បាងកក៖ គណៈកម្មការសហរដ្ឋអាមេរិកទទួលបន្ទុកកិច្ចការសន្តិសុខ និងកិច្ចសហប្រតិបត្តិការនៅទ្វីបអឺរ៉ុប ដែលត្រូវបានស្គាល់ថា គណៈកម្មការ Helsinki បានអញ្ជើញអតីតនាយករដ្ឋមន្រ្តីថៃ ថាក់ស៊ីន ស៊ីណាវ៉ាត្រ ដើម្បីធ្វើសក្ខីកម្មនៅសវនាការនៅសប្តាហ៍ក្រោយនារដ្ឋធានីវ៉ាស៊ីនតោន។ ទីភ្នាក់ងារឯករាជ្យដែលមានសមាសភាពអ្នកនយោបាយ និងមន្ត្រីសហរដ្ឋអាមេរិកចង់ឲ្យលោកថាក់ស៊ីន រាយការណ៍អំពីភាពចលាចលនយោបាយដែលបានកើតឡើងកាលពីពេលថ្មីៗនេះនៅប្រទេសថៃ។ ប៉ុន្តែប្រសិនបើគាត់បង្ហាញមុខនៅរដ្ឋធានីវ៉ាស៊ីនតោន គាត់អាចរងនូវការចាប់ខ្លួន។
រដ្ឋាភិបាលថៃចង់ឲ្យលោកថាក់ស៊ីន ត្រឡប់ចូលទៅប្រទេសថៃវិញដើម្បីជាប់ពន្ធនាគារចំនួនពីរឆ្នាំពីបទពុករលួយ។ គេចង់ឲ្យគាត់ប្រឈមនឹងការកាត់ទោសពីបទភេរវកម្ម។ រដ្ឋាភិបាលកំពុងរកចាប់ខ្លួនលោកថាក់ស៊ីន ចាប់តាំងពីគាត់បានចាកចេញពីប្រទេសថៃកាលពីពីរឆ្នាំមុន។ អតីតមេដឹកនាំរូបនេះ ដែលត្រូវបានបណ្តេញចេញដោយរដ្ឋប្រហារមួយក្នុងឆ្នាំ២០០៦ មានប្រសាសន៍ថា លោកគ្មានកំហុសទេ ហើយត្រូវបានប៉ុនប៉ងចាប់ខ្លួនដោយសារមូលហេតុនយោបាយ។
អ្នកនាំពាក្យរដ្ឋាភិបាល លោក ផានីតាន វឌ្ឍនាយ៉ាកន ថ្លែងថា ប្រសិនអាជ្ញាធរថៃដឹងថា គាត់នៅទីណានោះ គេនឹងព្យាយាមនាំគាត់ទៅឃុំខ្លួន។ លោកផានីតានបន្តថា៖
«នៅពេលមនុស្សត្រូវបានកាត់ឲ្យមានទោស ឬអ្នកដែលតុលាការត្រូវការ នៅក្នុងប្រទេសណាមួយ រដ្ឋមន្ត្រីការបរទេសនឹងចូលរួមដើម្បីធានាថា មនុស្សនោះ ត្រូវបានដាក់ក្នុងដំណើរការច្បាប់»។
កាលពីដើមឆ្នាំនេះ ការប៉ះទង្គិចរវាងយោធា និងក្រុមអ្នកតវ៉ាប្រឆាំងរដ្ឋាភិបាល ដែលភាគច្រើនគាំទ្រលោកថាក់ស៊ីន បានធ្វើឲ្យមនុស្សស្លាប់៩០នាក់ ដែលភាគច្រើននៃអ្នកស្លាប់គឺជាអ្នកតវ៉ា។
អាជ្ញាធរថៃ បន្ទោសលោកថាក់ស៊ីន ចំពោះអំពើហឹង្សានេះ ដោយចោទគាត់ពីបទភេរវកម្ម តែលោកថាក់ស៊ីនចោទរដ្ឋាភិបាល និងកងយោធាវិញ។
មិនទាន់ច្បាស់ទេថាតើសហរដ្ឋអាមេរិកអនុញ្ញាតឲ្យលោកថាក់ស៊ីន ចូលមកទស្សនកិច្ច ឬយ៉ាងណា ប៉ុន្តែរដ្ឋាភិបាលក្រុងវ៉ាស៊ីនតោនមានសន្ធិសញ្ញាបត្យាប័នមួយជាមួយប្រទេសថៃ ដែលលោកផានីតាននិយាយថា គួរត្រូវបានអនុវត្ត។ លោកផានីតាននិយាយថា៖
«យើងសហការជាមួយមិត្តភក្តិយើងដើម្បីអនុវត្តសេចក្តីព្រមព្រៀងរបស់យើង ហើយយើងសង្ឃឹមថា មិត្តភក្តិយើង និងសម្ព័ន្ធមិត្តយើងនឹងធ្វើដូចគ្នានេះ»។
ប្រទេសថៃនាពេលថ្មីៗនេះ ឆ្លើយតបនឹងសំណើរបស់រដ្ឋាភិបាលក្រុងវ៉ាស៊ីនតោន ដែលសុំធ្វើបត្យប័នវិកទ័រ ប៊ូត (Vicktor Bout) ដែលជាអ្នករត់ពន្ធអាវុធ។
វិកទ័រ ប៊ូត ត្រូវបានចោទប្រកាន់ថា ជាអ្នកផ្តល់អាវុធដ៏ធំបំផុតមួយក្នុងពិភពលោក ដើម្បីបញ្ឆេះអំពើហឹង្សានៅទ្វីបអាហ្វ្រិក អាមេរិកខាងត្បូង និងមជ្ឈឹមបូព៌ា។
ជនជាតិរុស្ស៊ីរូបនេះត្រូវបានចាប់ខ្លួនក្នុងឆ្នាំ២០០៨ នៅរាជធានីបាងកក ក្នុងប្រតិបត្តិការសម្ងាត់មួយ។
ក្នុងខែវិច្ឆិកា វិកទ័រ ប៊ូត ត្រូវបានធ្វើបត្យាប័នមកកាន់សហរដ្ឋអាមេរិកដើម្បី ប្រឈមនឹងការចោទប្រកាន់ពីបទចូលដៃជើងសម្លាប់ជនជាតិអាមេរិក និងគាំទ្រភេរវជន។ រដ្ឋាភិបាលរុស្ស៊ីជំទាស់យ៉ាងខ្លាំងនឹងបត្យាប័ននេះ ដោយនិយាយថា វីកទ័រ ប៊ូត គឺជាអ្នកជំនួញគ្មានកំហុស៕
ប្រែសម្រួលដោយអ៊ឹម សុធារិទ្ធ
