ភ្ជាប់​ទៅ​គេហទំព័រ​ទាក់ទង

គណៈរដ្ឋមន្រ្តី​ថ្មី​របស់​ប្រទេសថៃ​ធ្វើឲ្យ​មាន​ការ​ភ្ញាក់ផ្អើល​មួយចំនួន


លោកស្រី​នាយក​រដ្ឋមន្រ្តី​ថៃ​​Yingluck​ Shinawatra ​បានទៅ​ដល់​ទីស្តីការ​​គណរដ្ឋមន្រ្តី​ដើម្បី​ចូលរួម​ប្រជុំ​គណរដ្ឋមន្រ្តី​លើក​តំបូង​​ក្នុង​ទីក្រុង​បាងកក​​ ថ្ងៃ​ទី​១១​ ខែ​សីហា​ ឆ្នាំ​២០១១។

គណៈរដ្ឋមន្រ្តី​ថ្មី​របស់​នាយករដ្ឋមន្រ្តី​ថៃ​យីងឡាក់​ ស៊ីណាវ៉ាត់ បាន​លេចចេញ​ជា​រូបរាង​ឡើង​ដោយមាន​សមាជិក​ភាគច្រើន​មកពី​គណបក្ស​របស់​ អ្នកស្រី​ រួមទាំង​ដៃគួ​សម្ព័ន្ធមិត្រ​ និង អ្នក​ខាងក្រៅ​ប៉ុន្មាន​នាក់​ផ្សេងទៀត។ អ្នកស្រី​បាន​ដក​មេដឹកនាំ​ក្រុម​ចលនា​តវ៉ា​អាវ​ក្រហម​ដ៏​ចម្រូងចម្រាស់​ចេញ ដែល​ករណី​នេះ​បាន​ជួយ​ឲ្យ​គណបក្ស​របស់​អ្នកស្រី​ទទួល​បាន​ជោគជ័យ។

គណៈរដ្ឋមន្រ្តីថៃ​ដែល​មាន​សមាជិក​ចំនួន ៣៥ រូប ត្រូវបាន​រំពឹង​ថា​នឹង​ព្យាយាម​អនុវត្ត​នូវ​គោល​នយោ​បាយ​សេដ្ឋកិច្ច និង សង្គម​ដ៏​មាន​ប្រជាប្រិយភាព​នា​ពេល​ឆាប់ៗ​ខាងមុខ​នេះ។​ គោលនយោបាយ​នេះ​ហើយ​ដែល​ជួយ​ជំរុញ​ឲ្យ​នាយករដ្ឋមន្ត្រី​យីងឡាក់​ ស៊ីណាវ៉ាត់ បាន​ទទួល​ជោគជ័យ​កាល​ពី​ខែ​មុន។

ទោះបីជា​មុខតំណែង​គណៈរដ្ឋមន្រ្តី​ភាគច្រើន​បាន​ផ្តល់​ឲ្យ​គណបក្ស​ភឺថៃ​ ឬ​ដៃគូ​សម្ព័ន្ធមិត្រ​របស់​អ្នកស្រី​ក៏ដោយ​ ក៏​អ្នកស្រី​បាន​ជ្រើសរើស​អ្នក​ពី​ខាងក្រៅ​មួយចំនួន​ឲ្យ​មក​កាន់​មុខតំណែង​ សំខាន់ៗ​ផ្នែក​ហិរញ្ញវត្ថុ និង ពាណិជ្ជកម្ម​ផងដែរ។

អ្នក​វិទ្យាសាស្រ្ត​នយោបាយ​ លោក ធីទីណាន់ ពុងស៊ូធីរ៉ាក់ (Thitinan Pongsudhirak) នៅឯ​សាកលវិទ្យាល័យ​ជូឡាឡុងកន មាន​ប្រសាសន៍​ថា គាត់​បាន​សង្ឈឹម​ថា​នឹងមាន​ អ្នកជំនាញ​ដែល​មាន​បទពិសោធន៍​ច្រើន​ថែមទៀត​នៅក្នុង​គណៈរដ្ឋមន្ត្រី។

«វា​ទាប​ជាង​ការរំពឹងទុក​លើកដំបូង​ទៅទៀត។ ការរំពឹងទុក​លើកដំបូង​គឺ​ថា ពួកគេ​នឹង​តែងតាំង អ្នកខាងក្រៅ អ្នកជំនាញ​ផ្សេងៗ អ្នកជំនាញ​ខាង​គោលនយោបាយ​ច្រើន​ជាងមុន​ ប៉ុន្តែ​នៅ​ទីបំផុត​ ពួកគេ​បាន​ជ្រើសរើស​តែ​ប៉ុន្មាន​នាក់​ប៉ុណ្ណោះ​សម្រាប់​មុខតំណែង​ផ្នែក​ សេដ្ឋកិច្ច​ ដូចជា​រដ្ឋមន្រ្តី​ហិរញ្ញវត្ថុ រដ្ឋមន្រ្តី​ពាណិជ្ជកម្ម ជាដើម ដែល​មាន​តួនាទី​ទ្វេ ដោយ​ធ្វើ​ជា​ឧបនាយករដ្ឋមន្រ្តី​ផងដែរ។ ក្រៅពីនេះ​ការជ្រើសរើស​គឺ​ផ្អែកលើ​បក្សពួក​ និង កូតា​គណបក្ស»។

ភាពជោគជ័យ​របស់​រដ្ឋាភិបាល​ថ្មី​លេចចេញ​ពី​ដំណាក់កាល​ច្របូកច្របល់​ក្នុង ​នយោបាយ​ថៃ។ អតីត​នាយករដ្ឋមន្រ្តី​ថាក់ស៊ីន ស៊ីណាវ៉ាត្រា ដែល​ជា​បងប្រុស​របស់​អ្នកស្រី​យីងឡាក់ ត្រូវបាន​គេ​ទម្លាក់​ចេញ​ពី​តំណែង​ក្នុង​រដ្ឋប្រហារ​ឆ្នាំ​ ២០០៦ ដោយសារ​តែ​ជម្លោះ​រវាង​រដ្ឋាភិបាល​របស់​គាត់​និង ឥស្សរជនបុរាណ​ក្នុង​សង្គម​ថៃ។

រដ្ឋមន្រ្តី​ការពារ​ជាតិ​ថ្មី​របស់​អ្នកស្រី​យីងឡាក់​គឺ​ជា​អតីត​ មេបញ្ជាការ​ដែល​ត្រូវបាន​គេ​មើលឃើញ​ថា​គ្មាន​នរណា​អាច​ផ្តួល​បាន​ ហើយ​ត្រូវ​បាន​រំពឹង​ថា​គាត់​នឹង​ធ្វើការ​បាន​ល្អ​ជាមួយ​នឹង​ពួក​យោធា។ សេដ្ឋវិទូ​ សំភព ម៉ាណារ៉ាំងសាន (Somphob Manarangsan)​ បាន​ស្វាគមន៍​អ្នក​ខាងក្រៅ​ដែល​ ធ្វើការ​នៅក្នុង​គណៈរដ្ឋមន្រ្តី ដែល​ជា​អ្នក​មាន​បទពិសោធន៍​ផ្នែក​ហិរញ្ញវត្ថុ​ ជាពិសេស​ នៅពេល​ដែល​ទិដ្ឋភាព​ទូទៅ​នៃ​សេដ្ឋកិច្ច​អន្តរជាតិ​ស្ថិតនៅ​ក្នុង​ភាព​មិន​ ច្បាស់លាស់​នៅឡើយ។

«ចាប់ពីពេល​នេះ​តទៅ ប្រទេស​ថៃ​នឹង​មាន​ស្ថេភាព ហើយ​គោលនយោបាយ​ម៉ាក្រូ​សេដ្ឋកិច្ច​ នឹង​មាន​ប្រសិទ្ធភាព​ ទោះបីជា​ទីផ្សារ​ហិរញ្ញវត្ថុ​សកលលោក​ទាំង​នៅ​សហរដ្ឋអាមេរិក​ និង សហគមន៍​អឺរ៉ុប​ មាន​ការ​ប្រែប្រួល​ខ្លាំង​ក៏ដោយ។ នេះ​មាន​ន័យថា យើង​ត្រូវតែ​រៀបចំ​ប្រទេស​ ជាពិសេស​រៀបចំ​គោលនយោបាយ​ម៉ាក្រូសេដ្ឋកិច្ច​ឲ្យបាន​ស្រួលបួល​ដើម្បី​តតាំង​ ជាមួយ​នឹង​ឥទ្ធិពល​មកពី​កត្តា​ខាងក្រៅ»។

សេដ្ឋវិទូ​ប្រចាំ​នៅ​ធនាគារ​ Kasikorn បាន​ទស្សន៍ទាយ​ថា សេដ្ឋកិច្ច​ថៃ​នឹង​កើនឡើង ៥ ភាគរយ នា​ឆ្នាំ​ក្រោយ ដោយ​មួយ​ផ្នែក​បាន​មក​ពី​ការ​ចំណាយ​របស់​រដ្ឋាភិបាល​ទៅលើ​កម្មវិធី​ដ៏​មាន​ ប្រជាប្រិយ​មួយចំនួន​ដូចជា​ការបង្កើន​នូវ​ប្រាក់បៀវត្សរ៍​ដែល​ស្ថិតក្នុង​ កម្រិត​អប្បបរមា​ និង ការធានា​នូវ​តម្លៃ​របស់​អង្ករ​ជាដើម។ ទោះជាយ៉ាងនេះក្តី ប្រធាន​សេដ្ឋវិទូ​មកពី​មូលនិធិ​ចូលនិវត្តន៍​រដ្ឋាភិបាល​ អាផន ឈីវ៉ាខ្រេងខៃ (Arporn Chewakrengkai) មាន​ប្រសាសន៍​ថា ការបង្កើន​នូវ​ប្រាក់បៀវត្សរ៍​ដែល​ស្ថិត​ក្នុង​កម្រិត​អប្បបរមា​នេះ​អាច​មាន ​បញ្ហា​ប្រឈម។

«វា​ពិតជា​មាន​ការលំបាក​ណាស់​ក្នុងការ​អនុវត្ត ពីព្រោះថា​សម្រាប់​ទីក្រុង​បាងកក ប្រាក់បៀវត្សរ៍​ជា​អប្បបរមា​គឺ​ពី​ ២២៥ បាត ទៅ ៣០០ បាត ក្នុង​មួយ​ថ្ងៃ។ វា​ជិត​ស្មើ​នឹង ៤០​ភាគរយ ខ្ពស់​ជាង​មុន ប៉ុន្តែ​សម្រាប់​ខេត្ត​ផ្សេងៗ​ (ប្រាក់ខែគឺ) ប្រមាណ ១៨០ បាត តែប៉ុណ្ណោះ ដូច្នេះ​តើ​អ្នកស្រី​ (យីងឡាក់) នឹង​បង្កើន​ប្រាក់ខែ​ទាំងនោះ​ឲ្យ​ដល់ ៣០០ បាត យ៉ាងដូចម្តេច​? នេះ​គឺជា​ការប្រឈម​ដ៏​ធំ​បំផុត​មួយ»។

ទោះបីជា​សេដ្ឋវិទូ​និយាយ​ថា ប្រាក់បៀវត្សរ៍​ខ្ពស់​អាច​បណ្តាលឲ្យ​មាន​អតិផរណា​ក៏ដោយ ក៏​ឧបនាយករដ្ឋមន្រ្តី​ថ្មី​និយាយ​ថា ការដោះស្រាយ​នូវ​តម្លៃ​កើនឡើង​របស់​ការចំណាយ លើការ​រស់នៅ​គឺជា​គោលនយោបាយ​ចម្បង​សម្រាប់​រដ្ឋាភិបាល។

អ្នក​តាមដាន​នយោបាយ​ភាគច្រើន​និយាយ​ថា គណៈរដ្ឋមន្ត្រី​ថ្មី​មើលទៅ​ដូចជា​មាន​បុគ្គលិក ដែល​ជ្រើសរើស​បាន​ត្រឹមត្រូវ ប៉ុន្តែ​គេ​ឃើញ​នៅមាន​បញ្ហា​ចម្រូងចម្រាស់​ខ្លះ​ពាក់ព័ន្ធ​នឹង រដ្ឋមន្រ្តី​ការបរទេស​ថ្មី​លោក ស៊ូរ៉ាពុង ថូវីឈុកឆៃខុល (Surapong Towichukchaikul) ដែល​មាន​ទំនាក់ទំនង​ជាមួយ​នឹង​អ្នកស្រី​យីងឡាក់ និង បងប្រុស​របស់​អ្នកស្រី ហើយ​ដែលជា​អ្នក​មាន​បទពិសោធន៍​ផ្នែក​ការទូត​តិចតួច​ប៉ុណ្ណោះ។

អ្នក​វិភាគ​នយោបាយ​ ធីទីណាន់ (Thitinan) និយាយ​ថា​មន្រ្តី​ភាគច្រើន​នៅក្នុង​គណៈរដ្ឋមន្ត្រី មាន​ទំនាក់ទំនង​យ៉ាងជិតស្និត​ជាមួយនឹង​អតីត​នាយករដ្ឋមន្រ្តី។

«រដ្ឋមន្រ្តី​ការបរទេស​នេះ​គឺ​មិនមែន​ជា​មនុស្ស​ដែល​សមនឹង​ទទួល​ការងារ​ នេះ​ទេ។ គាត់​មិន​ល្បី​ឈ្មោះ​ថាជា​អ្នក​ជំនាញការ​ខាង​គោលនយោបាយ​ការបរទេស​នោះទេ។ គាត់​មិនមាន​ជំនាញ​ហ្នឹង​នោះទេ​ ប៉ុន្តែ​គាត់​មាន​ទំនាក់ទំនង​ផ្ទាល់​ជាមួយនឹង​លោក​ថាក់ស៊ីន។ រដ្ឋមន្រ្តី​ដឹកជញ្ជូន​ក៏​មាន​ទំនាក់ទំនង​ផ្ទាល់​ជាមួយនឹង​លោក​ថាក់ស៊ីន​ ដែរ។ ដូច្នេះ​យើង​មាន​ប្រថ្នូល​ឃើញ​ថា វា​មិនមាន​លក្ខណៈ​វិជ្ជមាន​នោះ​ទេ ពីព្រោះ​ការណ៍​នេះ​បង្ហាញ​ឲ្យ​ឃើញ​ថា លោក​ថាក់ស៊ីន​សិ្ថតនៅ​ពី​ក្រោយ​ការរៀបចំ​គណៈរដ្ឋមន្ត្រី​នេះ»។

អតីត​នាយរដ្ឋមន្រ្តី​នៅ​រស់នៅ​និរទេស​ឯ​ក្រៅ​ប្រទេស​នៅឡើយ។ ទោះបីជា​មាន​សញ្ញាណ​ពី មន្រ្តី​ផ្សេងៗ​នៅក្នុង​គណបក្ស​កាន់​អំណាច​ដែល​ថា គាត់​រួមនឹង​សម្ព័ន្ធមិត្រ​នយោបាយ​របស់​គាត់​អាច​នឹង​ទទួល​បាន​ការលើកលែង​ ទោស​ក៏ដោយ ក៏​រដ្ឋាភិបាល​ថ្មី​មិនបាន​ធ្វើ​អ្វី​ពាក់ព័ន្ធ​នឹង​បញ្ហា​នេះ​នៅឡើយ​ទេ។ អ្នកស្រី​យីងឡាក់ ស៊ីណាវ៉ាត់ បាន​ប្រកាស​ទៅកាន់​សាធារណជន​ និង បក្ស​ប្រឆាំង ឲ្យ​ផ្តល់ឲ្យ​អ្នកស្រី​នូវ​ពេលវេលា​គ្រប់គ្រង​ថ្មី ដើម្បី​បង្ហាញ​ឲ្យ​ឃើញ​ពី​ដំណើរការ​រីកចម្រើន​ទៅមុខ​នៃ​គោលនយោបាយ​របស់​ រដ្ឋាភិបាល​ថ្មី​របស់​អ្នកស្រី៕

ប្រែសម្រួល​ដោយ ភី​ សុភាដា

XS
SM
MD
LG