាស់ទៅនឹងការអះអាងរបស់លោកស្រី Theresay May ដោយបានលើកឡើងថា នេះគឺជាយុទ្ធនាការនយោបាយមួយទៀតដែលផ្អែកលើការបង្កហេតុ៕
