ប៊ុយតាប៉េស្ត ប្រទេសហុងហ្រ្គី៖ ប្រជាពលរដ្ឋហុងហ្គ្រីប្រហែល ១០.០០០នាក់ បានធ្វើបាតុកម្មកាលពីថ្ងៃសុក្រ ទី១៤ ខែមករាកន្លងទៅនេះប្រឆាំងនឹងអ្វីដែលក្រុមអ្នករិះគន់ហៅថា ជាច្បាប់ប្រព័ន្ធ ផ្សព្វផ្សាយដ៏រឹតត្បិតបំផុតនៅអឺរ៉ុប។ បទបញ្ញត្តិនេះ អាចផាកពិន័យ និងដាក់ទណ្ឌកម្មយ៉ាងធ្ងន់ធ្ងរ ដល់ប្រព័ន្ធ ផ្សព្វផ្សាយនៅហុងហ្គ្រី។
ជនជាតិហុងហ្គ្រីជាច្រើនបានស្រែកច្រៀងថា «ប្រសិនបើពួកគេជាទុងជាតិ ពួកគេនឹងមិនបក់ទេ ឬប្រសិនបើពួកគេជាផ្កាកុលាបវិញ ពួកគេក៏នឹងមិនរីកដែរ»។ ចម្រៀងដ៏ក្រៀមក្រំ បានលាន់រំពងពេញទីលានខាងមុខអគាររដ្ឋសភារបស់ហុងហ្គ្រី ជាទីកនែ្លងដែលក្រុមបាតុករ ប្រមូលផ្តុំគ្នា ដើម្បីប្រឆាំងនឹងច្បាប់ប្រព័ន្ធផ្សព្វផ្សាយថ្មីនេះ។ ពួកគេត្រូវបានឃ្លាំមើលយ៉ាងដិតដល់ពីសំណាក់ក្រុមប៉ូលីស ដែលជិះក្នុងរថយន្តមានភ្លើងស៊ីរ៉ែនវិលទៀតផង។
តាមបទបញ្ញត្តិនេះ ក្រុមប្រឹក្សាប្រព័ន្ធផ្សព្វផ្សាយ (Media Council) ដែលត្រូវបានតែងតាំង ដោយរដ្ឋាភិបាលប្រកាន់ស្តាំកណ្តាល អាចផាកពិន័យប្រព័ន្ធផ្សព្វផ្សាយតាមអាកាស នូវទឹកប្រាក់ជិត១លានដុល្លារ និងប្រព័ន្ធអ៊ីនធឺណិត ឬកាសែតនូវទឹកប្រាក់ជាង១សែនដុល្លារ ប្រសិនបើការផ្សាយព័ត៌មានរបស់ពួកគេត្រូវបានរកឃើញថា គ្មានតុល្យភាព ឬអសីលធម៌។
មិនមែនតែអ្នកយកព័ត៌មានហុងហ្គ្រីនោះទេដែលព្រួយបារម្ភអំពីអ្វីដែលក្រុមអ្នករិះគន់ ពិពណ៌នាថា ជាច្បាប់ប្រព័ន្ធផ្សព្វផ្សាយដ៏រិតត្បិតបំផុតនៅអឺរ៉ុបនោះ លោកស្រី សុនចារ៍ អេនឌ្រេសូ (Sonja Andrassew) នៃក្រុមបរិស្ថានហ្គ្រីនភីស (Greenpeace) មានប្រសាសន៍ថា លោកស្រី បារម្ភថា បទបញ្ញត្តិនេះនឹងបង្កការលំបាកកាន់តែខ្លាំង ក្នុងការរិះគន់គោលនយោបាយបរិស្ថាន។ លោកស្រីថ្លែងថា៖
«យើងគិតថា ការការពារបរិស្ថានក៏ទាក់ទងនឹងសេរីភាពព័ត៌មានដែរ។ ដូច្នេះ ប្រសិនបើយើងចង់បញ្ចេញទស្សនៈរបស់យើងអំពីបរិស្ថាន ការកើនឡើងកំដៅផែនដី ឬក៏កិច្ចការផ្សេងទៀត យើងត្រូវការព័ត៌មានដែលមានសេរីភាពក្នុងការសរសេរអំពីទស្សនៈរបស់យើង»។
អង្គភាពប្រព័ន្ធផ្សព្វផ្សាយមួយចំនួន ត្រូវបានតាមប្រមាញ់ពីសំណាក់អាជ្ញាធរប្រព័ន្ធផ្សព្វផ្សាយថ្មីរួចហើយ។
សម្លេងរបស់ហ្កាបូ សាបៃ (Gabor Csabai) ប្រធានវិទ្យុធីឡុស (Tilos) ឬត្រួវបានហៅថា វិទ្យុហាមឃាត់ ដែលមានមូលដ្ឋាននៅទីក្រុង ប៊ុយដាប៉េស្ត នៅតែអាចស្តាប់ឮតាមរយៈស្ទូឌីយោតូចមួយនៅក្នុងអគារទ្រុឌទ្រោមមួយក្នុងទីក្រុងប៊ុយដាប៉េស្ត។
ប៉ុន្តែ ស្ថានីយ៍វិទ្យុឯករាជ្យតូចមួយរបស់គាត់នេះបានប្រឈមនឹងការតស៊ូខាងផ្លូវច្បាប់រួចហើយជាមួយនឹងក្រុមប្រឹក្សាប្រព័ន្ធផ្សព្វផ្សាយ បន្ទាប់ពីបានផ្សាយចម្រៀងមួយបទរបស់អ្នករាំចង្វាក់រែប (Rap) អាមេរិកាំង ឈ្មោះថា អាយស៍ធី (Ice-T) ដែលឈ្មោះរបស់លោកពិតប្រាកដគឺ ទ្រែស៊ី ម៉ារ៉ូ (Tracey Marrow)។
ក្រុមប្រឹក្សាប្រព័ន្ធផ្សព្វផ្សាយខឹងសម្បារយ៉ាងខ្លាំង ដែលស្ថានីយ៍ធីឡុស ចាក់ផ្សាយបទចម្រៀងរបស់អ្នករាំចង្វាក់រែប ក្រោមចំណងជើងថា «IT’s ON» នាពេលរសៀល ដោយបានថ្លែងថា ចម្រៀងនេះអាចប៉ះពាល់ក្រុមយុវជន។ បន្ទាប់ពីមានការប្រឆាំងជាសាធារណៈ ក្រុមប្រឹក្សានេះ ផ្អាកសកម្មភាពវិញក្នុងសប្តាហ៍នេះ ប៉ុន្តែ ក្រុមអ្នកផ្សាយតាមវិទ្យុ មានការព្រួយបារម្ភថា ឥឡូវនេះ អាជ្ញាធរប្រព័ន្ធផ្សព្វផ្សាយ តាមអង្កេតមើលពួកគេហើយ។
កាលពីមុននេះ វិទ្យុធីឡុស បានប្រឈមនឹងការតវ៉ា ដោយសារតែសាររបស់វិទ្យុនេះ ប្រឆាំងនឹងសាសនាគ្រិស្ត។ អ្នកតវ៉ារួមមានក្រុមអ្នកគាំទ្រគណបក្សហ្វីដេស (Fidesz Party) ដែលគ្រប់គ្រងអំណាច នាពេលបច្ចុប្បន្ននេះ។ លោកសាបៃ បដិសេធការចោទប្រកាន់ទាំងនេះ។ លោកសាបៃថ្លែងថា៖
«អ្វីដែលខ្ញុំអាចនិយាយគឺថា វិទ្យុធីឡុស ជាវិទ្យុសេរី និងឯករាជ្យទាំងស្រុង ដែលមិនប្រកាន់សាសនា មិនប្រកាន់មនោគមវិជ្ជានយោបាយ មិនប្រកាន់គណបក្សនយោបាយ និងបណ្តាញហិរញ្ញវត្ថុណាមួយ។ យើងជាស្ថានីយ៍វិទ្យុសេរី និងឯករាជ្យ និងស្មោះត្រង់»។
ក្រុមអ្នករិះគន់ថ្លែងថា ដោយមានច្បាប់ប្រព័ន្ធផ្សព្វផ្សាយនេះ រដ្ឋាភិបាលប្រកាន់ស្តាំកណ្តាល កំពុងប្រែក្លាយប្រទេសហុងហ្គ្រី ទៅជា«អ័របានីស្ថាន» ដែលនិយាយសំដៅលោកនាយករដ្ឋមន្ត្រី វីកទ័រ អ័របាន (Viktor Orban) និងប្រទេសផ្តាច់ការមួយចំនួននៅអាស៊ីកណ្តាល។
ប៉ុន្តែលោក យ៉ូកហ្គី អូស្កូ (Gyorgy Ocsko) ទីប្រឹក្សាច្បាប់នៃក្រុមប្រឹក្សាប្រព័ន្ធផ្សព្វផ្សាយ មានប្រសាសន៍ថា រដ្ឋាភិបាលមិនត្រឡប់ទៅរកអតីតកាល២០ឆ្នាំមុនទេ ជាពេលដែលហុងហ្គ្រីនៅជារដ្ឋកម្មុយនីស្ត ដែលត្រូវបានគ្រប់គ្រងយ៉ាងតឹងរឹង។ លោកបន្តថា៖
«កិច្ចការនេះមិនពាក់ព័ន្ធជាមួយនឹងការពិនិត្យចាប់ពិរុទ្ធតាមរបៀបចាស់ ដែលកើតមានឡើងកាលពីសម័យកុម្មុយនីស្តនោះឡើយ។ អ្នកតាក់តែងច្បាប់មានគោលដៅមួយ ពោលគឺធ្វើឲ្យអ្នកយកព័ត៌មានគោរពសេចក្តីថ្លៃថ្នូររបស់មនុស្ស។ ហើយនេះជាគោលដៅរបស់យើង ដែលមានការផាកពិន័យជាយថាហេតុ និងទណ្ឌកម្មជាយថាហេតុទៅលើកាសែត»។
ការពិភាក្សាស្តីពីច្បាប់ប្រព័ន្ធផ្សព្វផ្សាយកើតមានឡើងចំពេលដែលហុងហ្គ្រី នឹងទទួលវេនធ្វើជាប្រធានសហភាពអឺរ៉ុប។ មន្ត្រីមួយចំនួននៅអាល្លឺម៉ង់បានស្នើសុំរួចហើយឲ្យដកហូតកាតព្វកិច្ចជាប្រធានមួយចំនួនចេញពីហុងហ្គ្រី។
លោក ជីន អាសេលប៊ន (Jean Asselborn) រដ្ឋមន្ត្រីការបរទេសរបស់ប្រទេសលុចហ្សឹមប៊ួរ (Luxembourg) បានព្រមានថា ប្រសិនបើសហភាពអឺរ៉ុបមិនដាក់សម្ពាធទៅលើហុងហ្គ្រី ដើម្បីឲ្យមានការផ្លាស់ប្តូរច្បាប់នេះទេ «វាជាការលំបាកយ៉ាងខ្លាំង ក្នុងការចរចាជាមួយចិន ឬអ៊ីរ៉ង់ អំពីសិទ្ធិមនុស្ស»។
គណៈកម្មាការអឺរ៉ុប ដែលជាសាខានិតិប្រតិបត្តិរបស់សហភាពអឺរ៉ុប បានបញ្ជាក់ច្បាស់ថា ខ្លួនអាចនឹងដាក់សម្ពាធទៅលើហុងហ្គ្រីឲ្យផ្លាស់ប្តូរបទបញ្ញតិនេះ។
លោកនាយករដ្ឋមន្ត្រីហុងហ្គ្រី អ័របាន បដិសេធថា ច្បាប់នេះមិនបានបំពានទៅលើវិធានរបស់សហភាពអឺរ៉ុបទេ។ លោកបានប្រាប់ក្រុមអ្នកយកព័ត៌មានថា លោកអាចទទួលយកការផ្លាស់ប្តូរចំពោះបទបញ្ញតិនេះ ប្រសិនបើគណៈកម្មាការអឺរ៉ុបអាចបញ្ជាក់ថា ច្បាប់នេះមិនស្របទៅតាមបទដ្ឋានអឺរ៉ុប។ លោកនាយករដ្ឋមន្ត្រីបន្តថា៖
«ឥឡូវនេះ យើងគួរតែធ្វើការពិភាក្សាតាមបែបវិជ្ជាជីវៈ និងផ្លូវច្បាប់ទៅលើអត្ថបទនេះ។ អត្ថបទនេះមានលក្ខណៈអឺរ៉ុបខ្លាំងណាស់។ គ្មានបទបញ្ញត្តិពិសេស និងបទបញ្ញតិហុងហ្គ្រីពិសេសណាមួយនៅក្នុងច្បាប់នេះទេ។ រាល់មាត្រា និងធាតុនៃបទបញ្ញតិ្តនេះ ត្រូវបានចម្លងពីច្បាប់នៃប្រទេសមួយចំនួននៅទ្វីបអឺរ៉ុប។ ដូច្នេះ ខ្ញុំគិតថា វាជាបទបញ្ញត្តិរបស់អឺរ៉ុប»។
ក្រៅពីច្បាប់ប្រព័ន្ធផ្សព្វផ្សាយនេះ លោកអ័របាន ក៏ត្រូវបានរិះគន់ពីបទប្រើសម្លេងភាគច្រើនពីរភាគបីរបស់គណបក្សហ្វីដេសរបស់លោក ក្នុងការកែប្រែរដ្ឋធម្មនុញ្ញ និងត្រួតពិនិត្យទៅលើស្ថាប័នហិរញ្ញវត្ថុឯករាជ្យមុនៗ ដូចជាការិយាល័យសវនកម្មរដ្ឋជាដើម៕
ប្រែសម្រួលដោយ លី សុខឃាង
