ភ្ជាប់​ទៅ​គេហទំព័រ​ទាក់ទង

logo-print
ព័ត៌មាន​​ថ្មី

ថៃ​កំពុង​​ត្រៀម​បើក​ឡើង​វិញ​តំបន់​ទេសចរណ៍​កោះ Phuket បើ​ទោះ​បី​​​​នៅ​មាន​ការ​ផ្ទុះ​ឆ្លង​​ជំងឺ​កូវីដ១៩​ខ្លាំង​ក្តី


រូប​ឯកសារ៖ អ្នក​ទេសចរណ៍​​បរទេស​ចំនួន​ដ៏​តិចតួច​នៅ​ឆ្នេរ​កោះ Phuket ប្រទេស​ថៃ​ដែល​ធ្លាប់​​ពោរពេញ​ដោយ​អ្នក​ទេសចរ​ កាល​ពី​ថ្ងៃ​ទី​១០ ខែ​មីនា ឆ្នាំ​២០២០។

ប្រទេស​ថៃ​កាល​ពី​ថ្ងៃ​ពុធបាន​ត្រៀមរៀបចំ​បើក​ឡើង​វិញ​នូវ​តំបន់​លម្ហែ​កាយ​មាត់​សមុទ្រ​កោះ​Phuket (ភូកេត)​សម្រាប់​ភ្ញៀវ​ទេសចរណ៍​ដោយ​មិន​ចាំបាច់​ត្រូវ​ធ្វើ​ចត្តាឡីស័ក បើ​ទោះបី​ជា​ប្រទេស​នេះ​កំពុង​មាន​ចំនួន​អ្នក​ឆ្លង​និង​អ្នក​ស្លាប់ដោយ​សារ​ជំងឺ​កូវីដ​១៩ប្រចាំ​ថ្ងៃ​ក្នុង​កម្រិត​ខ្ពស់យ៉ាង​ណា​ក្តី។ នេះ​តាម​សេចក្តី​រាយការណ៍​របស់​ទីភ្នាក់ងារ​ព័ត៌មាន AFP។

ប្រទេស​ថៃ​បាន​ផ្តល់​ក្តីសង្ឃឹម​ខ្ពស់​លើ​កម្មវីធី​មួយ​ដែល​ខ្លួន​កំពុងរៀប​ចំ​គឺ​កម្មវិធី «វាល​ខ្សាច់ Phuket

ឬPhuket sandbox» ជា​កម្មវិធីមួយ​ដែល​នឹង​អនុញ្ញាត​ឲ្យ​ពួក​ទេសចរដែល​ចាក់​វ៉ាក់សាំងបង្ការ​ជំងឺ​កូវីដ​១៩​រួច​ហើយ​ទៅ​លេង​កម្សាន្តនៅ​ទី​នោះ​ដោយ​មិន​ចាំ​បាច់​ធ្វើ​ចត្តាឡីស័ក​ដែល​ជា​កិច្ច​ប្រឹង​ប្រែង​មួយ​ដើម្បី​ស្តារ​វិស័យ​ទេសចរណ៍​របស់​ប្រទេស​នេះ​ឡើងវិញ​ដែល​ទទួល​រង​ការ​ប៉ះ​ពាល់​ជា​ខ្លាំងដោយ​ជំងឺ​រាតត្បាត​នោះ។

ក៏ប៉ុន្តែ​គម្រោង​នៃ​ការ​បើក​សម្ពោធ​នៃ​កម្មវិធី​នេះ​នៅ​ថ្ងៃ​ទី​១ ខែ​កក្កដា​កំពុង​ស្ថិត​ក្នុង​ភាព​មិន​ច្បាស់​លាស់​នៅ​ឡើយ​ដោយ​រង់​ចាំ​ការ​យល់​ព្រម​ពី​រដ្ឋាភិបាល​ថៃជា​មុន​សិន។ ប្រទេស​ថៃ​បាន​ព្យាយាម​ទប់ទល់​ប្រឆាំង​នឹង​រលក​ទី​៣នៃ​ការឆ្លង​រាល​ដាល​ជំងឺ​កូវីដ​១៩​ដោយ​បាន​ដាក់​ការ​រឹត​បន្តឹងក្នុងទីក្រុង​បាងកក​និង​តំបន់​ជាយ​ក្រុង​ដែល​កំពុង​មាន​ការ​ឆ្លង​រាតត្បាត​វីរុស​កូរ៉ូណា​បំប្លែង​ខ្លួនប្រភេទ​ថ្មី​អាល់ហ្វា (Alpha) និង​ដែលតា (Delta) នោះ។

កាល​ពី​ថ្ងៃ​ពុធប្រទេស​ថៃ​មាន​អ្នក​ស្លាប់​ប្រចាំ​ថ្ងៃ​ខ្ពស់​បំផុត​មិន​ធ្លាប់​មាន​ពី​មុន​មក​គឹ​ចំនួន​៥៣​នាក់។

ទោះ​បី​ជា​យ៉ាង​នេះ​ក្តី​អាជ្ញាធរ​ថៃ​និយាយ​ថា កម្មវិធី​វាល​ខ្សាច់ Phuket នឹងប្រព្រឹត្ត​ទៅដូច​ការ​គ្រោង​ទុក។ អ្នក​ដំណើរ​ប្រមាណ​២៥០​នាក់​មាន​គម្រោងនឹង​ធ្វើ​ដំណើរ​ទៅកាន់​កោះ​កម្សាន្ត​មួយ​នេះ​តាម​ជើង​យន្តហោះ​ចំនួន​៤នៅ​ថ្ងៃ​ព្រហស្បតិ៍​នេះ។ នេះ​បើតាម​ការ​បញ្ជាក់​របស់លោក Taweesin Visanuyothin អ្នក​នាំពាក្យគណៈកម្មាធិការ​ជាតិ​ប្រយុទ្ធ​ប្រឆាំង​ជំងឺកូវីដ​១៩​របស់ប្រទេស​ថៃ។

ប្រទេស​ថៃ​មាន​អ្នក​ទេសចរ​ប្រមាណ​៤០​លាននាក់​ក្នុង​មួយ​ឆ្នាំៗ​ហើយ​ផល​ទុនសរុប GDP របស់​ប្រទេស​នេះ​ចំនួន​១៨ភាគរយ​បាន​មក​ពី​វិស័យ​ទេសចរណ៍៕

XS
SM
MD
LG