អ្នកភូមិជនជាតិភាគតិច Karen រាប់ពាន់នាក់នៅក្នុងប្រទេសមីយ៉ាន់ម៉ា បានត្រៀមខ្លួនឆ្លងព្រំដែនទៅកាន់ប្រទេសថៃ តាមការរំពឹងទុក ស្របពេលដែលមានការប្រយុទ្ធគ្នាកាន់តែខ្លាំងឡើងៗរវាងយោធាមីយ៉ាន់ម៉ានិងក្រុមឧទ្ទាម Karen។ នេះតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ក្រុមឧទ្ទាម Karen និងយោធាមីយ៉ាន់ម៉ា បានប្រយុទ្ធគ្នាក្បែរព្រំដែនថៃនៅប៉ុន្មានសប្ដាហ៍នេះ ចាប់តាំងពីថ្ងៃទី ១ ខែកុម្ភៈមក នៅពេលដែលនាយឧត្តមសេនីយ៍យោធាមីយ៉ាន់ម៉ាបានធ្វើរដ្ឋប្រហារទម្លាក់មេដឹកនាំរដ្ឋាភិបាលជាប់ឆ្នោតដែលដឹកនាំដោយអ្នកស្រី Aung San Suu Kyi ដែលបានបង្កឲ្យអ្នកភូមិនៅជាប់ព្រំដែនទាំងសងខាងគ្មានទីកន្លែងរស់នៅ។
លោក Chu Wah បានប្រាប់ទីភ្នាក់ងារសារព័ត៌មាន Reuters ថា៖ «ប្រជាជននិយាយថា ទាហានមីយ៉ាន់ម៉ានឹងមកបាញ់ពួកយើង ដូច្នេះយើងបានរត់គេចខ្លួនចេញពីទីនេះ»។
អ្នកភូមិជនជាតិភាគតិច Karen ម្នាក់បាននិយាយថា លោកបានឆ្លងព្រំដែនទៅកាន់ប្រទេសថៃជាមួយក្រុមគ្រួសារក្នុងសប្ដាហ៍នេះ ដោយចាកចេញពីជំរំ Ee Thu Hta ក្នុងប្រទេសមីយ៉ាន់ម៉ា។
លោក Chu Wah បាននិយាយថា៖ «ខ្ញុំត្រូវឆ្លងទន្លេ» ដោយនិយាយសំដៅទន្លេ Salween ដែលបែងចែកព្រំដែនប្រទេសមីយ៉ាន់ម៉ានិងថៃ។
ក្រុមបណ្ដាញគាំទ្រសន្តិភាព Karen បាននិយាយថា អ្នកភូមិរាប់ពាន់នាក់កំពុងស្នាក់នៅជាប់ទន្លេSalween ខាងប្រទេសមីយ៉ាន់ម៉ា ហើយពួកគេនឹងឆ្លងទៅប្រទេសថៃ បើសិនជាការប្រយុទ្ធគ្នាកាន់តែរីកធំឡើង។
ក្រុមនេះបានបង្ហោះសារក្នុងបណ្ដាញសង្គម Facebook ថា៖ «នៅប៉ុន្មានថ្ងៃខាងមុខ ពលរដ្ឋ Karen ជាង ៨០០០ នាក់ នៅតាមបណ្ដោយទន្លេ Salween នឹងឆ្លងទៅប្រទេសថៃ។ យើងសង្ឃឹមថា ទាហានថៃ នឹងជួយយើងរត់គេចពីសង្គ្រាមនេះ»។
ក្រុមអ្នកប្រយុទ្ធ Karen កាលពីថ្ងៃអង្គារ បានវាយកម្ទេចមូលដ្ឋានកងទ័ពមីយ៉ាន់ម៉ានៅភាគខាងលិចឆ្នេទន្លេ Salween នៅក្នុងការវាយប្រហារមួយនាមុនពេលថ្ងៃរះ។ ក្រុមជនជាតិភាគ Karen បានបញ្ចាក់ថា ទាហានមីយ៉ាន់ម៉ា ១៣ នាក់ និងអ្នកប្រយុទ្ធ Karen ៣ នាក់បានស្លាប់។ យោធាមីយ៉ាន់ម៉ា បានធ្វើការឆ្លើយតបដោយការវាយប្រហារតាមអាកាស នៅក្នុងតំបន់ជាច្រើននៅជិតព្រំដែនថៃ៕
